༢༠༡༣ ཟླ་ ༡༡ ཚེས་ ༢༢ རེས་གཟའ་པ་སངས།
༄༅། །འདི་གའི་ཆེད་གཉེར་གསར་འགོད་པ་པདྨ་ཚེ་རིང་ལགས་ཀྱིས་བཏང་གནས་ནང་འཁོད་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༣ ཟླ་ ༡༡ ཚེས་ ༢༡ ཉིན་ཉི་ཧོང་གི་རྒྱལ་ས་ཊོག་ཁྱོའི་བཞུགས་གནས་མགྲོན་ཁང་རོ་ཡལ་པརྐ་ Royal Park ཞེས་པར་སྔ་དྲོ་ལྕམ་སྐུ་ཡོ་ཤི་ཀོ་ས་ཀུ་རའི་ Mrs. Yoshiko Sakurai ལགས་ཀྱིས་ཆུ་ཚོད་གཅིག་རིང་ཆེད་དོན་དྲི་བར་བཀའ་ལན་མཛད་པ་དང་། དེ་ནས་ཉི་ཧོང་ནང་གི་ཇ་དང་ཤིང་ཏོག་ཚུ་ལུ་མའི་ཐོན་ཁུངས་ལྟེ་བ་ཡིན་པའི་ཤི་ཛུ་ཀ་ Shizuoka གྲོང་ཁྱེར་དུ་རྒྱུན་རིང་ནས་བོད་དོན་ཐོག་ཁ་ཞེ་གཉིས་མེད་ཀྱིས་རྒྱབ་སྐྱོར་གནང་མཁན་ཉི་ཧོང་གྲོས་ཚོགས་འཐུས་མི་ཟུར་པ་སྐུ་ཞབས་སི་ཤུ་མ་ཀི་ནོ་ Mr. Seishu Makino ལགས་ཀྱིས་དབུས་པའི་བོད་སྐྱོབས་ Save Tibet ཚོགས་པས་ གོ་སྒྲིག་འོག་མང་ཚོགས་ ༡༠༠༠ མ་ཟིན་ཙམ་ལ། དུས་རབས་ ༢༡ པ་འདི་ཞི་བདེའི་དུས་རབས་ཤིག་ཏུ་བསྐྲུན་རྒྱུ། Shift to a Peaceful 21st Century” ཞེས་པའི་བརྗོད་གཞིའི་ཐོག་བཀའ་སློབ་སྩལ་ཡོད།
ཤི་ཛུ་ཀ་གྲོང་ཁྱེར་གྱི་སྤྱི་ཁྱབ་པ་མཆོག་དང་ལྷན།
དེ་ཉིན་མཛད་འཕྲིན་གྱི་ཐོག་མར་ཉི་ཧོང་ནང་སྙན་གྲགས་ཡོད་པ་ལྕམ་སྐུ་ཡོ་ཤི་ཀོ་ས་ཀུ་རའི་ལགས་ཀྱིས་བྱམས་བརྩེ་དང་བཟང་སྤྱོད་གོང་མཐོར་གཏོང་རྒྱུ་དང་། དེ་བཞིན་བོད་ནང་གི་རང་ལུས་མེར་སྲེག་སྐོར་སོགས་གནད་དོན་འདྲ་མིན་སྐོར་ཆུ་ཚོད་གཅིག་ཙམ་རིང་བཅར་འདྲིར་དང་ལེན་མཛད་གྲུབ་མཚམས་ཤི་ཛུ་ཀ་ཕྱོགས་སུ་ཆིབས་སྒྱུར་བསྐྱངས། ཁུལ་དེར་༸ཞབས་སོར་འཁོད་མཚམས་མེ་འཁོར་འབབས་ཚུགས་དང་བཀའ་སློབ་སྩལ་ཡུལ་སེན་ཆུ་རི་མགྲོན་ཁང་ Century Hotel