༢༠༡༣ ཟླ་ ༡༡ ཚེས་ ༡ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༡༡ ཚེས་ ༡ ཞོགས་པ་ཆུ་ཚོད་ ༡༠ ཐོག ཆེས་མཐོའི་ཁྲིམས་ཞིབ་ཁང་གི་ཚོགས་ཁང་དུ་དཔལ་ལྡན་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གི་མདུན་ཉེ་ལམ་ཐད་བསྐོས་གནང་བའི་ས་གནས་ཁྲིམས་ཞིབ་པ་རྣམ་རྒྱལ་ཚེ་སྐྱིད་ལགས་དང་། ལྷ་འབྲུག་ལགས་གཉིས་ནས་ལས་ཁུར་དམ་བཅའ་འབུལ་བཞེས་ཀྱི་མཛད་སྒོ་ཞིག་ཚོགས་ཡོད།
དམ་འབུལ་མཛད་སྒོའི་ཐོག་ཁྲིམས་ཞིབ་པ་ཆེ་བ་མཆོག་གིས་ངོ་སྤྲོད་གནང་བ་ལྟར་ན། ཆེས་མཐོའི་ཁྲིམས་ཞིབ་ཁང་ནས་ཉེ་ཆར་ཡོངས་ཁྱབ་གསལ་བསྒྲགས་ཀྱི་ལམ་ནས་ས་གནས་ཁྲིམས་ཞིབ་པ་གསུམ་ཐད་བསྐོའི་འདེམས་རྒྱུགས་བླངས་ཏེ། རྣམ་རྒྱལ་ཚེ་སྐྱིད་ལགས་དང་། ལྷ་འབྲུག་ལགས། བཀྲ་ཤིས་དབང་འདུས་ལགས་གསུམ་རྒྱུགས་འཕྲོད་བྱུང་ཡོད་པ་དང་། རྣམ་རྒྱལ་ཚེ་སྐྱིད་ལགས་བྱང་ཕྱོགས་བོད་མིའི་ས་གནས་ཁྲིམས་ཞིབ་པ་དང་། ལྷ་འབྲུག་ལགས་ཤར་ཕྱོགས་བོད་མིའི་ས་གནས་ཁྲིམས་ཞིབ་པའི་ལས་འགན་བཀོད་སྒྲིག་གནང་ཡོད་ཅིང་། དེ་རིང་དམ་འབུལ་ཞུས་པའི་ས་གནས་ཁྲིམས་ཞིབ་པ་གཉིས་ཀ་ཁྲིམས་ལུགས་རིག་པའི་སློབ་ཐོན་པ་ཡིན་ཅིང་། དེ་ནི་ས་གནས་ཁྲིམས་ཞིབ་ཁང་དུ་ཁྲིམས་ལུགས་ཆེད་སྦྱོང་བ་ཐད་བསྐོས་གནང་བ་ཐོག་མ་དེ་ཡིན་འདུག
བྱང་ཕྱོགས་བོད་མིའི་ས་གནས་ཁྲིམས་ཞིབ་པ་རྣམ་རྒྱལ་ཚེ་སྐྱིད་ལགས།
འཛིན་རིམ་བཅུ་གཉིས་བར་སྦེལ་ཀོབ་གཞིས་ཆགས་སུ་ཡོད་པའི་དབུས་བོད་མིའི་གཏན་སློབ་ཏུ་སློབ་སྦྱོང་བྱས། ཕྱི་ལོ་ ༢༠༠༠ ལོར་ JSS Law College Mysore ནས་ LLB ཐོན་རྗེས། ༢༠༠༢ ལོར་ Mysore University ནས་རྒྱལ་སྤྱིའི་ཁྲིམས་ལུགས་ཁོངས་ཚོང་འབྲེལ་ཁྲིམས་ལུགས་ཐོག་ LLM ཐོན། ཕྱི་ལོ་ ༢༠༠༢ ཟླ་ ༨ པ་ནས་ ༢༠༠༦ ཟླ་ ༧ པ་བར་ཆེས་མཐོའི་ཁྲིམས་ཞིབ་ཁང་དུ་ཉམས་ཞིབ་དང་ཡིག་བསྒྱུར། དེ་བཞིན་ཁ་མཆུའི་ཉན་ཞིབ་སྐབས་གཟུ་དཔང་བཅས་ཁྲིམས་དོན་ལས་གནས་འདྲ་མིན་ཐོག་ལས་ཞུགས་དང། ཕྱི་ལོ་ ༢༠༠༥ ཟླ་ ༡༠ ནས་ ༢༠༠༦ ཟླ་ ༤ བར་བོད་མིའི་སྒྲིག་འཛུགས་ཀྱི་ཁྲིམས་རྩོད་པ་སྐུ་ཞབས་མུ་ཁྱེ་སར་ཟླ་དྲུག་རིང་ཁྲིམས་རྩོད་པའི་ཉམས་གསོག་དང་འབྲེལ་ Delhi Bar Council ནས་ཁྲིམས་རྩོད་པའི་ལག་ཁྱེར་ཞུས་ཐོབ་བྱུང་ཡོད།
