༢༠༡༣ ཟླ་ ༡༢ ཚེས་ ༢༩ རེས་གཟའ་ཉི་མ།

༄༅། །འདི་ག་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པ་སྐལ་བཟང་མཁས་གྲུབ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༣ ཟླ་ ༡༢ ཚེས་ ༢༩ ཉིན་གྱི་སྔ་དྲོ་ཆུ་ཚོད་ ༨།༤༥ ཐོག་སེར་བྱེས་མཁས་སྙན་གྲྭ་ཚང་གི་ཆོས་རྭ་ཆེན་མོའི་བཞུགས་ཁྲི་རིན་པོ་ཆེར་༸ཞབས་སོར་འཁོད་དེ་ཉིན་འདིའི་ཆོས་འབྲེལ་མ་སྩལ་གོང་། དགེ་ལྡན་ལུགས་བཟང་ཆེས་མཐོའི་གཙུག་ལག་སློབ་གཉེར་ཁང་ཆེན་མོའི་བསླབ་པ་མཐར་སོན་པའི་དགའ་སྟོན་ཐེངས་དགུ་པའི་རྟེན་འབྲེལ་མཛད་སྒོའི་སྐུ་མགྲོན་གཙོ་བོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་ཆོས་རྗེ་རྣམ་གཉིས་མཆོག གདན་ས་ཁག་གི་མཁན་ལས་ཟུར་རྣམ་པ་སོགས་དང་སེར་སྐྱ་མི་མང་གྲངས་ ༣༠༠༠༠ བརྒལ་བའི་དབུས་སུ་ཕྱི་ལོ་ ༢༠༡༣ ལོའི་མང་དུ་ཐོས་པའི་བཀའ་རམས་དགེ་བཤེས་རྣམས་དང་། གཞུང་ལུགས་འཛིན་པ་སློབ་དཔོན་དགེ་བཤེས་ཞལ་གྲངས་ ༡༥༠ ཡོད་པ་རྣམས་ཀྱིས་ལོ་ངོ་ ༢༣ རིང་སློབ་གཉེར་གནང་སྟེ་བསླབ་པ་མཐར་ཕྱིན་པར་ཤར་པ་ཆོས་རྗེ་རིན་པོ་ཆེ་མཆོག་གིས་ཕྱག་འཁྱེར་གནང་བ་དང་། ༸གོང་ས་མཆོག་དང་ལྷན་དགེ་འདུན་ཞལ་གྲངས་ ༥༠ ཙམ་ནས་རིམ་བཞིན་སྐུ་པར་བསྒྲོན་ཏེ་བསླབ་པ་མཐར་སོན་པའི་དགའ་སྟོན་མཛད་སྒོ་གྲུབ།

དེ་རྗེས་སེར་སྨད་ནོར་གླིང་ཐོས་བསམ་གླིང་གྲྭ་ཚང་གི་མཁན་རིན་པོ་ཆེ་མཆོག་དང་སེར་བྱེས་མཁས་སྙན་གྲྭ་ཚང་གི་མཁན་རིན་པོ་ཆེ་རྣམ་གཉིས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་མཎྜལ་རྟེན་གསུམ་འདེགས་འབུལ་དང་དེ་བཞིན་སོག་པོའི་དད་ལྡན་པས་རྟེན་གསུམ་འདེགས་འབུལ་ཞུས་གྲུབ་བསྟུན། ༸གོང་ས་མཆོག་གིས་ཁལ་ཁ་རྗེ་བཙུན་དམ་པ་མྱུར་བྱོན་གསོལ་འདེབས་དང་སྦྲགས་བཀའ་སློབ་ཕེབས་དོན། རྗེ་བཙུན་དམ་པ་ཞིང་གཤེགས་ཁོང་ངོས་གཉིས་ཆུང་ཆུང