༢༠༡༣ ཟླ་ ༡༡ ཚེས་ ༥ རེས་གཟའ་མིག་དམར།

༄༅། །ཕྱི་ལོ་ ༢༠༡༣ ཟླ་ ༡༡ ཚེས་ ༣ སྔ་དྲོར་༸གོང་ས་༸སྐྱབས་མགོན་ཆེན་པོ་མཆོག་གིས་བཙུན་མའི་འཇང་དགུན་ཆོས་ཡོངས་སུ་ལེགས་གྲུབ་བྱུང་རྗེས་ཞུགས་སྒར་གཙུག་ལག་ཁང་གི་གསུང་ཆོས་རྭ་བའི་ནང་བཙུན་མ་རྣམས་ལ་བླང་དོར་བཀའ་སློབ་སྩལ་དོན། ད་རེས་ས་ཕྱོགས་ཁག་འགའ་ཤས་ནས་བཙུན་མ་རྣམས་འདིར་འཛོམས་ནས་ཟླ་བ་གཅིག་རིང་འཇང་དགུན་ཆོས་ཚོགས་ཡོད། ངོས་ཀྱིས་ལོ་རྒྱུས་ཤིག་བརྗོད་འདོད་བྱུང་། དེ་སྔ་བོད་ལ་སྔ་མོ་སྔ་མོ་བཙུན་དགོན་གྱི་བཙུན་མ་ཚོས་གཞུང་ཆེན་ལྟ་རྒྱུའི་ལུགས་སྲོལ་ཞིག་ཡོད་སྐོར་ཐོས་མྱོང་། བར་སྐབས་ལོ་བརྒྱ་ཕྲག་འགའ་ཤས་རིང་བཙུན་མའི་དགོན་པ་ཚོས་གཞུང་ཆེན་ལྟ་གི་མེད། ངོས་ཀྱིས་རྩེད་མོ་ཞིག་རྩེས་ན། དེ་སྔ་བོད་ནང་ཨ་ནེ་ཚོར་མཐོང་ཆུང་བྱས་ཏེ་ཨ་ནེའི་ཁོག་པར་བཟང་སྤྱོད་མི་ཤོང་། ཞེས་བརྗོད་ཀྱི་ཡོད།

སྔ་ལོ་ཀོ་པན་ནས་ཡོང་མཁན་ཨ་ནེ་གང་ཙམ་ཐུག་པ་ཁྱེད་ཚོས་རྒྱན་འཇུག་གཉིས་བློ་འཛིན་བྱས་འདུག དེ་ནས་ཁྱེད་རང་ཚོ་ཁག་ཅིག་གིས་འགྲེལ་བ་དོན་གསལ་བློ་འཛིན་བྱས་འདུག དེ་དུས་ངོས་ཀྱིས་བརྗོད་རྒྱུ་བྱུང་། འགྲེལ་བ་དོན་གསལ་ངོས་ནས་ཀྱང་བློ་ནས་འགྲོ་གི་མེད་ཅེས་བརྗོད་རྒྱུ་བྱུང་། བྱས་ཙང་ད་ཆ་ཨ་ནིའི་ཁོག་པར་བཟང་སྤྱོད་མ་ཤོང་བ་རེད་མི་འདུག རྒྱན་འཇུག་གཉིས་མ་ཟད་འགྲེལ་བ་དོན་གསལ་ཡང་བློར་ཡོད་པ་ཆགས་ཡོད། དེ་ཐོག་མའི་ཡོང་སྟངས་དེ་ང་རང་ཚོ་ཚང་མས་ལམ་རིམ་གྱི་གཞུང་བློ་དོགས་རྣམ་བཞིའི་གཞུང་གང་དུ་ཡིན་ནའང་དལ་འབྱོར་ཞེས་གསུངས་སྐབས། ཡུལ་དབུས་སུ་སྐྱེས་པ་ཞེས་གསུངས་ཀྱི་འདུག ཡུལ་དབུས་དབྱེ་བ་ཕྱེ་དུས་ས་ཚིགས་དང་ཆོས་ཚིགས་གཉིས་ཀྱི་ཐོག་ནས་ཡུལ་དབུས་ཕྱེ་ཀྱི་ཡོད། ས་ཚིགས་ཀྱི་སྒོ་ནས་བཤད་དུས་རྒྱ་གར་རྡོ་རྗེ་གདན་ཡུལ་དབུས་ཆགས་ཡོད། ས་ཚིགས་ཀྱི་ཆ་ནས་ང་ཚོའི་བོད་ཡུལ་དབུས་ཆགས་མེད། འོན་ཀྱང་ཆོས་ཚིགས་ཀྱི་སྒོ་ནས་ཕྱེ་བ་ཡིན་ན་འཁོར་རྣམ་བཞི་འདུས་པའི་དབུས་དེ་ཡུལ་དབུས་ལ་རྩིས་ཀྱི་ཡོད། དེར་བརྟེན་ང་ཚོའི་བོད་ལ་དགེ་སློང་དང་། དགེ་ཚུལ་ཕ་མ། དགེ་བསྙེན་ཕ་མ་ཡོད།