ཕྱི་ལོ་ ༢༠༠༦ ཟླ་ ༨ པའི་ནང་ཤེས་རིག་ལས་ཁུངས་ཀྱི་ཨ་རི་བོད་མིའི་སློབ་ཡོན་ལས་འཆར་ཁོངས་འདེམས་ཐོན་བྱུང་སྟེ། ཨ་རིའི་རྒྱལ་ས་ཝ་ཤིང་ཊོན་དུ་ལོ་གཉིས་རིང་ American University ནས་རྒྱལ་སྤྱིའི་ཁྲིམས་ལུགས་ཐོག་ LLM ལེགས་ཐོན་བྱུང་རྗེས་རྒྱ་གར་དུ་ཕྱིར་ལོག་གིས་ ཕྱི་ལོ་ ༢༠༠༨ ཟླ་ ༩ པ་ནས་ ༢༠༡༠ ཟླ་ ༡༡ བར་སླར་ཡང་ཆེས་མཐོའི་ཁྲིམས་ཞིབ་ཁང་དུ་དྲུང་གཞོན་ལས་རོགས་དང་དེ་རྗེས་དྲུང་གཞོན་གནས་རིམ་ཐོག་ཡུལ་ཁྲིམས་སློབ་སྟོན་པའི་ཕྱག་ལས་གནང་མུར། ཕྱི་ལོ་ ༢༠༡༠ ཟླ་ ༡༡ ཚེས་ ༡༨ ནས་ལྷོ་ཕྱོགས་བོད་མིའི་ས་གནས་ཁྲིམས་ཞིབ་པར་བསྐོ་གཞག་གནང་སྟེ་ ༢༠༡༣ ཟླ་ ༡༠ ཚེས་ ༡༨ བར་ཞབས་འདེགས་ཞུས། །
ཤར་ཕྱོགས་བོད་མིའི་ས་གནས་ཁྲིམས་ཞིབ་པ་ལྷ་འབྲུག་ལགས།
ཕྱི་ལོ་ ༡༩༨༣ ལོར་བོད་མདོ་སྨད་དཔའ་ལུང་རྫོང་ཨར་ཐང་དགེ་ཕྱུག་སྡེ་བ་རུ་སྐྱེས། ཕྱི་ལོ་ ༡༩༩༨ ལོར་དཔའ་ལུང་རྫོང་མི་རིགས་སློབ་འབྲིང་ནས་དམའ་འབྲིང་མཐར་ཕྱིན། ཕྱི་ལོ་ ༡༩༩༩ ལོར་རྒྱ་གར་ལ་འབྱོར་ནས་སུ་ཇ་བོད་ཁྱིམ་དུ་འཛུལ་ཞུགས་ཀྱིས་ཕྱི་ལོ་ ༢༠༠༦ ལོར་འཛིན་རིམ་བཅུ་པ་མཐར་སོན། ཕྱི་ལོ་ ༢༠༠༨ ལོར་གྷོ་པལ་པཱུར་བོད་ཁྱིམ་དུ་འཛིན་རིམ་བཅུ་གཉིས་མཐར་སོན། ཕྱི་ལོ་ ༢༠༡༠ ལོར་ལྷོ་ཕྱོགས་བོད་མིའི་ས་གནས་ཁྲིམས་ཞིབ་ཁང་དུ་བཙན་བྱོལ་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པའི་སྦྱོང་བརྡར་ཐེངས་གཉིས་པའི་ནང་མཉམ་ཞུགས་བྱས་ཏེ་བཙན་བྱོལ་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པའི་ལག་འཁྱེར་ཐོབ། དེ་ནས་མཻ་སོར་JSS Law College ནས་རྒྱ་གར་གྱི་ཡུལ་ཁྲིམས་སློབ་སྦྱོང་ལོ་ལྔ་བྱས་ཏེ་ཕྱི་ལོ་ ༢༠༡༣ ལོར་ཁྲིམས་ལུགས་རབ་འབྱམས་བའི་ལག་འཁྱེར་(LL.B)ཐོབ། ཕྱི་ལོ་ ༢༠༡༣ ལོར་ཟླ༌ ༧ ཚེས་༢༢ ཉིན་ནས་ཆེས་མཐོའི་ཁྲིམས་ཞིབ་ཁང་དུ་ཆོད་གན་སྡེ་འགན་གནས་རིམ་ཐོག་བསྐོ་གཞག་གིས་ལས་དོན་བྱེད་མུར། ས་གནས་ཁྲིམས་ཞིབ་པ་ཐད་བསྐོའི་འདེམས་རྒྱུགས་སུ་རྒྱུགས་འཕྲོད་བྱུང་སྟེ་ཤར་ཕྱོགས་ས་གནས་ཁྲིམས་ཞིབ་པར་བསྐོ་གཞག་བསྩལ། །
