༢༠༡༣ ཟླ་ ༡༢ ཚེས་ ༣ རེས་གཟའ་མིག་དམར།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་ལྡན་ཆེན་པོ་ཧོར་གྱི་ཆོས་ཞུ་བ་རྣམས་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་སྟེ་ཕྱི་ལོ་ ༢༠༡༣ ཟླ་ ༡༢ ཚེས་ ༢ ཉིན་མགོན་པོ་གང་ཉིད་མཆོག་གིས་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ (Kempinski Ambience Hotel) གསོལ་མགྲོན་ཁང་དུ་ཆེན་པོ་ཧོར་གྱི་ཡུལ་གྲུ་ནས་ཕེབས་པའི་དད་ལྡན་ཆོས་ཞུ་བ་ ༨༡༨ གཙོ་བོར་གྱུར་བའི་ཀོ་རི་ཡ་སོགས་ཁྱོན་ཆོས་ཞུ་བ་མི་གྲངས་ ༡༠༠༠ བརྒལ་བར་རྗེ་ཙོང་ཁ་པ་ཆེན་པོ་མཆོག་གིས་མཛད་པའི་ཡོན་ཏན་གཞིར་གྱུར་མ་དང་ལམ་གཙོ་རྣམ་གསུམ་གྱི་ཆོས་འབྲེལ་དབུ་འཛུགས་མཛད་འདུག
དེ་ཡང་གོང་ཚེས་ཉིན་༸གོང་ས་མཆོག་གིས་དེར་འདུས་དད་ལྡན་ཆོས་ཞུ་བ་རྣམས་ལ་ཆོས་འཆད་ཉན་སྐབས་ཀུན་སློང་རྣམ་དག་འཁྱེར་དགོས་སྐོར་ལམ་སྟོན་བཀའ་སློབ་སྩལ་དོན། ཁྱེད་རང་ཚོ་ཆེན་པོ་ཧོར་གྱི་ཆོས་གྲོགས་ཚོར་དེ་རིང་ཆོས་འབྲེལ་བྱ་རྒྱུ་ཡིན། ཁྱེད་རང་ཚོས་འགྲོ་སོང་ཆེན་པོ་བཏང་ནས་འདི་གར་ཡོང་བ་རེད། ཁྱེད་རང་ཚོ་ཚང་མར་འཚམས་འདྲི་ཡོད། སྤྱིར་བཏང་ཆོས་འཆད་ཉན་སྐབས་ཀུན་སློང་རྣམ་པར་དག་པའི་སྒོ་ནས་འཆད་ཉན་བྱེད་རྒྱུ་ཧ་ཅང་གལ་ཆེན་པོ་ཡིན་པར་བརྟེན། ངོས་ཀྱིས་ཀུན་སློང་རྣམ་དག་གིས་ཆོས་འཆད་རྒྱུ་ཡིན་ལ་ཁྱེད་རང་ཚོས་ཀྱང་ཀུན་སློང་རྣམ་དག་ཐོག་ནས་ཉན་དགོས། ད་ལྟ་ང་ཚོ་དུས་རབས་ཉེར་གཅིག་ནང་སླེབས་ཡོད། ཆེན་པོ་ཧོར་ལ་ཆ་བཞག་ན་སྐབས་ཤིག་རིང་དུས་ཀྱི་འགྱུར་བ་མང་དག་ཅིག་བྱུང་སྟེ། སངས་རྒྱས་ཀྱི་ཆོས་ལ་དམིགས་སུ་བཀར་ནས་དམ་བསྒྲགས་ཀྱིས་གཏོར་བཤིག་བཏང་བའི་གནས་ཚུལ་བྱུང་ཡོད།
ད་ཆ་རང་དབང་ཐོབ་སྐབས་ཁྱེད་རང་ཚོ་སོ་སོའི་ཕ་མེས་ནས་སངས་རྒྱས་ཀྱི་ཆོས་སོག་ཡུལ་དུ་དར་ཁྱབ་ཆེན་པོ་བྱུང་བ་ཞིག་ཡིན་སྟབས། ལོ་ངོ་སྟོང་ཕྲག་རིང་ལ་དར་ཁྱབ་ཡོད་པ་དེ་རང་བཞིན་གྱིས་མེད་པ་བཟོ་རྒྱུ་ཧ་ཅང་ཁག་པོ་རེད། གང་ལྟར་ཁྱེད་རང་ཚོར་རང་དབང་ཐོབ་རྗེས་སངས་རྒྱས་ཀྱི་ཆོས་དེ་ཁྱེད་རང་ཚོས་སེམས་གཏིང་ལ་ཟུབ་ཏུ་མེད་པར་ཡོད་པ་དེ་རང་དབང་གི་སྒོ་ནས་མི་ཉམས་གོང་འཕེལ་དང་ཉམས་པ་སོར་ཆུད་བྱེད་ཐུབ་པའི་གནས་སྟངས་ཤིག་ཆགས་ཡོད། དུས་རབས་ཉེར་གཅིག་པའི་ནང་དེ་ལྟ་བུའི་སངས་རྒྱས་པའི་ཆོས་ཀྱིས་ཕན་ཐོགས་དང་འབྲེལ་བ་ག་རེ་འདུག