དེར་བརྟེན་ཆོས་ཚིགས་ཀྱི་ཐོག་ནས་བཤད་ན་བོད་དེ་ཡུལ་དབུས་སུ་རྩི་རྒྱུ་ཞིག་དུས་རྒྱུན་ང་ཚོས་ཡུལ་དབུས་སུ་སྐྱེས་པ་ཞེས་པ་དེ་ཆོས་ཚིགས་ཀྱི་ཐོག་ནས་ཡུལ་དབུས་རེད་ཅེས་འདི་ལྟར་འགྲེལ་བཤད་བརྒྱབ་ཡོད། འཁོར་རྣམ་བཞི་ཟེར་རྒྱུ་དེ། མགོན་ཀླུ་སྒྲུབ་ཀྱི་མདོ་ཀུན་ལས་བཏུས་པའི་འགྲེལ་བ་སློབ་དཔོན་ཨ་བྷེ་ཡ་ཀ་རས་མཛད་པའི་འགྲེལ་བའི་ནང་འཁོར་རྣམ་བཞི་ངོས་འཛིན་གནང་འདུག་པ་དེའི་ནང་། རབ་བྱུང་གི་ནང་ནས་དགེ་སློང་ཕ་མ་གཉིས། ཁྱིམ་པས་ནང་ནས་དགེ་བསྙེན་ཕ་མ་གཉིས། འདི་བཞི་ངོས་འཛིན་གནང་འདུག དགེ་སློང་ཕ་མ་གཉིས་བྱུང་ན་འཁོར་རྣམ་བཞི་ཆ་ཚང་ཞིག་ཡོང་གི་ཡོད། དེར་བརྟེན་དགེ་སློང་མ་དེ་དགོས་ཀྱི་འདུག ཅེས་ང་ཚོས་དེར་དོ་སྣང་བྱས་ཡོད། དགེ་སློང་མ་བསྒྲུབ་རྒྱུ་དེ་ངོས་ཀྱིས་ཐག་གཅོད་ཐུབ་རྒྱུ་མེད། བཅོམ་ལྡན་འདས་ཀྱིས་འདུལ་བའི་ཁྲིམས་སུ་བཅད་པའི་ཐོག་ནས་དགེ་འདུན་གྱིས་ཐག་གཅོད་རྒྱུ་མ་གཏོགས་དགེ་སློང་བྱེ་བྲག་པ་གཅིག་གིས་ཐག་གཅོད་རྒྱུའི་ཐོབ་ཐང་མེད། གཉིས་ནས་འདུལ་བའི་ཉམས་ལེན་དེ་ཐེག་དམན་ཡུལ་གྲུ་པཱ་ལིའི་ཆོས་བརྒྱུད་འཛིན་མཁན་གྱི་ནང་འདུལ་བའི་འགྲོ་སྟངས་དེ་དག་ཧ་ལས་པའི་ཡག་པོ་ཡོད། དེར་བརྟེན་དགེ་སློབ་མ་བསྒྲུབ་རྒྱུ་དེ་འདུལ་བ་འཛིན་པ་ཚོ་ཚོགས་ནས་ཐག་གཅོད་རྒྱུ་ཞིག་རེད་མ་གཏོགས། ངོས་ཀྱིས་ཐག་གཅོད་བྱེད་ཐུབ་རྒྱུ་མེད། དེ་ལྟར་བྱས་ཏེ་ང་ཚོས་ཐེངས་མང་ཚོགས་པ་རེད། ང་རང་ཚོའི་བོད་གངས་ཅན་པའི་འདུལ་བ་འཛིན་པའི་མཁས་དབང་ཚོ་འཚོགས་རྒྱུ་དང་། དེ་བཞིན་རྒྱལ་སྤྱིའི་ནང་པའི་ཡུལ་གྲུ་ཁག་གི་འདུལ་བ་འཛིན་པ་ཚོ་ཚོགས་ནས་གོ་བསྡུར་ཐེངས་མང་བྱས་ཀྱང་ཐག་ཆོད་བྱུང་མེད། བོད་གངས་ཅན་གྱི་ལྗོངས་ཀྱི་འདུལ་བའི་འགྲོ་སྟངས་དེ་གཞི་ཐམས་ཅད་ཡོད་པར་སྨྲ་བའི་སྡེ་པའི་སྡོམ་རྒྱུན་ཆགས་ཡོད། ང་ཚོའི་འདུལ་བ་འདི་གཞི་ཐམས་ཅད་ཡོད་པར་སྨྲ་བའི་སྡེ་པ་འདི་གཙོ་བོ་ཆགས་ཡོད། དཔེར་ན། ང་ཚོའི་འདུལ་བ་ལུང་སྡེ་བཞི་འདི་པཱ་ལིའི་གཞུང་ནང་ཡོད་པ་དེ་དང་ཕྲན་བུ་མི་འདྲ་བ་ཡོད་པ་བརྗོད་ཀྱི་འདུག