སོ་སོའི་མདུན་དུ་བོད་ཀྱི་གྲོགས་པོ་ཉི་ཧོང་གྲོས་ཚོགས་འཐུས་མི་ཟུར་པ་སྐུ་ཞབས་སི་ཤུ་མ་ཀི་ནོ་མཆོག་དང་ཁོང་རང་ཉིད་ཀྱི་འབྲེལ་ཡོད་ནང་མི་དང་བོད་སྐྱོབས་ཚོགས་པའི་ཚོགས་མི་དང་བོད་རིགས། དེ་བཞིན་ཉི་ཧོང་བ་བཅས་ཀྱིས་༸གོང་ས་མཆོག་ལ་ཕེབས་བསུ་གཟབ་རྒྱས་ཞུས་ཡོད། མགྲོན་ཁང་དེར་༸གོང་ས་མཆོག་གིས་ཉིན་གུང་ལྗགས་སྨིན་གྲོས་ཚོགས་འཐུས་མི་ཁོང་དང་ཕྱག་རོགས་ཁག་གཅིག་བཅས་དང་ལྷན་བཞེས་མཛད། དེ་རྗེས་ཉི་ཧོང་བ་གཙོ་བོར་གྱུར་བའི་བོད་རིགས་དང་། རྒྱ་རིགས་སོགས་མང་ཚོགས་རྣམས་ལ་དུས་རབས་ ༢༡ པ་འདི་ཞི་བདེ་ལྡན་པའི་དུས་རབས་ཤིག་ཏུ་བསྐྲུན་རྒྱུ། ཞེས་པའི་བརྗོད་གཞིའི་ཐོག་བཀའ་སློབ་སྩལ།
སྐབས་དེར་༸གོང་ས་མཆོག་གིས་གྲོས་ཚོགས་འཐུས་མི་ཟུར་པ་སྐུ་ཞབས་སི་ཤུ་མ་ཀི་ནོ་ Mr. Seishu Makino ལགས་ནི་གང་ཉིད་ཀྱི་ཐུགས་ཉེ་བའི་གྲོགས་པོ་ཞིག་ཡིན་སྐོར་བཀའ་སློབ་སྩལ་བ་དང་སྦྲགས། གྲོས་ཚོགས་འཐུས་མི་ཁོང་དང་འདྲ་བའི་བོད་དོན་རྒྱབ་སྐྱོར་གནང་མཁན་རྣམས་ནི་དཔལ་འབྱོར་གྱི་ཁེ་ཕན་ལ་གཟིགས་པ་མ་ཡིན་པར་སེམས་གཏིང་ནས་འགྲོ་བ་མིར་བརྩེ་སེམས་བཅང་པའི་ཐོག་བདེན་པར་རྒྱབ་སྐྱོར་གནང་བ་ཞིག་ཡིན་ཞེས་ཁོང་རྣམ་པས་རྒྱབ་སྐྱོར་ལ་བསྔགས་བརྗོད་མཛད། དེ་རྗེས་བརྗོད་གཞི་དང་འབྲེལ་འགྲོ་བ་མི་དུང་ཕྱུར་༧༠ ཡོད་པ་ཚང་མ་གང་གི་ཐད་ནས་གཅིག་མཚུངས་ཡིན་པ་དང་། ད་བར་གང་ཉིད་མཆོག་གི་སྐུ་ཚེའི་དུས་སྐབས་འདིར་དམག་འཁྲུག་རིམ་པ་བྱུང་ཡོད་པ་ནི་ཉི་ཧོང་དང་རྒྱ་ནག ཨ་རིས་ཉི་ཧོང་གི་ཧི་རོ་ཤི་མ་དང་ན་གྷ་སྰ་ཀི་གཉིས་སུ་རྡུལ་ཕྲན་གཏོར་རྒོལ་ཚབས་ཆེ་བཏང་བ་དང་། དེ་བཞིན་ཀོ་རི་ཡ། ཝི་ཏི་ནམ་བཅས་སུ་འཚེ་བའི་བྱ་སྤྱོད་འོག་མི་ཁྱོན་ས་ཡ་ ༢༠༠ ལྷག་འདས་གྲོངས་སུ་གྱུར་ཡོད་པ་མ་ཟད། ད་ལྟའི་དུས་སྐབས་སུའང་གནས་ཚུལ་དེས་རྐྱེན་པས་དཀའ་ངལ་འཕྲད་བཞིན་པ་མཐོང་རྒྱུ་ཡོད། དེ་མིན་ཁོར་ཡུག་ཐོག་ལའང་གནོད་སྐྱོན་ཚབས་ཆེ་བཟོས་ཡོད། ཨི་རག་དང་ཨཕ་གྷ་ནི་སི་ཐྰན། དེ་བཞིན་ད་ལྟ་སི་རི་ཡ་བཅས་སུ་དཀའ་ངལ་དེ་ལྟར་འཕྲད་བཞིན་ཡོད་པ་དང་། གནས་ཚུལ་དེའི་འོག་བྱིས་པ་མང་པོ་ཕ་མ་ནས་བྲལ་ཏེ་དྭ་ཕྲུག་ཏུ་འགྱུར་ཡོད་པ་དེ་འབྱུང་ཁུངས་ངོ་མ་དུས་རབས་༢༠ པ་འཚེ་བའི་དུས་རབས་ནས་བྱུང་བ་ཞིག་ཡིན། དེར་བརྟེན་དཀའ་ངལ་ནམ་འཕྲད་སྐབས་འཚེ་བའི་
