༢༠༡༣ ཟླ་ ༡༡ ཚེས་ ༡༩ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༡༡ ཚེས་ ༡༦ ཉིན་སྟེ་རེས་གཟའ་སྤེན་པའི་ཉིན་བོད་ཁམས་ལི་ཐང་བྱམས་ཆེན་ཆོས་འཁོར་གླིང་དགོན་ཆེན་གྱི་འདུ་ཁང་ལ་གོང་ཚེས་ཉིན་གྱི་མཚན་མོར་མེ་སྐྱོན་བྱུང་ནས་ནང་བརྟེན་ཁག་སྲུང་སྐྱོབ་བྱེད་མཁན་གྱི་དགེ་འདུན་པ་ཁག་གཅིག་ལ་རྨས་སྐྱོན་བྱུང་ཡོད་འདུག
དེ་ཡང་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། གོང་ཚེས་ཉིན་གྱི་དགོང་མོ་ཆུ་ཚོད་༡༠ཙམ་ལ་དགོན་པའི་འདུ་ཁང་གསར་པ་ཞིག་གི་ནང་གློ་བུར་གློག་སྐུད་ལ་སྐྱོན་ཤོར་བའི་རྐྱེན་བྱས་ནས་འདུ་ཁང་ལ་མེ་སྐྱོན་ཚབས་ཆེན་བྱུང་ཡོད་འདུག
སྐབས་དེར་དགོན་པའི་མཚན་ཉིད་གྲྭ་ཚང་གི་དགེ་འདུན་ཉིས་བརྒྱ་ཡས་མས་ཤིག་དང་། ས་གནས་མི་མང་ཚོས་ཉེན་ཁར་མི་འཛེམས་པར་འདུ་ཁང་སྟེང་བཞུགས་ཡོད་པའི་མཁན་རིན་པོ་ཆེ་མཆོག་དང་། རྟེན་རྙིང་མང་པོ་ཞིག་མེ་ལྕེའི་ཁྲོད་ནས་ལེན་ཐུབ་ཡོད་པ་མ་ཟད། མཚན་ཡོལ་གྱི་ཞོགས་པའི་ཆུ་ཚོད་བཞི་བ་ཙམ་ལ་མེ་མགོ་གནོན་ཐུབ་ཙམ་བྱུང་ཡོད་འདུག མེ་སྐྱོན་བྱུང་བའི་སྐབས་མེ་ཤུགས་ཧ་ཅང་ཆེན་པོ་འབར་ཡོད་པར་སོང་དགེ་འདུན་པ་ཁག་གཅིག་ལ་རྨས་སྐྱོན་ཕོག་ཡོད་ཀྱང་སྲོག་སྐྱོན་བྱུང་མེད་པ་དང་། མེ་སྐྱོན་བྱུང་རྗེས་རྒྱ་ནག་གི་མེ་གསོད་རུ་ཁག་བསླེབས་ནས་མེ་བསོད་ཐབས་བྱས་པ་དང་། དེའི་བརྒྱུད་དུ་ཉེན་ཁ་ཡོད་ལུགས་ཀྱིས་མེ་སྐྱོན་བྱུང་སའི་ཁུལ་དུ་ཕྱི་ཚེས་ ༡༧ ཉིན་བཀག་སྡོམ་བྱས་ནས་མི་སུ་ཡང་གཏོང་གི་མེད་པའི་སྐོར་གནས་ཚུལ་ཐོན་འདུག
རྩ་བའི་ད་ལྟའི་ཆར་ལི་ཐང་དགོན་ཆེན་གྱི་མཚན་ཉིད་གྲྭ་ཚང་ནང་རྒྱུན་དུ་ཕྱག་དཔེ་གཟིགས་ནས་བཞུགས་མཁན་དགེ་འདུན་པ་ཁྱོན་གྲངས་ ༤༠༠ ཙམ་ཡོད་པ་དང་། སྔགས་པ་གྲྭ་ཚང་གི་དགེ་འདུན་པ་ ༣༠༠ ཙམ་བཅས་ཁྱོན་དགེ་འདུན་པ་ ༧༠༠ ཙམ་དགོན་པར་གཏན་འཇགས་བཞུགས་མཁན་ཁོངས་སུ་ཡོད་པ་དང་། སྨོན་ལམ་སོགས་ཚོགས་སྐབས་ཕྱོགས་གང་ས་ནས་དགེ་འདུན་པ་ཉིས་སྟོང་ལྔ་བརྒྱ་ནས་སུམ་སྟོང་བར་འདུ་འཛོམས་ཀྱིས་ཚོགས་ཆེན་འདུ་ཁང་ནང་ཚོགས་ཀྱི་ཡོད་འདུག དགོན་པའི་བླ་མ་གཙོ་བོ་ནི་ལི་ཐང་སྐྱབས་མགོན་ཡིན་པ་དང་། གཞན་ཡང་བླ་མ་མང་དག་ཅིག་ཀྱང་ཡོད་པ་རེད་འདུག དགོན་པ་འདི་བཞིན་ཐོག་མར་ཕྱི་ལོ་ ༡༥༨༠ ལོར་༸རྒྱལ་དབང་སྐུ་ཕྲེང་གསུམ་པ་བསོད་ནམས་རྒྱ་མཚོ་མཆོག་གིས་ཕྱག་བཏབ་པའི་བོད་ནང་གི་དགོན་པ་གྲགས་ཅན་དང་རྙིང་ཤོས་ཀྱི་གྲས་ཤིག་ཡིན་འདུག་པ་བཅས།།