ང་རང་ཚོའི་འདུལ་བ་ལུང་སྡེ་བཞི་དེ་ཚོའི་གྲས་ཕལ་ཆེར་ལེགས་སྦྱར་ནས་ཚུར་ཡོང་བ་ཞིག་ཡིན་ས་རེད། ངོས་ཀྱིས་ཐག་ཆོད་པོ་མི་ཤེས། དེར་བརྟེན་ང་རང་ཚོར་མཁན་ཆེན་ཞི་བ་འཚོས་འདུལ་བའི་སྡོམ་རྒྱུན་དེ་སྤེལ་གནང་བ་རེད། མཁན་ཆེན་ཞི་བ་འཚོས་གཞི་ཐམས་ཅད་ཡོད་པར་སྨྲ་བའི་སྡེ་པའི་ལུགས་ཀྱི་སྡོམ་རྒྱུན་དེ་གནང་བཞིན་ཡོད། མགོན་པོ་ཀླུ་གྲུབ་ནས་བཅོམ་ལྡན་འདས་ཀྱི་སྲས་དགྲ་ཅན་འཛིན་ནས་མར་བརྒྱུད་པ་ཞིག་རེད། དཔེར་ན། ཇོ་བོ་རྗེ་བོད་ལ་ཕེབས་ནས་ཁོང་ཕལ་ཆེན་སྡེ་པ་ཡིན་པ་ཡོད། ཁོང་གི་སྐུ་མདུན་ནས་སྡོམ་པ་ཞུ་མཁན་དེ་འདྲ་བྱུང་སྐབས་ཁོང་གིས་བོད་ལ་མཁན་ཆེན་ཞི་བ་འཚོས་གཞི་ཐམས་ཅད་ཡོད་པར་སྨྲ་བའི་སྡོམ་རྒྱུན་བཙུགས་གནང་ཡོད་སྟབས། དེ་རང་ལེགས་པ་ལས་ཇོ་བོ་རྗེ་རང་ཉིད་ཀྱིས་ཕལ་ཆེན་སྡེ་པའི་སྡོམ་རྒྱུན་བཙུགས་ན་དགོས་པ་མེད། ཅེས་གསུངས་ཡོད། དེར་བརྟེན་ཇོ་བོ་རྗེས་གཞི་ཐམས་ཅད་ཡོད་པར་སྨྲ་བའི་སྡོམ་རྒྱུན་ལ་རྩིས་འཇོག་གནང་ཡོད། ང་ཚོས་ཀྱང་གཞི་ཐམས་ཅད་ཡོད་པར་སྨྲ་བའི་སྡོམ་རྒྱུན་འདི་གཙིགས་ཆེན་པོ་བྱེད་དགོས་པ་ཆགས་ཡོད། དེར་བརྟེན་གཞི་ཐམས་ཅད་ཡོད་པར་སྨྲ་བའི་སྡེའི་པའི་འདུལ་བའི་གཞུང་གི་ནང་ལ་དགེ་སློང་མ་བསྒྲུབ་རྒྱུར་ངེས་པར་དུ་མཁན་པོ་ཕ་མིན་པར་མཁན་མོ་ཞིག་དགོས་པ་གསུངས་ཡོད། མཁས་པ་འགའ་ཤས་ཀྱིས་སྤྱིར་སྟངས་དམིགས་བསལ་ཏོག་ཙམ་ཡོད་པ་གསུང་མཁན་འདུག དེ་ཧ་ཅང་གསལ་པོ་ཡོད་པར་བརྟེན་མང་ཆེ་བས་ཕ་ཚོགས་རྐྱང་པས་དགེ་སློང་མའི་སྡོམ་པ་འབོག་འཇོགས་བྱས་ན་འགྲིག་གི་མེད་པ་གསུངས་པར་བརྟེན་དེ་འདྲ་ཁག་པོ་ཡིན་པ་གསུངས་བཞིན་ཡོད། དེ་འདྲ་ཡིན་དུས་བོད་ལ་རྒྱ་གར་ནས་དགེ་སློང་མ་ཕེབས་ཐུབ་མེད། བོད་ཀྱི་བླ་ཆེན་ཚོའི་ཁྲོད་དགེ་སློང་མ་བསྒྲུབ་པ་གནང་མཁན་དེ་འདྲ་བྱུང་ཡོད་ཀྱང་དེ་དག་འདུལ་བའི་གཞུང་དང་མཐུན་པའི་སྡོམ་པ་ཉེས་མེད་ཕུན་ཚོགས་ཡིན་མིན་ཐོག་ལ་རྙོག་ཕྲ་ཡོད།

དེ་འདྲ་ཡིན་དུས་ང་ཚོས་དེ་དོགས་མ་ཆོད་པ་རེད། རྒྱལ་སྤྱིའི་རང་བཞིན་ལྡན་པའི་འདུལ་བ་འཛིན་པའི་ཚོགས་འདུ་ཚོགས་ནས་གཞི་ཐམས་ཅད་ཡོད་པར་སྨྲ་བའི་སྡེ་པའི་ལུགས་ཀྱི་དགེ་སློང་མའི་སྡོམ་པ་འབོགས་ཆོག་བྱེད་སྐབས་ཡང་ན་ཕ་ཚོགས་རྐྱང་པའི་བསྒྲུབ་ཆོག་གི་རེད་གསུང་མཁན་ཞིག་དང་ཡང་ན་མཁན་མོ་དེ་སྡེ་པ་ཐ་དད་གཅིག