༢༠༡༣ ཟླ་ ༡༢ ཚེས་ ༡༦ རེས་གཟའ་ཟླ་བ།
ལྕམ་སྐུ་ལི་ས་སིངྒ་མཆོག
༄༅། །ཕྱི་ལོ་ ༢༠༡༣ ཟླ་ ༡༢ ཚེས་ ༡༠ རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་སྲུང་བརྩི་ཞུ་བ་དང་སྟབས་བསྟུན་ཨོ་སི་ཊོ་ལི་ཡའི་ Australiaགྲོས་ཚོགས་གོང་མའི་འཐུས་མི་ལྕམ་སྐུ་ལི་ས་སིངྒ་ Lisa Singh མཆོག་གིས་ཡུལ་དེའི་གྲོས་ཚོགས་གོང་མའི་ནང་བོད་ནང་དུ་རྒྱ་ནག་གཞུང་གི་དབང་བསྒྱུར་འོག་དཀའ་སྡུག་མྱོང་བཞིན་པའི་བོད་མི་རྣམས་ལ་རྒྱལ་སྤྱིའི་སྤྱི་ཚོགས་ཀྱིས་རྒྱབ་སྐྱོར་གནང་དགོས་པའི་རེ་འདུན་ཤུགས་ཆེ་བཏོན་ཡོད། ལྕམ་སྐུ་ལི་ས་སིངྒ་མཆོག་ནི་ཨོ་སི་ཊོ་ལི་ཡའི་གྲོས་ཚོགས་གོང་མའི་ནང་གྲོང་ཁྱེར་ཏ་སི་མ་ནི་ཡའི་ Tasmania འཐུས་མི་ཡིན་འདུག དེ་ཡང་ལྕམ་སྐུ་མཆོག་གིས་གྲོས་ཚོགས་གོང་མའི་ནང་སྤེལ་བའི་བསྒྲགས་གཏམ་ནང་འཁོད་དོན། སྔ་ལོ་ང་རང་རྡ་སར་ཕྱིན་པ་ཡིན། སྐབས་དེར་བོད་མི་སྐྱབས་བཅོལ་བ་ཚོའི་དཀའ་ངལ་རྣམས་དངོས་སུ་ཉམས་མྱོང་བྱུང་བ་དེའི་ཐོག་ནས་བོད་མི་ཚོའི་གནས་སྟངས་ཧ་ཅང་ཐབས་སྐྱོ་པོ་ཡིན་པ་ཙམ་མ་ཟད། གོ་ལའི་སྤྱི་ཚོགས་ནང་འགྲོ་བ་མིའི་ཐོབ་ཐང་ལ་བརྡལ་བཤིག་ཇི་འདྲ་གཏོང་བཞིན་ཡོད་པ་གསལ་རྟོགས་ཐུབ་རྒྱུར་ཕན་ཐོགས་ཧ་ཅང་བྱུང་། དེ་རིང་ཕྱེད་ཡོལ་ང་རང་བོད་མི་ཁག་གཅིག་དང་ལྷན་གྲོས་ཚོགས་ནང་བོད་དོན་རྒྱབ་སྐྱོར་ཞུ་ཆེད་ལས་འགུལ་ནང་མཉམ་ཞུགས་བྱ་རྒྱུའི་གོ་སྐབས་ཐོབ་བྱུང་། ཕྱི་ལོ་ ༢༠༡༣ ཟླ་ ༡༠ ཚེས་ ༢༢ ཉིན་འཛམ་གླིང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཁང་གིས་རྒྱ་ནག་གི་འགྲོ་བ་མིའི་ཐོབ་ཐང་ཐོག་དུས་བཀག་བསྐྱར་ཞིབ་གནང་ཡོད།
ད་ཐེངས་རྒྱ་ནག་ཐོག་བསྐྱར་ཞིབ་ཐེངས་གཉིས་པ་ཆགས་ཡོད། བསྐྱར་ཞིབ་དེས་སྔ་ལོ་ཕྱི་ལོ་ ༢༠༠༩ ལོར་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་སྐབས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུའི་ཁས་ལེན་དམ་བཅའ་རྣམས་དོན་འཁྱོལ་བྱས་མིན་ཐད་བསྐྱར་ཞིབ་ཐུབ་རྒྱུ་ཙམ་མ་ཟད། རྒྱ་ནག་ནང་གི་སྤྱི་ཡོངས་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཐོག་བསྐྱར་ཞིབ་བྱ་རྒྱུར་ཕན་ཐོགས་བྱུང་ཡོད། འོན་ཀྱང་བློ་ཕམ་པ་ཞིག་ལ་འདས་པའི་ལོ་བཞིའི་རིང་རྒྱ་ནག་ནང་གི་སྤྱི་ཡོངས་ཀྱི་འགྲོ་བ་མིའི་ཐོབ་ཐང་གི་གནས་སྟངས་དང་ལྷག་པར་བོད་དང་ཤིང་ཅང་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པའི་བློ་ཕམ་གྱི་གནས་ཚུལ་ཕྱོགས་ཡོངས་ནས་འཐོན་བཞིན་ཡོད།
