༢༠༡༣ ཟླ་ ༡༢ ཚེས་ ༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༡༢ ཚེས་ ༩ ཉིན་ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་དྲུང་འཕར་ཀུན་དགའ་བཀྲ་ཤིས་ལགས་ཀྱིས་བཏང་གནས་ནང་འཁོད་དོན། མི་ནི་སུད་ཊ་ས་གནས་བོད་རིགས་སྤྱི་མཐུན་ཚོགས་པས་བོད་དོན་ལ་ཐུགས་སྣང་དང་རྒྱབ་སྐྱོར་གནང་མཁན་རྒྱ་རིགས་ཡོངས་ལ་སྤྱིའི་ལོ་གསར་པ་ཤར་ལ་ཉེ་བའི་གོ་སྐབས་དང་བསྟུན་ནས་ཡོངས་གྲགས་ཀྱི་འཚམས་འདྲིའི་ཕྱག་བྲིས་ཤིག་གནང་འདུག
དེ་ཡང་ཕྱག་བྲིས་དེའི་ནང་འཁོད་དོན། གུས་བརྩི་འོས་པའི་བོད་དོན་རྒྱབ་སྐྱོར་གནང་མཁན་རྒྱ་རིགས་སྤྱི་དང་། བྱེ་བྲག་རྒྱ་ནག་ནང་ཡོད་པའི་རྒྱ་རིགས་སྤུན་ཟླ། ཁྱད་པར་ཤེས་ཡོན་ཅན་དང༌། སློབ་ཕྲུག་བཅས་ལ་ང་ཚོ་ཨ་རིའི་མངའ་སྡེ་མི་ནི་སུད་ཊར་གནས་འཁོད་བོད་མི་ཡོངས་ནས་སྤྱི་ལོའི་ལོ་གསར་ཚེས་ལ་ཉེ་བའི་སྐབས་འདིར་མཛའ་བརྩེའི་འཚམས་འདྲི་ཞུ་རྒྱུ་ཡིན།
བོད་རྒྱ་མི་རིགས་གཉིས་ས་བབས་ཀྱིས་ཁྱིམ་མཚེས་སུ་གནས་ཏེ། ལོ་སྟོང་ཕྲག་གཉིས་ཙམ་གྱི་ལོ་རྒྱུས་རིང་པོའི་ནང་སྐབས་རེ་གཉེན་སྒྲིག་མཆོད་ཡོན་བཟང་ཕྱོགས་ཀྱི་འབྲེལ་བ་དང༌། སྐབས་རེ་དམག་འཁྲུག་རྒྱག་རེས་བྱས་པ་སོགས་ཡོད། འབྱུང་འགྱུར་ཕན་ཚུན་ཡིད་ཆེས་ཀྱིས་འཆམ་མཐུན་གཅིག་ཏུ་གནས་ཐུབ་ན། རྒྱ་བོད་གཉིས་ཕན་ཡོང་རྒྱུའི་དགེ་མཚན་ཡོད་པ་ནི་སྨོས་མ་དགོས་པ་ཡིན། ༸གོང་ས་མཆོག་གིས་ལམ་སྟོན་མཛད་ཅིང་། གཞིས་བྱེས་བོད་མི་མང་ཚོགས་ཀྱིས་རྒྱབ་སྐྱོར་ཡོད་པའི་ད་ལྟའི་བོད་མིའི་སྲིད་བྱུས་དབུ་མའི་ལམ་གྱི་དགོངས་དོན་ཡང་གཙོ་བོ་བོད་རྒྱ་གཉིས་སྨན་གྱི་ཆེད་དུ་དམིགས་པ་ཞིག་ཡིན།