་སྐབས་ནས་ངོ་ཤེས་ཡིན། ངོས་རང་ལོ་བཅུ་གྲངས་ནས་ངོ་ཤེས་ཡག་པོ་ཞིག་ཡིན། དེ་ནས་རྒྱ་གར་ལ་བཙན་བྱོལ་དུ་ཕེབས་ཏེ་རིམ་པས་སོག་ཡུལ་ལ་སོ་སོའི་སྐུ་ཚེ་མང་པོའི་རིང་འབྲེལ་བ་ཡོད་པའི་གདུལ་ཞིང་མང་པོ་ཡོད་སར་ཕེབས་ཐུབ་རྒྱུ་བྱུང་ཡོད། ངོས་དང་རྗེས་མ་མཇལ་སྐབས་སྐུ་གཟུགས་ཧ་ཅང་སྐྱོ་པོ་འདུག་པས་རིན་པོ་ཆེས་ད་ཆ་ཡང་སྲིད་སྐོར་ལ་དགོངས་པ་བཞེས་དགོས།  ཡང་སྲིད་ཕེབས་ས་དེ་ཡང་ཆེན་པོ་ཧོར་གྱི་ཡུལ་རང་དུ་ཕེབས་ན་ཡག་པོ་ཡོད།  དེ་ལྟ་བུའི་དགོངས་པ་བཞེས་དགོས་པ་ཡིན། བོད་ལོའི་ལོ་མཇུག་དེར་རེད། སྐུ་གཟུགས་ཧ་ཅང་སྐྱོ་བོ་འདུག

དེ་ནས་དུས་ཚོད་དང་ས་ཆ་གང་དུ་གཤེགས་དགོས་ཡིན་ནམ་ཞེས་ངོས་ལ་དྲི་བ་དེ་འདྲ་ཞིག་འབྱོར་བ་རེད། དེ་འདྲའི་དྲི་བ་དྲིས་མཁན་ཧ་ལམ་བྱུང་མེད། དེར་བརྟེན་ངོས་ཀྱིས་སོག་ཡུལ་རང་དུ་གཤེགས་དགོས་པ་རེད། གཤེགས་རྒྱུའི་དུས་ཚོད་དེ་ད་ལྟ་བོད་ལོའི་ལོ་མཇུག་འཁེལ་འདུག་པས་ལོ་གསར་ནས་ཚེས་མགོར་གཤེགས་དགོས་པ་རེད་ཅེས་བརྗོད་པ་ལྟར་ཏག་ཏག་གཤེགས་སོང་། ལན་དེ་འབྱོར་ནས་རིན་པོ་ཆེ་ཅུང་དྲག་ཏུ་ཕེབས་འདུག དེ་རྗེས་རིན་པོ་ཆེ་གཤེགས་སོང་ཞེས་པའི་ལན་འབྱོར་བ་དང་འདི་ནས་རིན་པོ་ཆེའི་སྐུ་གདུང་དེར་དམ་ཚིགས་ཀྱི་རྩ་བ་བྱས་ནས་མཇལ་དར་ཞིག་བསྐུར་ཏེ་ཟམ་གདོང་རིན་པོ་ཆེ་་བཏང་བ་ཡིན། ཕ་གིར་སྐུ་གདུང་ཐུག་དམ་ལ་བཞུགས་ཡོད་པ་ནས་སྔོན་ལ་ཤངས་མཚལ་ཞིག་འབབ་ཡོང་གི་འདུག་སྐུ་གདུང་གདན་འདྲེན་ཞུ་དགོས་མིན་སྐོར་ངོས་ལ་ལན་ཞིག་འབྱོར་བྱུང་བས་ངོས་ནས་སྔོན་ལ་སྒུག་དགོས་ཞེས་བརྗོད་པ་ཡིན། དེ་ནས་ཟམ་གདོང་རིན་པོ་ཆེ་དེར་འབྱོར་བ་དང་མཇལ་དར་ཕུལ་རྗེས་ཐུགས་དམ་གྲོལ་བ་ཧ་ཅང་ཡིད་དབང་འཕྲོག་པོ་བྱུང་འདུག དེ་ལྟར་ངོས་ནས་མྱུར་བྱོན་གསོལ་འདེབས་འདི་བྲིས་པ་ཡིན། ཞེས་བཀའ་སློབ་ཕེབས་ཏེ་མྱུར་བྱོན་གསོལ་འདེབས་ཆ་ཚང་གསུང་འདོན་བཀའ་དྲིན་ཆེ་བ་མཛད།

