༢༠༡༣ ཟླ་ ༡༢ ཚེས་ ༢༤ རེས་གཟའ་མིག་དམར།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། བོད་ཤར་ཕྱོགས་ཁམས་ནགས་ཤོད་འབྲི་རུ་རྫོང་གི་བོད་མི་ལོ་གཞོན་གསུམ་ལ་རྒྱ་གཞུང་གིས་ཁྲིམས་ཐག་ལྕི་མོ་བཅད་འདུག བོད་མི་དེ་དག་ནི་ཁམས་འབྲི་རུ་རྫོང་འབྲི་རུ་ཤང་གསེར་ཁང་གྲོང་ནས་ཡིན་པའི་འཕྲིན་ལས་ཚེ་དཀར་དང་། ཆོས་ཁྱབ། འབྲི་རུ་རྫོང་གྲོང་ཚོ་གསུམ་པ་ནས་ཡིན་པའི་ཚེ་ལྷ་གསུམ་ལ་ཁོར་ཡུག་སྲུང་སྐྱོབ་ཀྱི་ལས་འགུལ་ཁྲོད་མཉམ་ཞུགས་བྱས་པ་དང་། རྒྱལ་ཁབ་ཁ་བྲལ་གྱི་ཉེས་མིང་འོག ལོ་ ༡༣ ནས་༣ བར་གྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག
ཕྱི་ལོ་༢༠༡༣ ཟླ་ ༡༢ ཚེས་ ༡༩ ཉིན་འབྲི་རུ་རྫོང་མི་དམངས་ཁྲིམས་ཁང་གིས། འབྲི་རུ་གསེར་ཁང་གྲོང་ནས་ཡིན་པའི་གླུ་བ་འཕྲིན་ལས་ཚེ་དཀར་ལ་དུས་བཀག་བཙོན་ འཇུག་ལོ་ ༩ དང་། གསེར་ཁང་གྲོང་ནས་ཡིན་པའི་ཆོས་ཁྱབ་ལ་དུས་བཀག་བཙོན་འཇུག་ལོ་ ༡༣ ། གྲོང་ཚོ་ལྔ་པ་ནས་ཡིན་པའི་དེ་སྔོན་ཉེན་རྟོག་པའི་ལས་ཀ་བྱེད་མྱོང་བའི་ཚེ་ལྷ་ལ་དུས་བཀག་བཙོན་འཇུག་ལོ་ ༣ གསུམ་བཅས་ཀྱི་ཁྲིམས་ཐག་བཅད་ཡོད་འདུག
ཆོས་ཁྱབ་ལགས།
བོད་མི་དེ་གསུམ་ནི་ཕྱི་ལོ་ ༢༠༡༣ ཟླ་ ༡༡ པའི་ཟླ་མཇུག་ཙམ་ལ་ནག་ཆུ་གྲོང་ཁྱེར་ནས་འཇུ་བཟུང་བཙན་ཁྲིད་ཀྱིས་བཀག་ཉར་བྱས་ ཡོད་པ་རེད། རྒྱ་གཞུང་གིས་ཁོང་གསུམ་ལ་བཙུགས་པའི་ཉེས་མིང་ནི། ད་ལོིའི་ལོ་སྟོད་དེ་སྤྱི་ཟླ་༥་པའི་ནང་དུ་ནགས་ཤོད་འབྲི་རུའི་ཡུལ་མི་རྣམས་ཀྱི་གནས་རི་ནགས་ལྷའི་ཁོར་ཡུག་སྲུང་སྐྱོང་ ཆེད་རྒྱ་གཞུང་ལ་ངོ་རྒོལ་བྱུང་སྐབས། ཁོ་ཚོ་གསུམ་རྙོག་དྲ་སློང་མཁན་གྲས་ཡིན་པ་དང་། དེ་བཞིན། ཕྱི་ཕྱོགས་ལ་འབྲེལ་བ་ཡོད་ཚུལ་དང་རྒྱལ་ཁབ་ཁ་བྲལ་སོགས་ཀྱི་ཉེས་མིང་བཙུགས་ཡོད་འདུག
ཁོང་གསུམ་ནི་བོད་ཁམས་ནགས་ཤོད་འབྲི་རུ་རྫོང་འབྲི་རུ་ཤང་ཁོངས་ནས་ཡིན་པ་རེད། གླུ་བ་ཚེ་དཀར་ནི་སེར་ཁ་གྲོང་ནས་ཡིན་པ་དང་། ཁོང་གི་ཨ་ཕ་སྔོན་ནས་འདས་གྲོངས་ཕྱིན་ཡོད་སྟབས། ད་ལྟ་ཁོའི་ནང་དུ་བཟའ་ཟླ་དང་ཕྲུ་གུ་གཅིག ཨ་མ་བཅས་ཡོད་པ་རེད། ཁོང་ད་ལྟ་རང་ལོ་ ༢༢ ཡིན་འདུག་ལ། ནམ་རྒྱུན་མི་རིགས་ཀྱི་བདེ་སྡུག་དབྱངས་སུ་གྱེར་མཁན་གླུ་བ་ཞིག་ཡིན་ལ། ཁོང་གིས་༼མཐུན་སྒྲིལ་གྱི་ཨ་ལོང་༽ཞེས་པའི་འོད་སྡེར་ཀྱིས་མཚོན་པའི། མི་རིགས་རིག་གཞུང་གཅེས་འཛིན་སྐོར་བརྗོད་དོན་ཡིན་པའི་ཆེད་སྒྲིག་གླུ་གཞས་འོད་ སྡེར་འགའ་ཤས་སྤྱི་ཚོགས་ཁྲོད་འགྲེམས་སྤེལ་བྱས་མྱོང་ཡོད་ལ། ཁོང་གི་གླུ་གཞས་ཁག་ལ་སྤྱི་ཚོགས་ཁྲོད་དགའ་མོས་བྱེད་མཁན་མང་པོ་ཡོད་འདུག
