༢༠༡༣ ཟླ་ ༡༡ ཚེས་ ༡༨ རེས་གཟའ་ཟླ་བ།
སྙིང་སྟོབས་ནམ་ཡང་མ་ཞུམ། ཞེས་པའི་གླུ་གཞས་བཏང་གྲུབ་རྗེས་༸གོང་ས་མཆོག་གིས་ཕྱག་བྱུག་མཛད་བཞིན་པ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རེས་གཟའ་ཉི་མའི་ཉིན་ཉི་ཧོང་གི་རྒྱལ་ས་ཊོག་ཁྱོའི་ནང་དུ་རྟེན་གཞི་བྱས་པའི་ཨོ་ཀུ་ར་མགྲོན་ཁང་ Hotel Okura ནང་ཚན་རིག་པ་ཁག་གཅིག་དང་ལྷན་དུ་བགྲོ་གླེང་མཛད་ཡོད། མཛད་འཆར་འདི་ནི་ཉི་ཧོང་བོད་མིའི་སྐུ་ཚབ་དོན་གཅོད་ཁང་གིས་གོ་སྒྲིག་ཞུས་པ་ཞིག་རེད་འདུག ཚན་རིག་དང་འབྲེལ་བའི་བགྲོ་གླེང་དེའི་བརྗོད་གཞི་ནི། འཇིག་རྟེན་དང་། ཚེ་སྲོག ཤེས་ཡོན་ The Universe, Life and Education སྐོར་རེད་འདུག མཛད་སྒོ་གཙོ་སྐྱོང་ཉི་ཧོང་གི་བརྙན་འཕྲིན་ལས་རིམ་གཙོ་སྐྱོང་བ་དང་གསར་འགོད་པ་སྙན་གྲགས་ཅན་སྐུ་ཞབས་་ཨི་ཀི་གྷ་མི་ ཨ་ཀི་ར་ Prof. Ikegami Akira ལགས་དང་། བཀའ་སློབ་དང་གཏམ་བཤད་གནང་མཁན་༸གོང་ས་༸སྐྱབས་མགོན་ཆེན་པོ་མཆོག་གཙོ་བོ་དང་། གཞན་ཉི་ཧོང་ནང་གི་ཚན་རིག་དང་འཕྲུལ་རིགས། ཆོས་ཕྱོགས་སློབ་གཉེར། གཟའ་སྐར་དཔྱད་རིག་ཞིབ་འཇུག་ཁང་སོགས་སྡེ་ཁག་འདྲ་མིན་ནས་ཉམས་ཞིབ་པ་དང་ངེས་སྟོན་པ། ཚན་རིག་པ། སློབ་དཔོན་སོགས་མི་སྣ་ཁག་གཅིག་ལྷན་འཛོམས་གནང་འདུག
མཛད་སྒོའི་དམིགས་བསལ་སྐུ་མགྲོན་དུ་ཀོ་ཡྰ་སན་ Koyasan Monastery ནང་པའི་དགོན་པའི་མཁན་རིན་པོ་ཆེ་མཆོག་ཆེད་ཕེབས་གནང་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་ཚན་རིག་པ་དང་ལྷན་དུ་ལོ་ངོ་སུམ་ཅུ་ལྷག་སྔོན་ནས་བགྲོ་གླེང་དབུ་འཛུགས་ཀྱིས་བོད་ཀྱི་ནང་པ་སངས་རྒྱས་པའི་ཆོས་དང་དེང་དུས་ཚན་རིག་པའི་བར་ཕན་ཚུན་རོགས་བྱེད་ཐུབ་པ་ཞིག་ཆགས་ཡོད།
སངས་རྒྱས་ཀྱི་ཆོས་ནས་གསུངས་པའི་ལྟ་གྲུབ་དང་རིག་གནས་དེ་དག་གི་ཐོག་ལ་དེང་སྐབས་དོ་སྣང་གསར་པ་ཞིག་སླེབས་ཡོད་ཅེས་སོགས་ཀྱི་བཀའ་སློབ་དང་བོད་ཀྱི་ནང་པ་སངས་རྒྱས་པའི་ཆོས་ཀྱི་ལྟ་གྲུབ་སྐོར་སོགས་ངོ་སྤྲོད་མཛད་ཡོད། ཚན་རིག་དང་འབྲེལ་བའི་ཉིན་གཅིག་གི་བགྲོ་གླེང་སྐབས་