དེ་རྗེས་མུ་མཐུད་བཀའ་སློབ་ཕེབས་དོན། ངོས་རང་སྐྱེས་ས་ཟི་ལིང་ཆགས་ཀྱི་ཡོད་པས་ཕལ་ཆེར་ང་ཚོའི་ཁྱིམ་ཚང་༸རྒྱལ་དབང་ལས་རྗེ་བཙུན་དམ་པར་སེམས་ཐག་ཉེ་བ་ཡོད་པ་འདྲ། དེར་བརྟེན་ངོས་ཀྱི་པ་ལགས་དང་ཨ་མ་ལགས་ཁོང་ཚོས་རྗེ་བཙུན་དམ་པར་ཧ་ཅང་མཉེས་པོ་གནང་གི་ཡོད། དེ་དུས་རྗེ་བཙུན་དམ་པར་ཡོངས་གྲགས་མཚན་གང་ཡང་མེད་ཀྱང་འབྲས་སྤུངས་སྒོ་མང་གྲྭ་ཚང་དུ་སློབ་གཉེར་གནང་ནས་བཞུགས་ཡོད། དེར་བརྟེན་པ་ལགས་དང་ཨ་མ་ལགས་རིན་པོ་ཆེར་ཧ་ཅང་མཉེས་པོ་ཡོད། ངོས་དང་ཐོག་མ་ཐུག་ས་དེ་ཨ་མ་ལགས་སར་རེད། ངོས་རང་ཨ་མ་ལགས་སར་འགྲོ་སྐབས་ཁོང་ཕ་གིར་ཕེབས་འདུག་པ་དང་ཐོག་མ་ཐུག་ཡོད། ཧ་ཅང་བློ་ལ་ངེས་པོ་འདུག་སྒོ་མང་གྲྭ་ཚང་རྔུན་ལེན་དང་རས་ཧམ་ཟོམ་གྱོན་ཆོག་གི་མེད། དེ་དུས་རིན་པོ་ཆེས་ཤ་ཟོམ་ཞིག་གྱོན་གདོང་ལ་རྨ་ཤུལ་ཡོད་པ་ཞིག་འདུག་པ་དེ་དགེ་རྒན་གྱིས་ཉེས་པ་རེད་གསུངས་ཀྱི་འདུག

ངོས་རང་ཆུང་ཆུང་སྐབས་ནས་རིན་པོ་ཆེ་ངོ་ཤེས་ཡིན། རིམ་པས་རྒྱ་གར་ནང་ཕེབས།  དེ་ནས་སོག་པོའི་ཡུལ་ལའང་རང་དབང་གི་ཉི་མ་ཤར་བར་སོང་རིན་པོ་ཆེར་མཚན་གསོལ་ཞུས། ཐོག་མ་ཁོང་མ་ཌེ་པར་ཌེ་ཤིའི་བོད་མིའི་གཞིས་ཆགས་སུ་བཞུགས་པ་རེད། དོལ་རྒྱལ་སྐོར་ཆ་བཞག་ནའང་རིན་པོ་ཆེས་ཧུར་ཐག་འབད་ཐག་བསམ་པ་རྣམ་དག་གནང་ཡོད། ཞེས་བཀའ་སློབ་སྩལ་ཏེ་༸གོང་ས་མཆོག་གིས་བྱང་ཆུབ་ལམ་རིམ་ཁྲིད་ཆེན་ཁག་གི་བཀའ་ཆོས་དབུ་འཛུགས་མཛད་དེ་སྔ་དྲོ་ཆོས་ཐུན་གཅིག་དང་།
ཉིན་རྒྱབ་ཀྱི་ཆོས་ཐུན་དབུ་འཛུགས་མ་མཛད་གོང་ཆོས་རྭའི་ནང་༸ཞབས་སོར་འཁོད་མ་ཐག་མེས་པོ་དམ་པ་གན་ངྷིའི་ཚ་མོ་སུ་མི་ཏྲ་གྷན་དི་ཀུལ་ཀར་ནི་ Sumitra Gandhi Kulkarni  