དཔེར་ན་རྒྱ་ནག་ལུགས་ཀྱི་སྡེ་པའི་དགེ་སློང་མའི་སྡོམ་རྒྱུན་ཡོད་པ་ཞིག་གསུང་བཞིན་ཡོད། དེ་བཞིན་ཝི་ཏི་ནམ་ནང་དུའང་ཡོད་པ་གསུང་སྲོལ་འདུག ཕལ་ཆེར་ཤྲི་ལངྐཱ་དང་འབར་མ། ཐེ་ལེན་ཌི་བཅས་ནང་ཡོད་ས་མ་རེད། རྒྱ་ནག་ལུགས་ཀྱི་དགེ་སློང་མའི་སྡོམ་རྒྱུན་ཡོད་པ་དེ་རྒྱ་ནག་གི་མཁས་པ་རིགས་གཅིག་གིས་ཐེ་ཚོམ་གནང་བཞིན་ཡོད། རྒྱ་ནག་གི་འདུལ་བ་འཛིན་པ་ཏ་ཝེ་བརྗོད་མཁན་ཞིག་ཡོད། ཞེ་དྲག་ཡག་པོ་རེད། ཁོང་གཤེགས་ཚར་བ་རེད། ཁོང་གིས་ཏོག་ཙམ་ཐེ་ཚོམ་གནང་བཞིན་འདུག གང་ལྟར་རྒྱ་ནག་ལུགས་ཀྱི་སྡེ་པ་ཐ་དད་ཀྱི་དགེ་སློང་མ་ཡོད་པ་དེ་ཚད་ལྡན་ཞིག་བྱུང་བ་ཡིན་ན། འདིས་སློབ་དཔོན་དང་ཆོ་ག་མ་ཙང་མ་དེ་ཐམས་ཅད་ཡོད་པར་སྨྲ་བའི་སྡེ་པའི་ལུགས་ཀྱི་འགྲོ་སྟངས་དེ་བྱས། མཁན་མོ་དེ་སྡེ་པ་ཐ་དད་པའི་དགེ་སློང་མ་ཞིག་གིས་བྱེད་ཆོག་རྒྱུ་ཞིག་ཡོད་དང་མེད་ཀྱི་གནད་དོན་དེ་དག་ཕན་ཚུན་གོ་བསྡུར་བྱས་ནས་ཐག་གཅོད་དགོས་པ་ཞིག་རེད་མ་གཏོགས། ངོས་ཀྱིས་ཐག་གཅོད་མི་ཐུབ། གཞན་འགའ་ཤས་ཀྱིས་ངོས་ལ་སྐྱོན་བརྗོད་བྱེད་བཞིན་ཡོད། ༸རྒྱལ་བ་རིན་པོ་ཆེས་ཐག་གཅོད་ན་འགྲིག་འགྲིག་པ་རེད། འོན་ཀྱང་ཁོང་གིས་ཕལ་ཆེར་ཕོ་མོ་དབྱེ་འབྱེད་ཀྱི་བསམ་བློའི་ཐོག་བཀག་འགོག་བྱེད་ཀྱི་འདུག་ཅེས་བརྗོད་མཁན་འགའ་ཤས་ཡོད། དེ་ངོས་ལ་དབང་ཆ་གང་ཡང་མེད། འདུལ་བ་གཞིར་ཟུང་འགྲོ་དགོས་པ་རེད་མ་གཏོགས་ངོས་རང་ཏཱ་ལའི་བླ་མ་ཡིན་ཞེས་ཐག་གཅོད་མི་ཐུབ།

དེར་བརྟེན་དགེ་སློང་མ་སླར་གསོ་བྱ་རྒྱུའི་གནད་དོན་འདི་ངོས་ཀྱི་དབང་ཚད་ལས་འདས་པ་རེད། ངོས་ཀྱི་དབང་ཚད་ཐོག་ནས་གང་བྱ་ཐུབ་རྒྱུ་ཡོད་དམ་ཞེས་ན། བཙུན་མའི་དགོན་པ་ཚོས་གཞུང་ཆེན་ལྟ་རྒྱུ་འདི་རེད། འདི་ཐོབ་ཐང་གཅིག་མཚུངས་སུ་ཡོད། ཀླད་པའི་ཆ་ནས་ལྟ་སྐབས་ཕོ་མོར་དབྱེ་བ་གང་ཡང་མེད་པ་གསལ་པོ་རེད། བཅོམ་ལྡན་འདས་རང་གིས་གཞི་རྩའི་ཆ་ནས་དགེ་སློང་ཕ་མ། ཞེས་ཐོབ་ཐང་འདྲ་མཉམ་གནང་ཡོད། བྱང་སེམས་སྡེ་སྣོད་སྐབས་ཕོ་མོའི་དབྱེ་བ་གང་ཡང་མེད། སྔགས་སྤྱི་དང་ལྷག་པར་སྔགས་བླ་མེད་ཀྱི་གཞུང་ནང་བུད་མེད་ཀྱི་རྟེན་ལ་རྩི་བཀུར་བྱེད་དགོས་པ་གསུངས་ཡོད། བུད་མེད་ལ་དམས་ན་རྩ་ལྟུང་ཡོང་བ་གསུངས་ཡོད། དེ་འདྲ་ཡིན་དུས། དགེ་སློང་མའི་སྡོམ་རྒྱུན་འདི་འདུལ་བ་གཞིར་བཞག་ཐོག་འགྲོ་དགོས་པ་ལས་སྔགས་ཀྱི་གཞུང་ནས་ལུང་འདྲང་ནས་བརྗོད་ཐུབ་རྒྱུ་མེད། འདུལ་བ་རང་གི་གཞུང་བཞིན་འགྲོ་དགོས་པ་ཆགས་ཡོད། དེར་བརྟེན་དགེ་སློང་མའི་སྐོར་ལ་བྱ་ཐབས་གང་ཡང་མེད་ཀྱང་ཤེས་ཡོན་འདི་དག་རབ་བྱུང་ཕ་ཚོའི་གནས་ཚད་ལྟར་རབ་བྱུང་མ་ཚོས་བསྒྲུབ་ཐུབ་རྒྱུའི་ཐོབ་ཐང་ཡོད་ལ་ཆ་རྐྱེན་ཡང་ལྡན་ཡོད། ཕལ་ཆེར་ལོ་བཞི་བཅུ་ཙམ་ཕྱིན་ཡོད། ངོས་ཀྱིས་བཙུན་དགོན་ཚོས་དཔེ་ཆ་ལྟ་དགོས་པ་དང་ཚན་ཉིད་ཀྱི་་གཞུང་ལྟ་དགོས་ཀྱི་འདུག་ཅེས་འགོ་བཙུགས་ཡོད། ངོས་ཀྱིས་གསལ་པོ་དྲན་པར་དགའ་ལྡན་ཆོས་གླིང་དུ་ངོས་རང་ཐེངས་གཅིག་བསྐྱོད་དེ་ཕར་ཕྱིན་སྐོར་འགྲེལ་བཤད་ཏོག་ཙམ་བརྒྱབ་ནས་འགོ་དང་པོ་འདི་ལྟར་བཙུགས་པ་རེད། དེ་ནས་རིམ་བཞིན་བཙུན་མའི་དགོན་པ་ཁག་མང་པོ་གཅིག་ནང་གཞུང་ཆེན་ལྟ་རྒྱུ་འགོ་བཙུགས་པ་རེད། དགེ་རྒན་ཚོས་ཀྱང་ཧུར་ཐག་འབད་ཐག་གནང་ཡོད། ལོ་གཅིག་སྨོན་ལམ་སྐབས་ལ་རབ་བྱུང་མ་ཚོས་རྟགས་གསལ་བཏང་སོང་ཧ་ཅང་ཡག་པོ་འདུག གྲུབ་འབྲས་དེ་ཙམ་ཐོན་ཡོད། ན་ནིང་དང་ད་ལོ་ང་ཚོས་དགེ་བཤེས་མ་འཇོག་རྒྱུའི་ (formally) གཏན་འབེབས་བྱེད་རྒྱུའི་ཐད་གོ་བསྡུར་བྱས་པ་རེད། གང་ལྟར་ལོ་བཅུ་བདུན་སློབ་སྦྱོང་བྱས་ནས་དགེ་བཤེས་མའི་ལག་འཁྱེར་སྤྲོད་རྒྱུ་གཏན་འཁེལ་བ་རེད། ད་ལྟ་བར་ལོ་ངོ་སུམ་ཅུ་བཞི་བཅུ་དེའི་རིང་སློབ་གཉེར་བྱེད་རྒྱུ་ཞིག་འགོ་བཙུགས་ནས་གྲུབ་འབྲས་མིག་མཐོང་ལག་འཛིན་ཡོད་པ་ཡག་པོ་ཞིག་ཐོན་ཡོད།

ངོས་ཀྱིས་ཐོག་མར་འབོད་སྐུལ་འདི་ལྟར་བྱས་པ་རེད། དགེ་བཤེས་མ་འཇོག་དགོས་རེད་བརྗོད་སྐབས་མཁས་པའི་དབང་པོ་འགའ་ཤས་ཀྱིས་དགེ་བཤེས་མ། ཞེས་པ་དེ་གང་འདྲ་ཡོང་ངམ་ཞེས་གསུངས་མྱོང་ཡོད། དགེ་སློང་མ་ཡོད་ཆོག་ནས་དགེ་བཤེས་མ་ཡོང་མ་ཆོག་པ་མེད། ཅེས་རིམ་བཞིན་ང་ཚོས་དགེ་བཤེས་མ་འཇོག་རྒྱུར་གཏན་འབེབ་བྱས་ནས་འགྲོ་གི་ཡོད། དགེ་བཤེས་མ་འཇོག་བརྗོད་སྐབས་སློབ་གཉེར་ཡོད་པ་གཅིག་དགོས་པ་རེད་མ་གཏོགས་དགེ་བཤེས་ནང་ཆ་བཞག་ནའང་དེ་སྔ་ཌལ་ཧོར་དུ་དཔེ་ཆ་གང་ཡང་མི་ཤེས་མཁན་དགེ་བཤེས་མིང་གཅིག་འཁྱེར་ནས་འཇུག་ཏུ་ཌལ་ཧོར་དགེ་བཤེས། ཞེས་དཔེར་བརྗོད་རྒྱག་ས་ཆགས་པ་རེད། དེ་འདྲ་ཡོང་གི་མ་རེད། སློབ་གཉེར་ཡོད་པའི་ཐོག་ནས་དགེ་བཤེས་མ་འཇོག་དགོས་པ་རེད། དེ་འདྲ་ཡིན་དུས་སྤྱིར་སྟངས་དེ་རིང་ཁ་སང་གྲྭ་ཚོགས་ཆུང་ཆུང་རེད། དགེ་བཤེས་ཚད་ལྡན་ཞིག་ཡོང་བར་མྱུང་མཐར་ལོ་ཉི་ཤུ་ཙ་གྲངས་དཔེ་ཆ་ལྟས་ནས་དགེས་བཤེས་འཇོག་བཞིན་ཡོད། སྔ་མོ་བོད་ལ་ཆ་མཚོན་ན་རྒན་པདྨ་རྒྱལ་མཚན་ལགས་གྲས་ལོ་སུམ་ཅུ་ཙམ་དཔེ་ཆ་བལྟས་ནས་དགེ་བཤེས་བཞག་པ་རེད། ཁྱེད་རང་ཚོ་ཡང་སྔ་ལོ་གཏན་འབེབས་ཟིན་པ་ལྟར་དབུ་ཕར་གྱི་གཞུང་དེ་དག་ལ་ལོ་བཅུ་བདུན་ལྷག་སློབ་གཉེར་རྒྱག་དགོས་པ་ཆགས་ཡོད། དེར་བརྟེན་ངོས་ཀྱིས་འབོད་སྐུལ་བྱས་ནས་འགོ་གཅིག་བཙུགས། གཙོ་ཆེ་ཤོས་ཁྱེད་རང་ཚོ་བཙུན་དགོན་ཁག་འདྲ་མིན་གྱི་བཙུན་མ་དེ་དག་གིས་བསམ་པ་རྣམ་དག་ཐོག་ནས་སློབ་གཉེར་བརྒྱབ། དཔེ་འཁྲིད་དགེ་རྒན་ཚོས་ཀྱང་བསམ་པ་རྣམ་དག་ཐོག་ནས་དཔེ་འཁྲིད་གནང་ནས་གྲུབ་འབྲས་ཡག་ཐག་ཆོད་བྱུང་བ་རེད། དེར་བརྟེན་ངོས་ཀྱིས་བཀྲ་ཤིས་བདེ་ལེགས་དང་། ཐུགས་རྗེ་ཆེ་ཞུ་རྒྱུ་ཡིན། སློབ་སྦྱོང་བྱ་རྒྱུ་འདི་སངས་རྒྱས་བཅོམ་ལྡན་འདས་ཀྱི་ཆོས་ལུང་དང་རྟོགས་པའི་བདག་ཉིད་ཅན་གྱི་བསྟན་པ་ཆགས་ཡོད། ལུང་རྟོགས་ཀྱི་བདག་ཉིད་ཅན་གྱི་སངས་རྒྱས་ཀྱི་བསྟན་པ་འདི་བཤད་སྒྲུབ་གཉིས་ཀྱིས་འཛིན་དགོས་པ་མ་གཏོགས་སྒོམ་རྒྱག་གི་ཡོད། བསྒྲུབ་པ་ཉམས་ལེན་བྱེད་ཀྱི་ཡོད་བརྗོད་ནས་གཟུང་སྔགས་འདྲ་བསགས། ཕྱག་འཚལ་སྐོར་སྦྱོངས་འདྲ་བྱས།

འོན་ཀྱང་དོན་དག་གང་ཡང་མ་ཤེས་པར་ལུས་ན་ཕན་ཐོགས་མེད། རྟོགས་པའི་བསྟན་པ་ཚད་ལྡན་ཞིག་ཡོང་བར་ལུང་གི་བསྟན་པར་ཐོས་བསམ་བྱེད་དགོས། རྟོགས་པའི་བསྟན་པ་འདི་བསླབ་པ་གསུམ་ལ་བསམ་བློ་གཏོང་བཞིན་ཡོད། བསླབ་གསུམ་ཉམས་ལེན་ཇི་བཞིན་ཡོང་བར་སྡེ་སྣོད་གསུམ་ལ་སློབ་སྦྱོང་བྱས་ནས་བསླབ་པ་གསུམ་གྱི་གནད་ཡོངས་སུ་རྫོགས་པ་ཤེས་པའི་ཐོག་ནས་བསླབ་པ་གསུམ་གྱི་ཉམས་ལེན་དགོས་པ་མ་གཏོགས། སྡེ་སྣོད་གསུམ་གྱི་གཞུང་ལ་སློབ་གཉེར་གང་ཡང་མེད་པར་ཁ་ནས་སྐྱབས་འགྲོ་འདོན་བཞིན་ཡོད་ཀྱང་སངས་རྒྱས་དཀོན་མཆོག་མི་ཤེས་མཁན་ཡོང་བཞིན་ཡོད། དཔེར་ན་ལོ་གཅིག་ངོས་རང་རོ་ཐང་ལ་བརྒྱབ་ནས་ལྐོག་ས་ཞེས་པར་བསླེབས་སྐབས་ཡུལ་པ་ཚོ་ངོས་ཀྱིས་ངོ་ཤེས་རེད།