བོད་མི་ཚོས་འཚེ་མེད་ཞི་བའི་ལམ་ནས་སྨྲ་བརྗོད་རང་དབང་དང་། ཆོས་དང་རིག་གཞུང་། མི་རིགས་ཀྱི་ངོ་བོ་སོགས་སྲུང་སྐྱོབ་ཆེད་འཐབ་རྩོད་གནང་དང་གནང་མུས་ཡིན།
ཕྱི་ལོ་ ༢༠༠༩ ལོར་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཁང་གིས་རྒྱ་ནག་གི་འགྲོ་བ་མིའི་ཐོབ་ཐང་དང་དེའི་གནས་སྟངས་ཐོག་དུས་བཀག་བསྐྱར་ཞིབ་ཐོག་མ་བྱས་རྗེས་བོད་མི་དགེ་འདུན་པ་རང་ལོ་ ༢༠ སོན་པ་བཀྲ་བྷེ་ལགས་ཀྱིས་རང་ལུས་མེར་སྲེག་བཏང་བའི་གནས་ཚུལ་བྱུང་ཡོད། དེ་ནི་རྒྱ་ནག་གཞུང་གིས་འདས་པའི་མི་ལོ་ ༦༠ རིང་བོད་མིའི་ཐོག་མུ་མཐུད་དམ་བསྒྲགས་དང་གཉའ་གནོན་བྱས་པའི་དུས་སྐབས་ནང་ཚབས་ཆེའི་ལས་འགུལ་སྤེལ་བ་ཐོག་མ་ཆགས་ཡོད། དེ་རྗེས་རང་སྲེག་ལས་འགུལ་སྤེལ་མཁན་མང་དུ་ཕྱིན་ནས་ད་ཆ་བོད་མི་ ༡༢༢ རང་སྲེག་ལས་འགུལ་སྤེལ་ཡོད། གྲངས་འབོར་འདི་ནི་ཉུང་ཉུང་ཞིག་རྩ་བ་ནས་མིན་པ་མ་ཟད། གྲངས་འབོར་འདིས་བོད་ནང་གི་གནས་སྟངས་འུ་ཐུག་དང་དམ་བསྒྲགས་ཇི་ཡོད་གསལ་རྟོགས་ཐུབ་རྒྱུ་ཡིན།
རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་ཐོག་དམ་བསྒྲགས་འཕར་མ་བྱས་པ་ནི་ཉེ་ལམ་འབྱོར་བའི་གནས་ཚུལ་ལྟར་ན།
རྒྱ་ནག་གཞུང་གིས་རང་ལུས་མེར་སྲེག་གཏོང་མཁན་ཚོ་དང་འབྲེལ་བ་ཡོད་ཚུལ་ལ་བསྙད་འདོགས་བྱས་ཏེ་ཁོང་ཚོའི་གྲོགས་པོ་དང་ནང་མི་སྤུན་མཆེད་རྣམས་འཛིན་བཟུང་བཀག་ཉར་ཐོག་དྲི་རྩད་བྱས་དང་བྱེད་མུས་རེད། བོད་མིའི་ཆོས་ཕྱོགས་ཀྱི་དབུ་ཁྲིད་༸སྐྱབས་མགོན་ཏཱ་ལའི་བླ་མ་མཆོག་གིས་བཙན་བྱོལ་ནང་བཞུགས་ནས་འཛམ་གླིང་ཕྱོགས་གང་སར་ཆིབས་སྒྱུར་བསྐྱངས་ཏེ་འཚེ་མེད་ཞི་བ་དང་བྱམས་བརྩེའི་བསླབ་བྱ་གོང་མཐོར་གཏོང་ཐབས་མཛད་བཞིན་ཡོད་པ་མ་ཟད། འཚེ་མེད་ཞི་བའི་ཐབས་ལམ་ཐོག་ནས་བོད་ཀྱི་བདེན་དོན་གསལ་ཐབས་མཛད་བཞིན་ཡོད། འདི་ལོར་ང་རང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཨོ་སི་ཊོ་ལི་ཡར་ཆིབས་སྒྱུར་སྐབས་སླར་ཡང་མཇལ་རྒྱུའི་གོ་སྐབས་ཐོབ་བྱུང་། ཁོང་གིས་འཚེ་མེད་ཞི་བའི་སྟོབས་ཤུགས་ལ་ཡིད་ཆེས་བློ་འགེལ་མཛད་ནས་འཚེ་བའི་ཐབས་ལམ་ལ་མཐའ་གཅིག་ཏུ་ངོ་རྒོལ་མཛད་ཡོད།
དེ་རིང་ནི་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ནས་མི་ལོ་ ༢༤ འཁོར་བའི་ཉིན་མོ་ཞིག་ཡིན། ཞེས་སོགས་ཀྱི་བསྒྲགས་གཏམ་སྤེལ་ཡོད།།