ཆོས་ཁྱབ་ཀྱང་སེར་ཁ་གྲོང་ནས་ཡིན་པ་དང་། ཚེ་ལྷ་ནི་གྲོང་ཚོ་ལྔ་པ་ནས་ཡིན་འདུག ཚེ་ལྷ་དེ་སྔོན་ཉེན་རྟོག་པའི་ལས་ཀ་ཀྱང་གཉེར་མྱོང་མཁན་ཞིག་ཡིན་པ་རེད། ཁོང་གཉིས་ཀྱི་ལོ་ཚད་དང་ནང་མིའི་གནས་ཚུལ་ཞིབ་ཕྲ་ཤེས་རྟོགས་ཐུབ་མི་འདུག་ལ། ཧ་ཅང་ལོ་གཞོན་ཡིན་འདུག
ཚེ་ལྷ་ལགས།
ད་ལོའི་དབྱར་རྩ་དགུན་འབུ་བརྐོ་བའི་དུས་ཚུགས་ཀྱི་སྐབས་སུ། ཁམས་ནགས་ཤོད་འབྲི་རུའི་གནས་རི་ནགས་ལྷ་ཛམ་བྷ་ཞེས་པ་དེར། རྒྱ་གཞུང་གིས་གཞུང་ལམ་དང་ཆུ་གློག་འཛུགས་བསྐྲུན་ལ་ཁ་གཡར་ཏེ། གཏེར་ཁ་སྔོག་འདོན་གྱི་ལས་འཆར་སྤེལ་ཡོད་ལ། སྐབས་ དེར་ནགས་ཤོད་འབྲི་རུའི་སྟོད་སྨད་བར་གསུམ་གྱི་ཡུལ་མི་ཚོས་ངོ་རྒོལ་ཤུགས་ཆེན་ བྱས་པར་བརྟེན། རྒྱ་གཞུང་གིས་གཏེར་ཁ་སྔོག་འདོན་གྱི་ལས་འཆར་དེ་བཀག་འགོག་བྱེད་ཐུབ་ཡོད་པ་མ་ ཟད། རྗེས་སུ་ས་གནས་སྲིད་གཞུང་རིམ་པར་མང་ཚོགས་ཀྱིས་ཞུ་གཏུགས་བརྒྱབ་པར་བརྟེན། གནས་རི་དེ་ལྗོངས་རིགས་དངོས་སྲུང་སྐྱོབ་ཀྱི་གྲལ་དུ་ཚུད་ཡོད་པ་དང་། གནས་རི་སྲུང་སྐྱོབ་ཀྱིས་གཏེར་ཁ་སྔོག་འདོན་ལ་ངོ་རྒོལ་བྱེད་མཁན་རྣམས་ཀྱང་། ཁོར་ཡུག་སྲུང་སྐྱོབ་ཆེད་དུ་ཡིན་པར་ངོས་འཛིན་གྱིས་ཆད་གཅོད་སོགས་མི་བྱེད་པར་ རང་དགར་འཇོག་རྒྱུ་ཡིན་སྐོར་བརྗོད་ཡོད་པ་རེད།
ཡིན་ནའང་། རྗེས་སུ་ནགས་ལྷ་གནས་རི་སྲུང་སྐྱོབ་ཞི་རྒོལ་ཁྲོད་ཞུགས་མཁན་གོང་གསལ་མི་གསུམ་ འཇུ་བཟུང་བཙན་འཁྲིད་ཀྱིས་ཉེ་ཆར་ཁྲིམས་ཐག་བཅད་ཡོད་པ་མ་ཟད། སྐབས་དེར་ཞི་རྒོལ་ཁྲོད་ཞུགས་མཁན་མི་ཚང་མ་འཛིན་བཟུང་བྱ་རྒྱུ་ཡིན་པའི་གནས་ ཚུལ་ཐོན་ཡོད་པ་དང་། ས་གནས་བོད་མི་བཅུ་གྲངས་ཤིག་ཟླ་བ་གཉིས་ཙམ་ནང་ཁྲིམས་ཐག་བཅད་ཟིན་པ་དང་། ད་དུང་བཙོན་ཁང་ནང་འབྲི་རུ་རྫོང་གི་བོད་མི་ཧ་ཅང་མང་པོ་ཞིག་བཙོན་འཇུག་བྱེད་བཞིན་ཡོད་པ་དང་། དེ་ལས་མང་བའི་ཡུལ་མི་རྣམས་བཙན་ཤེད་ཁོ་ནའི་ངང་རྒྱལ་གཅེས་སློབ་གསོ་ཟེར་བ་གཉེར་བཞིན་ཡོད་འདུག