སྔ་དྲོའི་ལས་རིམ་ནང་ཚན་རིག་པ་ཁག་གསུམ་གྱིས་འཇིག་རྟེན་གྲུབ་ཚུལ་དང་དཀར་རྩིས་རིག་པ། འགྲོ་བ་མི་ནང་ཁུལ་བདེ་སྐྱིད་བསྐྲུན་ཐབས་སྐོར་བཅས་བརྗོད་གཞི་སོ་སོའི་ཐོག་གཏམ་བཤད་གནང་ཡོད་པ་དང་། མུ་མཐུད་ཉིན་རྒྱབ་བགྲོ་གླེང་ལས་རིམ་ནང་ཉི་ཧོང་རྒྱལ་ཡོངས་ཀྱི་གཟའ་སྐར་དཔྱད་རིག་དཔྱད་ཞིབ་ཁང་ནས་ཚན་རིག་པ་ཁག་གཉིས་ཀྱིས་འཇིག་རྟེན་སྐོར་དང་འབྲེལ་བའི་དཔྱད་ཞིབ་ཁག་གཅིག་ངོ་སྤྲོད་ཞུས་གནང་ཡོད་པ་རེད། ༸གོང་ས་མཆོག་གིས་བརྗོད་གཞི་སོ་སོའི་ཐོག་ལ་དགོངས་ཚུལ་ཡང་གསུང་གནང་ཡོད།
དེ་ཉིན་གྱི་མཛད་རིམ་སྐོར་འབྲེལ་ཡོད་ཉི་ཧོང་སྐུ་ཚབ་དོན་གཅོད་མཚོ་མགོ་ལྷག་པ་ལགས་ཀྱིས་ངོ་སྤྲོད་གནང་དོན། འཕྲུལ་ཆས་དང་ཚན་རིག་ཐོག་གི་ཡར་ཐོན་རྒྱལ་ཁབ་འདིར་དེ་རིང་ཚན་རིག་དང་འབྲེལ་བའི་བགྲོ་གླེང་མཛད་རིམ་ཚོགས་ཡོད་པ་དེའི་ནང་མི་སྟོང་ཕྲག་གཉིས་མ་ཟིན་ཙམ་བཅར་ཡོད་པའི་ནང་ནས་མང་ཆེ་བ་གཞོན་སྐྱེས་ཤ་སྟག་རེད་འདུག་ལ། ཚང་མས་དོ་སྣང་ཆེན་པོའི་ཐོག་ནས་༸གོང་ས་མཆོག་གི་བཀའ་སློབ་གསན་ཡོད།
དེ་བཞིན་ཁ་སང་ཕྱི་ཚེས་ ༡༦ ཉིན་༸གོང་ས་༸སྐྱབས་མགོན་ཆེན་པོ་མཆོག་ན་རི་ཊ་ཧིལ་ཊོན་གསོལ་མགྲོན་ཁང་ནས་ཆི་བྷ་ (Chiba) ཞིང་ཆེན་ཁུལ་གྱི་ཚུ་དྷ་ནུ་མ་ཞེས་པའི་གྲོང་ཁྱེར་དུ་རྟེན་གཞི་བྱས་པའི་ཆི་བྷ་འཕྲུལ་རིག་སློབ་གཉེར་ཁང་ Chiba Institute of Technology(CIT) དུ་ཆིབས་སྒྱུར་བསྐྱངས་ཏེ་དགེ་ལས་སློབ་ཕྲུག་དང་ཉམས་ཞིབ་པ་སོགས་ཁྱོན་མི་གྲྭངས་དྲུག་བརྒྱ་ཙམ་ལ་ནང་ཆོས་ཉམས་ལེན་ཞུ་མཁན་ཞིག་གི་ངོས་ནས་ཚན་རིག་གིས་མི་ཚེ་སྟབས་བདེ་དང་བདེ་སྐྱིད་ཡོང་ཆེད་དུ་འཕྲུལ་ཆས་འདྲ་མིན་བཟོ་བསྐྲུན་བྱས་པ་དེས་ཕན་ནུས་ཇི་ཙམ་ཡོད་མེད་ཐོག་གཟིགས་ཕྱོགས་གང་འདྲ་ཡོད་སྐོར་ Role of Science from Point of View of Buddhist Practitioner ཞེས་པའི་བརྗོད་གཞིའི་ཐོག་བཀའ་སློབ་སྩལ། བཀའ་སློབ་ལས་རིམ་དེ་གཙོ་སྐྱོང་གནང་མཁན་ནི་ལྕམ་སྐུ་ ཡོ་ཤི་ཀོ་ ས་ཀུ་རའི་ Ms. Yoshiko Sakurai ལགས་རེད་འདུག ཁོང་ནི་ཉི་ཧོང་གི་གསར་འགོད་པ་དང་ Japan Institute for National Fundamentals ཟེར་བའི་ཚོགས་གཙོ་ཡང་ཡིན་འདུག མདོར་ན་ཁོང་ནི་ཉི་ཧོང་ནང་གི་གནད་ཡོད་མི་སྣ་ཞིག་ཡིན་འདུག
