༢༠༡༣ ཟླ་ ༡༢ ཚེས་ ༡༩ རེས་གཟའ་ཕུར་བུ།

༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕ་རན་སིའི་རྒྱལ་ས་པེ་རི་སིར་རྟེན་གཞི་བྱས་པའི་ཕ་རན་སི་དང་། རྒྱ་ནག་མཛའ་འབྲེལ་ཚོགས་པ་གཉིས་ཀྱི་གོ་སྒྲིག་འོག་བོད་རང་སྐྱོང་ལྗོངས་ཀྱི་རྒྱ་ནག་དམར་ཤོག་ཚོགས་པའི་དྲུང་ཆེ་ (Wu Yingie) ཕ་རན་སི་ནང་འཚམས་གཟིགས་སུ་འབྱོར་ཡོད་པ་དང་སྟབས་བསྟུན། ཕྱི་ལོ་ ༢༠༡༣ ཟླ་ ༡༢ ཚེས་ ༡༧ རེས་གཟའ་མིག་དམར་ཉིན་ཕ་རན་སི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་མི་ཡིན་པ་དང་། ཕ་རན་སི་སྤྱི་ཚོགས་ཚོགས་པའི་གྲོས་ཚོགས་ཀྱི་འཐུས་མི་སྐུ་ཞབས་ (Jean Patrick Gille) དང་། ལྗང་ཁུ་ཚོགས་པའི་གྲོས་ཚོགས་ཀྱི་འཐུས་མི་སྐུ་ཞབས་ (Noel Mamere) རྣམ་གཉིས་ནས་རྒྱ་ནག་གཞུང་དང་། བཙན་བྱོལ་བོད་གཞུང་གི་སྐུ་ཚབ་དབར་གྲོས་མོལ་བསྐྱར་གསོ་གནང་རྒྱུར་གྲོས་ཚོགས་ནང་འབོད་སྐུལ་གྱི་གྲོས་འཆར་འདོན་རྒྱུ་ཡིན་སྐོར་གསར་འགོད་བསྒྲགས་གཏམ་སྤེལ་འདུག
གྲོས་འཆར་དེའི་ནང་བོད་རྒྱ་ཞི་མོལ་བསྐྱར་གསོ་གནང་རྒྱུའི་འབོད་སྐུལ་ཙམ་མ་ཟད། ཕ་རན་སི་དང་ཡུ་རོབ་མཉམ་སྦྲེལ་སྒྲིག་འཛུགས་ནས་བོད་དོན་དམིགས་བསལ་སྐུ་ཚབ་བསྐོ་གཞག་གནང་དགོས་པ་དང་། དེ་བཞིན་བོད་རྒྱའི་དཀའ་རྙོག་སེལ་ཐབས་སུ་ཕ་རན་སི་གཞུང་ནས་འགན་ཁུར་ཆེ་ཙམ་བཞེས་དགོས་པའི་སྐོར་ཡང་ནན་བརྗོད་གནང་བ་དང་སྦྲགས། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་འདོན་གནང་མཛད་པའི་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཞུས་དགོས་སྐོར་ཡང་ནན་བརྗོད་གནང་ཡོད་འདུག གྲོས་ཚོགས་ཀྱི་འཐུས་མི་རྣམ་གཉིས་ནས་སྤེལ་བའི་ཟུང་འབྲེལ་གྱི་གསར་འགོད་བསྒྲགས་གཏམ་ནང་། བོད་ནང་རྒྱ་ནག་གཞུང་གིས་དྲག་གནོན་གྱི་སྲིད་བྱུས་མཚམས་འཇོག་དང་། བོད་མིའི་ཆོས་དད་རང་དབང་གིས་གཙོས་འགྲོ་བ་མིའི་ཐོབ་ཐང་སྲུང་སྐྱོབ་སླད། ཕ་རན་སི་གཞུང་ནས་བོད་ཀྱི་གནད་དོན་ལ་རྒྱབ་སྐྱོར་མཚོན་པའི་བཞེངས་ཕྱོགས་བསྐྱར་གནོན་ཞུ་དགོས་པའི་ཐོག་རྒྱ་ནག་གཞུང་ལ་ཤུགས་གནོན་སྤྲོད་རྒྱུའི་འགག་རྩའི་དུས་ལ་སླེབས་ཡོད་པའི་སྐོར་ནན་སྐུལ་གནང་འདུག གྲོས་ཚོགས་ཀྱི་འཐུས་མི་སྐུ་ཞབས་ (Jean Patrick Gille) མཆོག་གིས། བོད་ནང་རང་ལུས་མེར་སྲེག་གཏོང་བཞིན་པ་དེ་འཚེ་བའི་ལས་འགུལ་མིན་པ་དང་། དེ་ལས་ལྡོག་སྟེ་ད་ལྟའི་བོད་ནང་གི་ཆེས་ཛ་དྲག་གནས་སྟངས་སུ་གྱུར་ཡོད་པའི་མཚོན་རྟགས་ཡིན་སྐོར་གསལ་སྟོན་གནང་འདུག