༢༠༡༣ ཟླ་ ༡༢ ཚེས་་༡༢ རེས་གཟའ་ཕུར་བུ།
མེ་ནི་སོ་ཊ་མངའ་སྡེའི་གྲོས་ཚོགས་འཐུས་མི་ཀེ་རོ་ལིན་Carolyn Laine ལགས་དང་། ཝི་སི་ཀོན་སིན་མངའ་སྡེའི་གྲོས་ཚོགས་འཐུས་མི་ཌིན་ཀུ་ཌ་སེན་ Dean Knudsen ལགས་དང་མཇལ་འཕྲད་སྐབས།
༄༅། །་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ལ་མེ་ནི་སོ་ཊ་བོད་རིགས་ཚོགས་པས་མགྲོན་འབོད་ལྟར། ཕྱི་ལོ་ ༢༠༡༣ ཟླ་ ༡༢ ཚེས་ ༦ ཉིན་ཁུལ་དེར་རྟེན་གཞི་བྱས་པའི་རྒྱུད་སྟོད་དགོན་པ་དང་། ལམ་སྟོན་བསྟི་གནས་ཁང་དུ་ཕེབས་ཏེ་སློབ་མ་རྣམས་དང་ལྷན་ཐུག་འཕྲད་ཀྱིས་བོད་ཀྱི་ལོ་རྒྱུས་དང་རིག་གཞུང་ཐོག་སློབ་གཉེར་གནང་གལ་ཆེ་བའི་སྐོར་སོགས་ཀྱི་ལམ་སྟོན་གསུང་བཤད་གནང་ཡོད། དེ་ཉིན་ཕྱི་དྲོ་མེ་ནི་སོ་ཊའི་བོད་རིགས་ཚོགས་པས་ཚོགས་གཙོ་མཆོག་ལ་གསོལ་ཚིགས་གོ་སྒྲིག་སྐབས་སྐུ་མགྲོན་དུ་མེ་ནི་སོ་ཊ་མངའ་སྡེའི་གྲོས་ཚོགས་འཐུས་མི་ཀེ་རོ་ལིན་ Carolyn Laine ལགས་དང་། ཝི་སི་ཀོན་སིན་མངའ་སྡེའི་གྲོས་ཚོགས་འཐུས་མི་ཌིན་ཀུ་ཌ་སེན་ Dean Knudsen ལགས་མགྲོན་འབོད་གནང་འདུག ཕྱི་ཚེས་ ༧ ཉིན་གྱི་སྔ་དྲོར་ཚོགས་གཙོ་མཆོག་བོད་མིའི་རིག་གཞུང་སློབ་གྲྭར་ Tibetan Culture School ཆེད་ཕེབས་ཀྱིས་ཡིག་གཟུགས་འགྲན་བསྡུར་ཁྲོད་རྩེ་ཕུད་ལོན་པའི་སློབ་མ་རྣམས་ལ་གཟེངས་རྟགས་དང་ཕྱག་འཁྱེར་གནང་། སྐབས་དེར་ཚོགས་གཙོ་མཆོག་གིས་སློབ་ཕྲུག་དང་ཕ་མ་རྣམས་ལ་གཟའ་མཇུག་སློབ་གྲྭ་ཙམ་མ་ཟད་སོ་སོའི་ཁྱིམ་ཚང་ནས་བོད་སྐད་སྐྱོན་རྒྱུ་ཧ་ཅང་གལ་ཆེ་ཡིན་སྐོར་གསུང་བཤད་གནང་ཡོད། དེ་རྗེས་སློབ་གྲྭའི་འཛིན་ཁང་རེ་རེའི་ནང་གཟིགས་སྐོར་དུ་ཕེབས་ཏེ་དགེ་རྒན་དང་སློབ་ཕྲུག་ཚོར་ཐུགས་འཕྲད་གནང་ཡོད།
ཚོགས་གཙོ་མཆོག་གིས་མི་ནེ་སོ་ཊའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་དང་མཇལ་འཕྲད་གནང་བཞིན་པ།
དེ་ཉིན་ཕྱི་དྲོ་ཚོགས་གཙོ་མཆོག་ཁུལ་དེར་ཡོད་པའི་ལུགས་གཉིས་ཕུན་ཚོགས་ཁང་སྤྱི་ཁང་དུ་ཕེབས་སྐབས་སྲོལ་རྒྱུན་གྱི་ལམ་ནས་ཕེབས་བསུ་གཟབ་རྒྱས་ཞུས་ཡོད། སྐབས་དེར་ཚོགས་གཙོ་མཆོག་གིས་མང་ཚོགས་ལ་གསུང་བཤད་དང་དྲི་བར་ལན་འདེབས་གནང་གྲུབ་རྗེས། བོད་རིགས་ཚོགས་པའི་རྡོ་རྗེ་ལགས་ཀྱིས་ཚོགས་གཙོ་མཆོག་ལ་ཆེ་བསྟོད་ཀྱི་བྱ་དགའ་ཞིག་ཕུལ། ཕྱི་ཚེས་ ༨ ཉིན་སྔ་དྲོ་ཚོགས་གཙོ་མཆོག་ཨ་རིའི་ཨི་ལི་ནོ་ཨིས་མངའ་སྡེའི་གྲོང་ཁྱེར་ཆི་ག་གོ་བརྒྱུད་ཝི་སི་ཀོན་སིན་མངའ་སྡེའི་རྒྱལ་ས་མེ་ཌི་སེན་དུ་ཕེབས་འབྱོར་གྱིས་ཁུལ་དེར་བོད་རིགས་རྣམས་དང་ལྷན་ཐུག་འཕྲད་དང་གསུང་བཤད་གནང་ཡོད། དེ་ནས་ཚོགས་གཙོ་མཆོག་ཨ་རིའི་མེ་ནི་སོ་ཊ་མངའ་སྡེར་ཕྱིར་ཕེབས་ཀྱིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་བཞེས་མཛད་དེ་ལོ་ངོ་ ༢༤ འཁོར་བའི་མཛད་སྒོའི་ཉིན་མོར་སྐུ་མགྲོན་གཙོ་བོར་གདན་ཞུས་ལྟར་ཆེད་ཕེབས་ཀྱིས་མཛད་སྒོའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་གནང་བ་དང་སྦྲགས་ལམ་སྟོན་གསུང་བཤད་གནང་།
སྐབས་དེར་མེ་ནི་སོ་ཊའི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་གཙོ་སྐུ་ཞབས་ཀེ་ཝིན་ལིན་ཌ་སེ་མཆོག་གིས་འགྲོ་བ་མིའི་ཐོབ་ཐང་གལ་ཆེ་ཡིན་སྐོར་སོགས་གསུང་བཤད་གནང་། ཚོགས་གཙོ་མཆོག་གིས་མེ་ནི་སོ་ཊའི་འགྲོ་བ་མིའི་ཐོབ་ཐང་ལྷན་ཁང་Commissioner of Minnesota Department of Human Rights གི་ཚོགས་གཙོ་སྐུ་ཞབས་ཀེ་ཝིན་ལིན་ཌ་སེ་ Mr. Kevin Lindsay མཆོག་མཇལ་འཕྲད་ཀྱིས་ད་ལྟའི་བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་གནང་འདུག་པ་བཅས།།
