༢༠༡༣ ཟླ་ ༡༡ ཚེས་ ༤ རེས་གཟའ་ཟླ་བ།
༄༅། །ཉེ་ལམ་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་ནས་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་ཐོག་དུས་བཀག་བསྐྱར་ཞིབ་གནང་བའི་མཇུག་འབྲས་དང་། རིང་མིན་འཛམ་གླིང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཁང་ནང་རྒྱ་ནག་གཞུང་འཛུལ་ཞུགས་བྱེད་ཆེད་འོས་བསྡུའི་ནང་མཉམ་ཞུགས་བྱ་རྒྱུའི་དུས་སྐབས་འདིར། རྒྱ་ནག་གཞུང་གིས་བོད་ནང་༸གོང་ས་མཆོག་གི་བཀའ་སློབ་སོགས་ལ་དམ་བསྒྲགས་བྱེད་ཤུགས་ཆེ་རུ་གཏོང་བཞིན་པ་ནི་ཧ་ཅང་བློ་ཕམ་བྱེད་འོས་པ་ཞིག་ཡིན། ཞེས་བོད་མིའི་སྒྲིག་འཛུགས་ཀྱི་གསར་འགོད་གསལ་བསྒྲགས་ཤིག་སྤེལ་ཡོད། གསལ་བསྒྲགས་ནང་མུ་མཐུད་དོན།
ཕྱི་ལོ་ ༢༠༡༣ ཟླ་ ༡༡ ཚེས་ ༡ ཉིན་བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་ཁྲན་ཆོ་གོ་ཡིས་རྒྱ་ནག་གུང་ཁྲན་ཚོགས་པའི་གསར་ཤོག་ཁུ་ཤི་ (Qiushi) ཟེར་བའི་ནང་བོད་ནང་དུ་རླུང་འཕྲིན་དང་བརྙན་འཕྲིན་སོགས་བརྒྱུད་ནས་ ༸གོང་ས་མཆོག་གི་བཀའ་སློབ་ལ་བོད་མི་ཚོས་ལྟ་ཉན་བྱ་རྒྱུར་དམ་བསྒྲགས་བཀག་འགོག་བྱ་རྒྱུ་ཡིན་པའི་གསལ་བསྒྲགས་བྱས་འདུག རྒྱ་ནག་གཞུང་གིས་རྒྱ་ནག་ནང་དུ་འགྲོ་བ་མིའི་ཐོབ་ཐང་གི་གནས་སྟངས་ལེགས་པོ་ཡོད་སྐོར་བརྗོད་བཞིན་པའི་སྐབས་འདིར་བསྒྲགས་གཏམ་འདི་ལྟ་བུ་སྤེལ་བ་ནི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཁས་ལེན་དང་ཡོངས་སུ་རྒྱབ་བརྒལ་ཞིག་ཆགས་ཡོད།
༸གོང་ས་༸སྐྱབས་མགོན་ཆེན་པོ་མཆོག་གིས་བོད་རྒྱ་མི་རིགས་གཉིས་སྨན་ཆེད་དབུ་མའི་ལམ་གྱི་སྲིད་བྱུས་འོག་རྒྱ་ནག་གི་ཆ་ཤས་སུ་གནས་ནས་ཡུན་རིང་ལུས་པའི་བོད་ཀྱི་དཀའ་ངལ་སེལ་རྒྱུར་རྒྱབ་སྐྱོར་ཤུགས་ཆེ་མཛད་བཞིན་ཡོད། ༸གོང་ས་མཆོག་གིས་ཞེངས་ཕྱོགས་དེར་རྒྱ་གར་ནང་རྟེན་གཞི་བྱས་པའི་བོད་མིའི་སྒྲིག་འཛུགས་ནས་ཀྱང་རྒྱབ་སྐྱོར་ཞུ་བཞིན་ཡོད།
དེ་ཡང་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་གསུང་དོན། རྒྱ་ནག་གཞུང་གིས་བོད་ནང་དུ་གསར་འགྱུར་རང་དབང་ལ་དམ་བསྒྲགས་ཇེ་ཤུགས་ཆེ་རུ་གཏོང་རྒྱུའི་སྲིད་བྱུས་དེ་ནི་གཞིས་བཞུགས་བོད་མིའི་སེམས་ལ་ཁོང་ཁྲོ་ཆེ་རུ་གཏོང་རྒྱུ་ཡིན་པར་བརྟེན་ཕན་ལས་གནོད་ཆེ་བའི་སྲིད་བྱུས་ཤིག་ཡིན། སྲིད་བྱུས་དེ་རིགས་ཀྱིས་བོད་ནང་གི་རྒྱ་ནག་དཔོན་རིགས་ཚོས་བོད་མིའི་ཐོག་གང་བྱུང་དྲག་གནོན་བྱ་རྒྱུའི་ཐོབ་ཐང་ལེན་རྒྱུ་ཡིན་པར་བརྟེན་ང་ཚོར་ཧ་ཅང་སེམས་ཚབ་ཡོང་བཞིན་འདུག ཅེས་གསུངས་ཡོད་པ་བཅས།།
