༢༠༡༣ ཟླ་ ༡༡ ཚེས་ ༢༩ རེས་གཟའ་པ་སངས།

༄༅། །རྒྱ་གར་གསར་ཤོག་ཧིན་དྷུའི་ནང་གནས་ཚུལ་སྤེལ་གསལ་ལྟར་ན་ཕྱི་ལོ་ ༢༠༡༤ ཟླ་ ༡ ཚེས་ ༡༤ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ཆ་ཏི་སི་གྷར་མངའ་སྡེའི་གཞུང་གིས་གདན་ཞུས་ལྟར་ཆིབས་སྒྱུར་བསྐྱངས་སྟེ་མངའ་སྡེའི་གྲོང་ཁྱེར་སིར་པུར་ Sirpur ཞེས་པར་ཞི་བདེའི་ལྷན་ཚོགས་ཤིག་དབུ་འབྱེད་མཛད་རྒྱུ་ཡིན་འདུག སྤྱིར་བཏང་སིར་པུར་གྲོང་ཁྱེར་ནང་གནའ་བོའི་ནང་པ་དང་ཧིན་དྷུའི་དགོན་པ་དང་ལྷ་ཁང་སོགས་ཀྱིས་གཙོས་ཅ་དངོས་ཤུལ་རྫས་མང་པོ་ཞིག་ས་འོག་ནས་རྙེད་སོན་བྱུང་ཡོད། སིར་པུར་གྲོང་ཁྱེར་ནི་མངའ་སྡེའི་རྒྱལ་ས་རའི་པུར་ནས་རྒྱང་ཐག་སྤྱི་ལེ་ ༡༠༠ ཙམ་ཡོད་འདུག ཁ་རྒྱུན་ལྟར་ན་ཁུལ་དེར་ཧིན་དུའི་ལྷ་དགའ་བྱེད་རམ་ Lord Ram མཆོག་བཙན་བྱོལ་སྐབས་བཞུགས་མྱོང་ཡོད་པ་དང་། དེང་སྐབས་ཁུལ་དེར་ནང་པའི་ལྷ་ཁང་བརྒྱད་ཡོད་འདུག ཁུལ་དེར་༸གོང་ས་མཆོག་སྔ་ལོར་ཐེངས་གཅིག་ཆིབས་སྒྱུར་བསྐྱངས་ཡོད།

དེ་ཡང་མངའ་སྡེའི་ཡུལ་སྐོར་སྤྲོ་འཆམ་ལས་ཁུངས་ཀྱི་འཛིན་སྐྱོང་འགན་འཛིན་ Chhattisgarh Tourism Board སྐུ་ཞབས་སན་ཏོ་ཤི་མི་ཤི་ར་ Santosh Mishra ལགས་ཀྱིས་༸གོང་ས་མཆོག་ཁུལ་དེར་ཆིབས་སྒྱུར་དང་འབྲེལ་ནས་གསུང་དོན། ༸སྐྱབས་མགོན་ཏཱ་ལའི་བླ་མ་མཆོག་སྔ་ལོར་ཆིབས་སྒྱུར་བསྐྱངས་རྗེས་ཐུགས་ཧ་ཅང་དགྱེས་ཚོར་བྱུང་བར་བརྟེན་འབྱུང་འགྱུར་སླར་ཡང་ཁུལ་འདིར་ཆིབས་སྒྱུར་བསྐྱང་རྒྱུའི་ཞལ་བཞེས་ཐོབ་བྱུང་བ་མ་ཟད། ད་ཐེངས་ཆིབས་སྒྱུར་སྐབས་༸གོང་ས་ཏཱ་ལའི་བླ་མ་མཆོག་གིས་ཁུལ་འདིར་ཀླུ་སྒྲུབ་བྲག་ཕུག་ནང་སྒོམ་སྒྲུབ་མཛད་རྒྱུའི་ཐུགས་འདོད་མཛད་ཡོད། ཞི་བདེའི་ལྷན་ཚོགས་གོ་སྒྲིག་ཞུ་མཁན་མངའ་སྡེའི་ཡུལ་སྐོར་སྤྲོ་འཆམ་ལས་ཁུངས་དང་པཎྜི་ཏ་ར་ཝི་ཤང་ཀར་ཤུག་ལའི་གཙུག་ལག་སློབ་ཁང་། Pandit Ravishankar Shukla Universityདེ་བཞིན་ཏཱ་ལའི་བླ་མའི་ཚོགས་པ་བཅས་ཡིན་འདུག