བྱ་སྤྱོད་མ་ཡིན་པར་ཐབས་ལམ་ཡག་ཤོས་གཅིག་གི་གཅིག་ལ་གྲོས་མོལ་གྱི་ལམ་ནས་དཀའ་ངལ་སེལ་ཐབས་བརྒྱུད་དུས་རབས་ ༢༡ པ་དེ་འཚེ་མེད་ཞི་བའི་དུས་རབས་ཤིག་ཏུ་བསྐྲུན་རྒྱུར་འབད་བརྩོན་བྱེད་དགོས་པ་དང་། ཞི་བའི་དུས་རབས་དེ་འདྲ་ཡོང་བར་ཆོ་ག་ཕྱག་ལེན་གྱི་འགྲིག་གི་མེད་པ་དང་། དེ་ལྟར་ཡོང་རྒྱུའི་ཆེད་མི་རེ་ངོ་རེ་དང་རྒྱལ་ཁབ་སོ་སོས་རྒྱ་ཆེ་ས་ནས་གོ་ལ་སྤྱི་ཡོངས་ཐོག་ཕན་ཚུན་གཅིག་འགྱུར་གྱི་འདུ་ཤེས་འཛིན་ཚེ་གཅིག་གིས་གཅིག་ལ་དབང་ཡོད་དང་མགོ་སྐོར་གཏོང་རྒྱུའི་གཞི་རྩ་གང་ཡང་ལྷག་རྒྱུ་མེད་སྐོར་བཀའ་སློབ་སྩལ་ཡོད།
དེ་བཞིན་༸གོང་ས་མཆོག་གིས་ཨ་རི་དང་ཉི་ཧོང་སོགས་རྒྱལ་ཁབ་ཕལ་ཆེ་བའི་ནང་དབུལ་ཕྱུག་གི་ཁྱད་པར་དང་། རྒྱལ་ཁབ་སྐྱོ་བ་ཁག་གཅིག་ལ་ཟས་བཅུད་མི་འདང་བའི་གནད་དོན་དེ་ཚོའི་སྐོར་ལའང་བཀའ་སློབ་ཁག་གཅིག་དང་། དེང་དུས་ཀྱི་ཤེས་ཡོན་སློབ་ཚན་ནང་ཆོས་ལུགས་དང་མ་འདྲེས་པའི་ཡ་རབས་བཟང་སྤྱོད་གོང་མཐོར་གཏོང་རྒྱུ་ཤིན་ཏུ་ནས་གལ་ཆེ་ཡིན་སྐོར་བཅས་བཀའ་སློབ་སྩལ་གྲུབ་མཚམས། ཚོགས་བཅར་བ་
རྣམས་ཀྱིས་བྱམས་སྙིང་རྗེ་དང་བཟང་སྤྱོད་ལྡན་པའི་སྤྱི་ཚོགས་གང་འདྲ་ཞིག་བསྐྲུན་ཐུབ་མིན། དེ་བཞིན་དོན་དམ་གྱི་ཞི་བདེ་ཉམས་ལེན་གང་འདྲ་བྱེད་དགོས་མིན་སྐོར་སོགས་ཀྱི་དྲི་བར་བཀའ་ལན་ཟབ་རྒྱས་སྩལ། མཛད་རིམ་ལྟར་ན་སང་ཉིན་ཉི་ཧོང་གི་གནས་རི་རྩ་ཆེན་ཞིག་ཏུ་ངོས་འཛིན་བྱ་ཡུལ་སྙན་གྲགས་ཅན་གྱི་ Mt. Fuji ཕྱོགས་སུ་ཞལ་གཟིགས་ནས་འཛམ་གླིང་ཡོངས་ལ་ཞི་བདེ་ཡོང་ཆེད་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་ཆོས་ལུགས་འདྲ་མིན་གྱི་དབུ་ཁྲིད་རྣམ་པ་ལྷན་འཛོམས་ཀྱིས་སྨོན་ལམ་གསུང་འདོན་གནང་རྒྱུ་རེད་འདུག དེ་རིང་དང་སང་ཉིན་ཉིན་གཉིས་ཀྱི་མཛད་རིམ་དེ་ནི་བོད་སྐྱོབས་ཚོགས་པས་གོ་སྒྲིག་ཞུས་པ་ཞིག་ཡིན་འདུག་པ་བཅས།།