སྔོན་ལ་དྲི་བ་ཞིག་དྲིས་དགོས་པ་རེད། དངོས་པོ་ཧ་ཅང་ཡར་རྒྱས་ཕྱིན་པའི་དུས་རབས་ཉེར་གཅིག་འདིའི་ནང་དཔེར་ན། ཁྱེད་རང་ཚོ་སོག་པོར་ཆ་བཞག་ན། དངོས་པོ་ཡར་རྒྱས་འགྲོ་དང་འགྲོ་བཞིན་པའི་སྐབས་འདིར་ཡང་ཆོས་ཀྱི་ཐོག་ནས་སེམས་ཀྱི་ཞི་བདེ་སྒྲུབ་དགོས་ཀྱི་ཡོད་སྟབས། དུས་ད་ལྟ་ཡིན་རུང་འབྲེལ་བ་དང་དགོས་མཁོ་ཡོད་པ་ཞིག་ཆགས་ཡོད།
སྤྱིར་ཐམས་ཅད་མཁྱེན་པ་བསོད་ནམས་རྒྱ་མཚོ་ཧོར་གྱི་ཡུལ་དུ་ཕེབས་ཏེ་བོད་ཀྱི་ཐེག་ཆེན་གྱི་ཆོས་བརྒྱུད་སྤྱི་དང་། ལྷག་པར་རི་བོ་དགེ་ལྡན་པའི་ཆོས་བརྒྱུད་ཆེན་པོ་ཧོར་གྱི་ཡུལ་དུ་དར་རྒྱས་ཤུགས་ཆེན་བྱུང་སྟེ། ལོ་བརྒྱ་ཕྲག་ཁ་ཤས་ནང་སོག་པོའི་དགེ་བཤེས་མཁས་པ་མང་དག་ཅིག་བྱུང་འདུག མགོ་སྟོད་བོད་དབུས་གཙང་དུ་ཕེབས་ཏེ་སློབ་གཉེར་གནང་ཡོད། དེ་ནས་རིམ་བཞིན་ཧོར་གྱི་ཡུལ་དུ་བཤད་གྲྭ་རྒྱ་ཆེན་པོ་དང་སྤུས་དག་པོ། དེ་བཞིན་མཁས་པ་མང་པོ་བྱུང་འདུག ཁྱེད་རང་ཚོ་སོག་པོའི་མི་རིགས་ནང་ཁ་ཆེ་སོགས་ཆོས་ལུགས་འདྲ་མིན་བྱེད་མཁན་ཡོང་སྲིད། ཆོས་ལུགས་ལ་དད་མོས་མེད་མཁན་དེ་འདྲ་ཡང་ཡོད་ངེས་རེད། འོན་ཀྱང་སོག་པོ་སྤྱི་ཡོངས་ཐོག་ནས་བཤད་ན། སོག་པོའི་རྣམ་པ་འཐོན་རྒྱུ་དེ་ནང་པའི་ཆོས་ཆགས་ཡོད། དཔེར་ན། བོད་པ་དང་གཅིག་མཚུངས་རེད། བོད་པའི་ནང་དུའང་ནང་པ་དང་ཁ་ཆེ་ཡི་ཤུ་ཡོད། ཆོས་དད་མེད་མཁན་ཡང་ཡོང་སྲིད། འོན་ཀྱང་བོད་ཀྱི་ཆོས་དང་རིག་གཞུང་བརྗོད་ན། ནང་པ་ཆགས་ཡོད། ཅེས་བཀའ་སློབ་དང་ཆོས་འབྲེལ་དབུ་འཛུགས་མཛད་ཡོད།
ཐེངས་འདིའི་ཉིན་གསུམ་རིང་གི་སོག་པོའི་ཆོས་འབྲེལ་སྐབས་༸གོང་ས་མཆོག་གིས་སོག་པོའི་ཆོས་ཞུ་བ་རྣམས་ལ་དཔལ་རྡོ་རྗེ་འཇིགས་བྱེད་ལྷ་བཅུ་གསུམ་མའི་དབང་དང་། དེ་བཞིན་དད་ལྡན་སོག་པོའི་ཆོས་ཞུ་བ་རྣམས་ནས་མགོན་པོ་གང་ཉིད་མཆོག་སྐུ་ཚེ་༸ཞབས་པད་བསྐལ་བརྒྱར་བརྟན་ཆེད་ཟབ་ལམ་བླ་མ་མཆོད་པའི་བདེ་སྟོང་དབྱེར་མེད་དང་འབྲེལ་བའི་སྒོ་ནས་བརྟན་བཞུགས་བསྟར་འབུལ་ཞུ་གཏན་འཁེལ་འདུག་པ་བཅས། །
