༢༠༡༣ ཟླ་ ༡༡ ཚེས་ ༢༦ རེས་གཟའ་མིག་དམར།

ཞིབ་འཇུག་ལྷན་ཚོགས་Legatum Institute ལས་སྣེ་ལྷན་རྒྱས་མཇལ་འཕྲད་སྐབས་ཀྱི་འདྲ་པར། ༢༠༡༣།༡༡།༡༩

༄༅། །འདི་གར་བོད་མི་མང་སྤྱི་འཐུས་ལྷན་ཁང་གིས་ཕྱི་ལོ་ ༢༠༡༣ ཟླ་ ༡༡ ཚེས་ ༢༦ ཉིན་བཏང་གནས་ནང་འཁོད་དོན། རྒྱལ་སྤྱིའི་བོད་དོན་ལས་འགུལ་ཁང་ (ICT) གི་མཐུན་འགྱུར་འོག་ལས་འགུལ་ཁང་དང་འབྲེལ་ཡོད་ཨིན་ཡུལ་སྐུ་ཚབ་དོན་གཅོད་ཁང་གཉིས་ཀྱིས་མཉམ་འབྲེལ་ཐོག་ལས་རིམ་གོ་སྒྲིག་གནང་བ་གཞིར་བཟུང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཆོག་གིས་སྣེ་ཁྲིད་པའི་སྤྱི་འཐུས་ཞུ་གཏུག་ཚོགས་ཆུང་གིས་ཕྱི་ལོ་༢༠༡༣ ཟླ་༡༡ ཚེས་༡༨ ནས་༢༥ བར་ཨིན་ལན་གྱི་རྒྱལ་ས་ལོན་ཌོན་London ནང་ཞུ་གཏུག་གི་ལས་དོན་སྤེལ་ཡོད་འདུག ཞུ་གཏུག་ཞུ་ཡུལ་གྱི་མི་སྣ་གཙོ་བོ་ཨིན་ལན་གྲོས་ཚོགས་འོག་མའི་ཚོགས་གཙོ་མཆོག་ལ་མཇལ་འཕྲད་དང་།

ཨིན་ལན་གྲོས་ཚོགས་འོག་མའི་ཚོགས་གཙོ་མཆོག་ལ་མཇལ་བཅར་སྐབས།

དེ་བཞིན་གྲོས་ཚོགས་གོང་འོག་གི་འཐུས་མི་ཁག་ལ་སྔ་ཕྱི་ཐེངས་གསུམ། རྒྱལ་སྤྱིའི་གནད་དོན་སྣེ་མང་ཞིབ་འཇུག་སློབ་སྟོན་ལྷན་ཚོགས་ཁང་ Legatum Institute གི་ལས་སྣེ་ཚོགས་མི་༡༢ ཙམ་ལ་བཙན་བྱོལ་བོད་མིའི་སྒྲིག་འཛུགས་ཀྱི་མང་གཙོའི་འཕེལ་རིམ་དང་ད་ལྟའི་བོད་ནང་གི་ཛ་དྲག་གནས་སྟངས་སྙན་གསེང་དང་དྲི་བ་དྲིས་ལན་འཐུས་ཚང་ཞུས་པ་མ་ཟད།

ཨིན་ལན་བོད་དོན་རྒྱབ་སྐྱོར་ཚོགས་པའི་ལས་སྣེ་ལྷན་རྒྱས་མཇལ་འཕྲད་སྐབས་ཀྱི་འདྲ་པར། ༢༠༡༣།༡༡།༢༠

ཕྱི་སྲིད་ལས་ཁུངས་ཀྱི་རྒྱ་ནག་ཚན་པའི་ལས་སྣེ་ཁག་ལ་མཇལ་འཕྲད་ཀྱིས་ད་ལྟའི་བོད་ནང་གི་ཛ་དྲག་གནད་དོན་དང་བོད་ཐོག་འཛིན་པའི་སྲིད་བྱུས་ཐོག་གོ་བསྡུར་ཞིབ་ལྷུག་ཞུས་པ་དང་། བོད་དོན་དང་འབྲེལ་བའི་བགྲོ་གླེང་ཁག་གཅིག་དང་ས་གནས་བོད་རིགས་མི་མང་ལ་གཏམ་བཤད་བཅས་ཞུ་སྒོ་མཐའ་དག་གང་ཐུབ་ཞུས་ཡོད་འདུག

ཨིན་ལན་ཊི་གྲོས་ཚོགས་གོང་མའི་གྲོས་ཚོགས་འཐུས་མིར་བོད་དོན་ཞུ་གཏུག་གི་ཚོགས་འདུའི་སྐབས་ཀྱི་འདྲ་པར།༢༠༡༣།༡༡།༡༨

ཨིན་ཡུལ་རྒྱལ་ཁབ་ཀྱི་གྲོས་ཚོགས་ཚོགས་གཙོས་དབུས་ཞུ་གཏུག་ཞུ་ཡུལ་སྤྱི་སྒེར་ཚང་མས་ད་ལྟའི་བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་སྐྱེ་དང་ཐུགས་འཚབ་ཆེན་པོས་རྒྱབ་སྐྱོར་གྱི་རྣམ་པ་ཤུགས་ཆེར་བསྟན་པ་དང་།

ཨིན་ལན་བོད་རིགས་ཚོགས་པའི་གོ་སྒྲིག་འོག་སྤྱི་འཐུས་རྣམ་པ་དང་མི་མང་ལྷན་འཛོམས་གནང་བཞིན་པ། ༢༠༡༣།༡༡།༢༢

དབུ་མའི་ལམ་གྱི་སྲིད་བྱུས་དང་འཚེ་མེད་ཞི་བའི་ཐབས་ལམ་ལ་བརྟེན་ནས་བོད་རྒྱའི་དཀའ་ངལ་སེལ་ཐབས་ལ་རྒྱབ་སྐྱོར་དང་རོགས་འདེགས་ཀྱི་རྣམ་པ་གསལ་བོར་བསྟན་ཡོད་འདུག ཟླ་འདིའི་ཕྱི་ཚེས་ ༢༥ ཉིན་ཐེངས་འདིའི་ཞུ་གཏུག་གི་ལས་འཆར་ཡོངས་སུ་གྲུབ་སྟེ་རྒྱ་གར་དུ་ཕེབས་འདུག་པ་བཅས།།