༸གོང་ས་མཆོག་གིས་བརྗོད་གཞི་དེའི་ཐོག་བཀའ་སློབ་མ་སྩལ་གོང་དེར་དུས་རབས་ཉེར་གཅིག་པའི་ཁོངས་སུ་གཏོགས་པའི་སློབ་ཕྲུག་རྣམས་ལ་འདས་པའི་དུས་རབས་ཉི་ཤུ་པ་དེ་མི་གསོད་ཁྲག་སྦྱོར་གྱི་དུས་རབས་ཤིག་ཆགས་ཡོད་པར་བརྟེན། འགྲོ་བ་མིའི་རིགས་ཀྱི་རྒྱུད་ལ་ཡོད་པའི་རྣམ་དཔྱོད་དང་ནུས་པས་མ་འོངས་པའི་དུས་རབས་དེ་འཚེ་བ་མེད་པའི་ཞི་བདེ་ཅན་གྱི་དུས་རབས་ཤིག་བསྐྲུན་ཐུབ་པར་བྱ་རྒྱུར་གཞོན་སྐྱེས་ཚོར་འགན་ཡོད་ཅེས་བཀའ་སློབ་ཕེབས་པ་དང་སྦྲགས།
༸གོང་ས་མཆོག་གིས་སྤྱིར་འཕྲུལ་ཆས་ཀྱིས་མི་ཚེ་ལས་སླ་པོ་བཟོས་ཡོད་ཀྱང་དོན་དངོས་སུ་དེང་སྐབས་ཚང་མས་ལག་འཁྱེར་ཁ་པར་དང་བརྙན་འཕྲིན་སོགས་ཀྱི་ཐོག་དུས་ཚོད་ཤུགས་ཆེ་འཕྲོ་བརླག་གཏོང་བཞིན་ཡོད། མདོར་ན་འཕྲུལ་ཆས་ཀྱིས་ཕྱིའི་ལུས་པོར་བདེ་བ་བསྐྲུན་རྒྱུར་ཕན་ཐོགས་ཆེན་པོ་བྱུང་ཡོད་ཀྱང་ནང་སེམས་ལ་བདེ་སྐྱིད་སྤྲོད་མི་ཐུབ་མ་ཟད། འཕྲུལ་ཆས་ཀྱིས་བདེ་སྐྱིད་ལྡན་པའི་འཛམ་གླིང་ཡང་བསྐྲུན་མིན་ཐུབ་ཅེས་བཀའ་སློབ་སྩལ་གྲུབ་པའི་རྗེས་སུ་སློབ་ཕྲུག་ཁག་གཅིག་གིས་བརྗོད་གཞི་དང་འབྲེལ་བའི་བཀའ་དྲིར་བཀའ་ལན་ཡང་སྩལ་ཡོད།
བཀའ་སློབ་ལས་རིམ་དེ་གྲུབ་མཚམས་ཨ་མི་རི་ཁའི་པི་པི་ཨེམ་ཟེར་བའི་རོལ་དབྱངས་ཚོགས་པའི་གླུ་བ་སྐུ་ཞབས་ པི་ཊར་ཡ་རུ་ Peter Yarou ཞུ་བས་༸གོང་ས་མཆོག་གི་གསུང་ལས་གཞས་ཚིག་བཟོས་པའི་སྙིང་སྟོབས་ནམ་ཡང་མ་ཞུམ་ Never Give Up ཞེས་པའི་གླུ་གཞས་དེ་གཟིགས་འབུལ་ཞུས། དེ་ནས་ཉིན་གུང་ལྗགས་སྨིན་གྲུབ་མཚམས་མིའི་ཚབ་ཏུ་ལས་རིགས་སྣ་ཚོགས་བྱེད་རྒྱུར་བཀོལ་སྤྱོད་ཆོག་པའི་འཕྲུལ་ཆས་ Robot གསར་བཟོ་ཁག་གཅིག་༸གོང་ས་མཆོག་ལ་གཟིགས་འབུལ་ཞུས། སང་ཉིན་ཊོག་ཁྱོའི་ནས་ཚོུད་ཕྱེད་ཀ་མ་ཟིན་ཙམ་གྱི་ས་གནས་ཞིག་ལ་ཆགས་པའི་བུ་མོའི་སློབ་གྲྭ་ཞིག་ལ་འཛམ་གླིང་ཞི་བདེའི་སྐོར་བཀའ་སློབ་སྩལ་རྒྱུའི་མཛད་འཆར་འདུག