རྒྱ་བོད་མི་རིགས་དབར་གྱི་དཀའ་ངལ་སེལ་རྒྱུར་གཡོལ་ཐབས་མེད་པའི་འགན་འཁྲི་དེ་རྒྱ་བོད་མི་རིགས་གཉིས་ཀར་ཡོད་པ་དང་། དེའི་ནང་ནས་ཤེས་ཡོན་ཅན་རྣམས་ལ་ཡོད་པ་ནི། དེ་སྔོན་རྒྱ་ནག་པེ་ཅིན་མཐོ་རིམ་སློབ་གྲྭའི་སློབ་དཔོན་ཆེན་མོ་ཏིང་ཙེ་ལེན་གྱིས་བོད་ཀྱི་འགྲོ་བ་མིའི་ཐོབ་ཐང་ལ་སེམས་ཁུར་གནང་རྒྱུ་དེ་ཤེས་ཡོན་ཅན་གྱི་འགན་འཁྲི་ཡིན་ཞེས་པའི་རྩོམ་ནང་། ཤེས་ཡོན་ཏོག་ཙམ་ཡོད་པའི་ང་ཚོས་འདས་པའི་ལོ་བཞི་བཅུའི་ནང་བོད་མི་དམངས་ནས་རང་ཉིད་ཀྱི་ཐོབ་ཐང་རྩོད་ལེན་བྱས་པར་རྒྱབ་སྐྱོར་དང་། རྒྱབ་སྐྱོར་བྱེད་རྒྱུའི་འགན་འཁྲིའི་འདུ་ཤེས་ཙམ་ཡང་སླེབས་མྱོང་མེད་པ་མ་ཟད། བོད་མི་ཚོས་མྱོང་བཞིན་པའི་དཀའ་སྡུག་དེ་དག་སྣང་མེད་དུ་བཞག་ཡོད། འོན་ཀྱང་ང་ཚོ་རྒྱ་ནག་མི་རིགས་ཀྱི་སྡུག་བསྔལ་ཉིན་མོར། བོད་ཀྱི་བསམ་པའི་གཙོ་འཛིན་ཏཱ་ལའི་བླ་མ་མཆོག་གིས་དྲང་བདེན་གྱི་རྒྱབ་སྐྱོར་གནང་བའི་གསུང་འཕྲིན་སྩལ་ཡོད། ཅེས་ཚོར་ཤུགས་བྱུང་བར་བསྟོད་འོས་རང་རེད།
ད་ཆ་བོད་དོན་ལ་རྒྱབ་སྐྱོར་དང་། གདུང་སེམས་མཉམ་སྐྱེ་གནང་མཁན་རྒྱ་རིགས་ཇེ་མང་དུ་འགྲོ་བཞིན་པ་དང་། ཁྱེད་རྣམ་པས་བོད་མིའི་གཉིས་ཕན་དབུ་མའི་ལམ་སྟེ། བོད་ཀྱི་ཐུང་མོང་མ་ཡིན་པའི་ཆོས་དང་རིག་གཞུང་སྲུང་སྐྱོབ་ཐུབ་ཆེད། བོད་མིར་མིང་དོན་མཚུངས་པའི་རང་སྐྱོང་བྱུང་བ་ཡིན་ན། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་བསྡད་འདོད་ཡོད་ཅེས། ལངས་ཕྱོགས་བཟུང་བ་དེ་ལ་རྒྱབ་སྐྱོར་གནང་སྟེ་བོད་ནང་ཡོད་པའི་བོད་མི་རྣམས་དཀའ་སྡུག་མྱོང་བཞིན་པའི་གནས་སྟངས་ལ་སེམས་ཁུར་གནང་བར་ང་ཚོ་ཨ་རིའི་མི་ནི་སུ་ཊར་གནས་འཁོད་བོད་རིགས་ཡོངས་ཀྱི་སེམས་གཏིང་ནས་ཐུགས་རྗེ་ཆེ་ཞུ་རྒྱུ་ཡིན།
ད་ལྟའི་བོད་ནང་གི་གནས་སྟངས་བཟང་ཕྱོགས་ཀྱི་འགྱུར་བ་ཡོང་རྒྱུ་ཕར་ཞག ད་དུང་ཇེ་ཞན་ཇེ་སྡུག་ཏུ་སོང་སྟེ། བོད་མི་ ༡༢༢ ཙམ་རང་ལུས་མེར་སྲེག་གི་ལམ་ནས་རྒྱ་ནག་གུང་ཁྲན་གཞུང་གིས་བོད་ཐོག་འཛིན་པའི་སྲིད་བྱུས་ལ་ངོ་རྒོལ་བྱས་ཡོད། འོན་ཀྱང་རྒྱ་ནག་གུང་ཁྲན་གཞུང་གིས་བོད་མིའི་སྐད་སྒྲ་སྣང་མེད་དུ་བཏང་བ་མ་ཟད། ད་དུང་བོད་མི་རྣམས་ལ་ཁ་བྲལ་གྱི་ཉེས་མིང་བཏགས་པ་དང་།
བོད་མིའི་འཐབ་རྩོད་ཀྱི་ངོ་བོ་རྒྱ་མི་རིགས་ལ་ཁ་གཏད་བྱེད་ཀྱི་ཡོད་འདྲའི་བདེན་པ་མིན་པའི་དྲིལ་བསྒྲགས་བྱེད་བཞིན་པའི་དུས་འདིར། ང་ཚོར་རྒྱ་རིགས་ཤེས་ཡོན་ཅན་གྱི་རྒྱབ་སྐྱོར་མུ་མཐུད་ནས་དགོས་རྒྱུ་དེ་ནི་ཧ་ཅང་གི་གལ་ཆེན་པོ་ཡིན། ལྷག་པར་དངོས་ཡོད་གནས་ཚུལ་ཤིན་ཏུ་ཐོས་དཀའ་བའི་རྒྱ་རིགས་མི་མང་ཚོར་བོད་ཀྱི་གནས་ཚུལ་དངོས་ཤེས་པ་བཟོ་རྒྱུར་ཡང་ཁྱེད་རྣམ་པའི་རྒྱབ་སྐྱོར་ནི་ནུས་པ་ཆེ་ཤོས་ཆགས་ཡོད། བོད་མི་ཚོས། རྒྱ་ནག་གཞུང་གིས་བོད་ལ་རྩ་ཁྲིམས་ནང་བཤད་པ་ལྟར། རང་སྐྱོང་མིང་དོན་མཚུངས་པ་ཞིག་སྤྲད་པ་ཡིན་ན། ང་ཚོས་རྒྱ་ནག་ནས་ཁ་བྲལ་འགྲོ་རྒྱུའི་འདོད་པ་མེད།
རང་སྐྱོང་རྩོད་པའི་དགོས་དམིགས་གཙོ་བོ་ནི། བོད་མི་རིགས་ཙམ་མ་ཟད། འགྲོ་བ་མིའི་རིགས་སྤྱི་ལ་ཕན་ཐོགས་བྱེད་ཐུབ་པའི་བོད་ཀྱི་ཐུན་མོང་མ་ཡིན་པའི་རིག་གཞུང་སྲུང་སྐྱོབ་བྱེད་རྒྱུའི་ཆེད་དུ་ཡིན། ཁྱེད་རྣམ་པས་མུ་མཐུད་ནས་ང་ཚོར་རྒྱབ་སྐྱོར་གནང་སྟེ། བོད་མི་ཚོའི་དགོས་འདུན་གཙོ་བོ་ག་རེ་ཡིན་པ་དང་། བོད་མིས་ཁ་བྲལ་དང་རྒྱ་མི་རིགས་ལ་ངོ་རྒོལ་བྱེད་ཀྱི་མེད་པ་བཅས་ཀྱི་དངོས་ཡོད་བདེན་པའི་གནས་ཚུལ་རྣམས་རྒྱ་རིགས་མང་ཚོགས་ལ་ངོ་སྤྲོད་གནང་སྐྱོང་ཡོང་བའི་རེ་སྐུལ་ཞུ་རྒྱུ་དང་། ད་བར་ཁྱེད་རྣམ་པས་ང་ཚོར་རྒྱབ་སྐྱོར་གནང་བ་དང་། ལྷག་པར་རྒྱ་ནག་ནང་ཡོད་པའི་ཤེས་ཡོན་ཅན་ཚོས་སྙིང་སྟོབས་ཆེན་པོའི་སྒོ་ནས་ང་ཚོར་རྒྱབ་སྐྱོར་གནང་བར་གོ་སྐབས་འདི་བརྒྱུད་ཐུགས་རྗེ་ཆེ་ཞུ་རྒྱུ་ཡིན། ཨ་རིའི་མི་ནི་སུ་ཊ་གནས་འཁོད་བོད་རིགས་སྤྱི་མཐུན་ཚོགས་པའི་རྒྱུན་ལས་ཐུང་མོང་ནས་ཕྱི་ལོ་ ༢༠༡༣ ཟླ་ ༡༢ ཚེས་ ༡ ལ།།