མཆོག་དང་མཇལ་འཕྲད་མཛད་ནས་དེར་འདུས་ཆོས་ཞུ་བ་ཡོངས་ལ་ཁོ་མོ་ངོ་སྤྲོད་ཀྱི་བཀའ་སློབ་ཕེབས་དོན། ཁོང་ནི་གན་ངྷིའི་སྲས་བགྲེས་པའི་སྲས་མོ་རེད། ཁོང་ཆུང་ཆུང་སྐབས་གན་ངྷི་ལྷན་དུ་བཞུགས་མྱོང་ཡོད། ཁོང་ད་རེས་ཆེད་དུ་མངགས་ནས་ངོས་རང་ཐུག་པར་ཕེབས་པ་རེད། ཁོང་ལ་ངོས་ཀྱིས་བརྗོད་རྒྱུ་བྱུང་།  ངོས་རང་ལ་ཆ་བཞག་ན་གན་ངྷི་ལ་སྙིང་ནས་མོས་པ་བྱེད་མཁན་ཞིག་དང་།  ཁོང་གི་འཚེ་བ་མེད་པའི་ལྟ་བར་ཡིད་ཆེས་དང་རྗེས་འབྲང་པ་ཞིག་ཆགས་ཡོད། དེར་བརྟེན་ད་རེས་གན་ངྷིའི་སྲས་ཀྱི་སྲས་མོ་ཁོང་དང་ཐུག་པར་ཧ་ཅང་དགའ་པོ་བྱུང་། ཁོང་གི་པར་དེབ་ནང་ཁོང་དང་གན་ངྷི་ཕྱག་འབྲེལ་བཏང་སྟེ་ཡོད་པའི་པར་མང་པོ་ཞིག་འདུག དེར་བརྟེན་ཁོང་གི་ལག་པ་འདི་གན་ངྷི་ལྷན་དུ་ཧ་ཅང་འབྲེལ་བ་ཡོད་པར་སོང་

ངོས་ཀྱིས་འགྲམ་པར་གཅིག་སྦྱར་གྱི་ཡིན། ངོས་ནས་ཁྱེད་ཚོར་ངོ་སྤྲོད་བྱེད་རྒྱུ་དེ་རང་ཡིན། ཁོང་གིས་ངོས་ལ་ཁྱེད་རང་སངས་རྒྱས་ཀྱི་སྤྲུལ་པ་རེད་གསུངས་ཀྱི་འདུག་པར་ངོས་ནས་སངས་རྒྱས་ཀྱི་སྤྲུལ་སྐུ་དེ་བཙན་བྱོལ་བ་ཞིག་ཡོང་གི་མ་རེད། ཅེས་ཞུས་པ་ཡིན། ཅེས་ངོ་སྤྲོད་མཛད་ཡོད།

དེ་ནས་གན་ངྷིའི་ཚ་མོ་མཆོག་གིས་ཞུས་དོན། ངོས་རང་འདིར་བཅར་ཏེ་ངེད་ཚོའི་བླ་མ་༸གོང་ས་ཏཱ་ལའི་བླ་མ་མཆོག་མཇལ་ཁ་ཞུ་རྒྱུ་བྱུང་བར་ཧ་ཅང་དགའ་པོ་བྱུང་། ལོ་རབས་འདིའི་ནང་ལ་འཚོ་བཞིན་བཞུགས་པའི་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ནི་འཚེ་མེད་ཞི་བའི་མཛད་འཕྲིན་སྐྱོང་མཁན་ཞིག་དང་སངས་རྒྱས་སྐུ་དངོས་ཡིན་པ་མ་ཟད། ཞི་བདེ་དང་བདེ་སྐྱིད། འཆམ་མཐུན་གྱི་མཛད་འཕྲིན་སྐྱོང་མཁན་གཅིག་པུ་དེ་ཡིན། ངས་གང་ཉིད་ལ་ཏཱ་ལའི་བླ་མ་མཆོག་མི་ཞུ་བར་གུ་རུ་ཇི་ཞེས་ངེད་ཚོའི་བླ་མ་ཞུ་བཞིན་ཡོད། ཁོང་ནི་སངས་རྒྱས་བཅོམ་ལྡན་འདས་དང་ངའི་སྤོ་ལགས་ཀྱང་ཡིན་པར་ངོས་འཛིན་ཞུ་བཞིན་ཡོད། ང་རང་ཏཱ་ལའི་བླ་མ་མཆོག་མཇལ་རྒྱུ་གཅིག་པུ་མིན་པརངའི་སྤོ་བོ་ལགས་ཀྱང་དམ་པའི་གཟིམ་ཁང་དུ་བཅར་ཡོད་པར་སོང་ཁྱེད་རྣམ་པ་ཚང