སྔ་མོ་ངོས་རང་དྲིལ་བུ་རིར་གནས་སྐོར་བསྐྱོད་སྐབས་ཁོང་ཚོ་འགའ་ཤས་ཡོང་ནས་ངོ་ཤེས་ཆགས་པ་རེད། ཁོང་ཚོ་དང་ཐུག་སྐབས་ངོས་ཀྱིས་ཁྱེད་ཚོ་ཚང་མ་ནང་པ་རེད་དམ་བརྗོད་པར་ནང་པ་ཡིན་བརྐོད་ཀྱི་འདུག ནང་པ་ཞེས་པ་གང་འདྲ་ཞིག་ལ་བརྗོད་ཀྱི་ཡོད་འདྲི་སྐབས། ཁོང་ཚོས་སངས་རྒྱས་ལ་སྐྱབས་སུ་མཆིའོ། ཆོས་ལ་སྐྱབས་སུ་མཆིའོ། དགེ་འདུན་ལ་སྐྱབས་སུ་མཆིའོ། ཞེས་པ་དེ་ང་ཚོ་ནང་ཆོས་འདི་རེད་ཅེས་བརྗོད་བྱུང་། སྐབས་དེར་ངོས་ཀྱིས་སངས་རྒྱས་ལ་སྐྱབས་སུ་མཆི་འོ། ཞེས་པའི་སངས་རྒྱས་འདི་གང་རེད། ཅེས་འདྲི་སྐབས་ཤེས་ཀྱི་མེད་ཅེས་བརྗོད་ཀྱི་འདུག ཕྱོགས་མཚུངས་ལོ་དེ་རང་ལ་ངོས་རང་ཐེངས་གཅིག་ལཀ་ནཝོར་(Lucknow) ལ་བསླེབས་སྐབས་ནང་པའི་སློབ་ཕྲུག་ཡིན་པ་གྱོས་སེར་པོ་གྱོན་པ་ཁག་ཅིག་འདུག

ངོས་རང་ཡོང་སྐབས་སངས་རྒྱས་ལ་སྐྱབས་སུ་མཆིའོ། ཞེས་པ་དེ་སྐྱོར་སོང་། སྐབས་དེར་ངོས་ཀྱིས་སངས་རྒྱས་དང་ཆོས་ཟེར་ན་གང་རེད། ཅེས་འདྲི་སྐབས་ཤེས་ཀྱི་མེད་ཅེས་བརྗོད་ཀྱི་འདུག བྱས་ཙང་ང་ཚོས་སངས་རྒྱས་ཀྱི་གོ་འཕང་ཐོབ་པར་ཤོག་བརྗོད་ཀྱི་ཡོད། སངས་རྒྱས་ཀྱི་གོ་འཕང་འདི་གང་འདྲ་ཞིག་ཡིན་པ་དང་། རྒྱུ་གང་ལ་རྟེན་ནས་བྱུང་བ་ཞིག་དང་། གཞི་གང་ལ་རྟེན་ནས་ཡོང་བཞིན་ཡོད་པ་དེ་དག་མ་ཤེས་ན་སངས་རྒྱས་ཀྱི་གོ་འཕང་ཐོབ་པར་ཤོག་ཅེས་བརྗོད་ཀྱང་ཚིག་ཙམ་རེད་མ་གཏོགས་སེམས་ཀྱི་གཏིང་ནས་སྤྲོ་བ་དང་དོན་གཉེར་བསླེབ་རྒྱུ་ཞིག་ཡོང་གི་མ་རེད། སངས་རྒྱས་ཀྱི་གོ་འཕང་ཐོབ་རྒྱུའི་རྒྱུ་དང་རྐྱེན་བརྗོད་སྐབས་བྱང་ཆུབ་སེམས་དང་སྟོང་ཉིད་ཀྱི་ལྟ་བ་དེ་དག་ཤེས་དགོས། སངས་རྒྱས་ཀྱི་གོ་འཕང་ཐོབ་རྒྱུའི་གཞིས་མ་འདི་གང་རེད་བརྗོད་ན་ཁམས་བདེ་གཤེགས་སྙིང་པོའི་སྒང་ལ་འགྲོ་གི་ཡོད། ཁམས་བདེ་གཤེགས་སྙིང་པོའི་སྒང་ལ་སྒྲིབ་མ་སྦྱོངས་སྟངས་འདི་ཐབས་ཤེས་ཀྱི་ལམ་ལ་རྟེན་ནས་ཕྱིན་པ་ཡིན་ན་གང་འདྲ་ཡོང་རྒྱུ་རེད། ཅེས་བརྗོད་ན། ས་བཅུ་ལམ་ལྔ་བགྲོས་ནས་མདོར་ན་ཤེས་རབ་སྙིང་པོའི་པོའི་ནང་ཏཏྱཐཱ། ག་ཏེ་ག་ཏེ། པཱ་ར་ག་ཏེ། པཱ་ར་སམ་ག་ཏེ། བོདྷི་སྭཱ། ཞེས་གསུངས་པ་དེའི་ཐོག་ནས