་མ་ངའི་སྤུན་ཉེ་ཆགས་ཡོད། དེར་བརྟེན་ས་གནས་འདིར་ཁྱེད་རྣམ་པ་དང་མཇལ་རྒྱུ་བྱུང་བར་ཧ་ཅང་དགའ་པོ་བྱུང་ལ་ང་རང་སྒེར་ལ་གུ་རུ་མཆོག་གིས་ལམ་སྟོན་བཀའ་སློབ་ཕེབས་པར་སེམས་གཏིང་ནས་དགའ་སྤྲོ་འཕེལ་བྱུང་། ཅེས་ཞུས་ཏེ་མཇལ་ཁ་ཞུས་ཡོད།

དེ་ནས་༸གོང་ས་མཆོག་གིས་བཀའ་སློབ་ཕེབས་དོན། ངོས་ཀྱིས་གན་ངྷིའི་སྐུ་མཆེད་མང་པོ་ཞིག་ངོ་ཤེས་ཀྱི་ཡོད། གོང་དུ་བརྗོད་པ་བཞིན་གན་ངྷིའི་སྲས་བགྲེས་པའི་སྲས་མོ་ཁོང་གན་ངྷི་སྐུ་ངོ་མ་དང་ལྷན་དུ་གཤིབ་པ་ཞིག་རེད། གན་ངྷིའི་འཚེ་བ་མེད་པའི་ལྟ་སྤྱོད་དེ་འདྲ་ཞིག་གིས་དུས་རབས་ཉི་ཤུའི་ནང་རྒྱ་གར་རང་བཙན་འཐབ་རྩོད་གནང་སྐབས་འཚེ་བ་མེད་པའི་ལག་ལེན་བསྟར་གནང་བ་ཞིག་རེད། དེ་ནི་གན་ངྷིར་གསར་དུ་རྙེད་པ་ཞིག་མ་རེད། ལོ་སྟོང་ཕྲག་གཉིས་གསུམ་གོང་ནས་རྒྱ་གར་ནང་འཚེ་བ་མེད་པའི་ལྟ་བ་ཞིག་ཡོད་པ་དེ་དང་འབྲེལ་ནས་ཆོས་ལུགས་མི་འདྲ་བ་ཚང་མ་ལྷན་དུ་གནས་ཐུབ་རྒྱུ་ཞིག་བྱུང་ཡོད། འཛམ་གླིང་འདིའི་སྟེང་གི་ཆོས་ལུགས་ཡོངས་སུ་རྫོགས་པ་རྒྱ་གར་ནང་ཡོད་པ་ཧ་ལམ་བརྗོད་ཐུབ་ཀྱི་རེད། དེ་ནི་རྒྱ་གར་གཅིག་པུ་མ་གཏོགས་ལུང་པ་གཞན་ལ་ཧ་ལམ་མེད། འཛམ་གླིང་ཆོས་ལུགས་གཙོ་ཆེ་བ་ཚང་མ་མཉམ་དུ་བསྡད་དེ་ཡོད་པ་ཧ་ལམ་རྒྱ་གར་ནང་བཞིན་མེད། རྒྱ་གར་ལ་ལོ་ངོ་སྟོང་ཕྲག་མང་པོའི་རིང་གི་ལྟ་སྤྱོད་བཟང་པོ་ཞིག་ཡོད་པ་འདི་རྒྱ་གར་བ་མི་རབས་གསར་པ་ཚོར་དྲན་གསོ་གཏོང་རྒྱུ་དང་སོས་པ་བཟོ་རྒྱུ་དེ་གལ་ཆེན་པོ་འདུག་ཞུ་རྒྱུ་བྱུང་། ངོས་རང་གན་ངྷིའི་རྗེས་འབྲང་པ་ཞིག་ཡིན་པའི་ཆ་ནས་ག་ཚོད་ཐུབ་ཐུབ་བྱེད་བཞིན་ཡོད། ཁོང་ལ་ཆ་བཞག་ན་གན་ངྷིའི་ཁྱིམ་གྱི་བརྒྱུད་པ་ཆགས་ཡོད་སྟབས་ཐུགས་འཁུར་སྐྱེད་དགོས་པ་རེད་ཅེས་ཞུ་རྒྱུ་ཡིན། ཞེས་བཀའ་སློབ་ཕེབས་རྗེས་ཕྱི་དྲོ་ཆོས་ཐུན་གཅིག་བཅས་དེ་ཉིན་ཆོས་ཐུན་གཉིས་བཀའ་དྲིན་ཆེ་བ་སྩལ་ཡོད།།