་རྣམ་མཁྱེན་གྱི་གོ་འཕང་བསྒྲུག་རྒྱུ་དེ་དག་སློབ་སྦྱོང་བྱས་ནས་བློ་ལ་ཤར་བ་ཡིན་ན་ཉིན་རེ་ཉིན་རེར་སངས་རྒྱས་པའི་ཆོས་བྱས་ཟེར་བ་དེ་འགྲོ་སྟངས་འདི་ཡིན་བསམ་པ་ཞིག་བློ་ལ་འཆར་རྒྱུ་ཞིག་དང་། ལམ་ལྟར་ཆ་ཚང་ཞིག་བློ་ལ་ཤར་ནས་ད་ལྟ་ང་ཚོ་ལས་དང་པོ་བ་ཉོན་མོངས་པའི་འཆིང་བ་ཀུན་ལྡན་གྱི་ས་འདི་ནས་བློ་སྦྱངས་ནས་མཐར་ཐུག ས་དང་པོ། ས་གཉིས་པ། ས་གསུམ་པ། ས་བཞི་པ། ས་ལྔ་པ་ནས་རིམ་བཞིན་ས་བཅུ་པའི་བར་དང་དེ་ནས་རིམ་བཞིན་སངས་རྒྱས་ཀྱི་སའི་བར་འགྲོ་རྒྱུ་དང་། དེའི་ཐོག་སྔགས་ཀྱི་ལམ་ཁ་སྣོན་བྱས་ཏེ་ཞི་ལྷག་ཟུང་འབྲེལ་གྱི་སྟིང་ངེ་འཛིན་མྱུར་དུ་ཐོབ་རྒྱུ་ཞིག་དང་།

ལྷག་པར་སྔགས་བླ་མེད་ཀྱི་ལམ་ཉམས་ལེན་བྱེད་སྐབས་དབང་སྒྱུར་ཐབས་ཀྱི་ཐེག་པ་ཟེར་རྒྱུ་འདིས་གཉུག་མ་ལྷན་ཅིག་བསྐྱེས་པའི་འོད་གསལ་མངོན་དུ་སྒྱུར་ཐབས་བྱས་ནས་འོད་གསལ་ལམ་དུ་བྱེད་སྐབས་རགས་པ་གློ་བུར་བའི་སེམས་ཀྱི་ལམ་སྐལ་བ་ནས་སྐལ་བའི་རིང་ལ་གོམས་པའི་ཚོད་ཀྱིས་གཉུག་མ་ལྷན་ཅིག་བསྐྱེས་པའི་འོད་གསལ་ཉམས་ལེན་བྱེད་སྐབས་ལོ་འགའ་ཤས་ནང་བསོད་ནམས་དང་ཡེ་ཤེས་ཀྱི་ཚོགས་བསགས་ཐུབ་པ་དེ་འདྲ་ཡོང་བཞིན་ཡོད། དེར་བརྟེན་དེ་དག་ཤེས་པའི་ཐོག་ནས་ཉམས་ལེན་བྱེད་ཐུབ་ན་དངོས་གནས་ནུས་པ་ཐོན་པ་ཞིག་ཡོང་རྒྱུ་ཡིན། མ་ཤེས་ན། ཆོས་འདི་རྨོངས་དད་མིན་ཡང་ཆོས་ཉམས་ལེན་བྱེད་མཁན་སོ་སོས་མ་ཤེས་པའི་ཐོག་ནས་ཉམས་ལེན་བྱེད་སྐབས་རྨོངས་དད་ཆགས་པ་རེད། རྨོངས་དད་ཀྱི་ཆོས་དེ་སོ་སོ་སངས་རྒྱས་གོ་འཕང་བསྒྲུབ་མི་ཐུབ་ལ་འཛམ་གླིང་འདིའི་སྒང་ལ་རྨོངས་དད་ཐོག་ནས་ཕྱི་ན་ནང་པ་སངས་རྒྱས་པའི་ཆོས་ཀྱི་མཚན་མཐོང་གོང་དུ་སྤེལ་ཐུབ་པ་ཞིག་ཡོང་མི་ཐུབ། དེ་འདྲ་ཡིན་དུས་སངས་རྒྱས་པའི་ཆོས་བརྗོད་སྐབས་བསམ་བློ་དང་རིག་པ་ལ་རྟེན་ནས་འགྲོ་དགོས་པ་ཞིག་ཡིན། དེར་བརྟེན་ང་ཚོས་ཚན་རིག་པ་དང་ལྷན་གོ་བསྡུར་བྱེད་ཐུབ་བཞིན་ཡོད། རྨོངས་དད་ཙམ་ལ་རྟེན་ནས་ཕྱིན་ན་ཚན་རིག་པ་དང་ལྷན་གོ་བསྡུར་བྱ་རྒྱུའི་གཞི་ཁོ་རང་མེད། སངས་རྒྱས་པའི་ཆོས་སྤུད་དག་འདི་འདྲ་ཞིག་ཡོད་པ་འདི་མཆོད་གཤོམ་ནང་འཇོག་རྒྱུ་ཙམ་ཞིག་མིན་པར་ང་ཚོས་སློབ་སྦྱོངས་བྱས་ནས་ཤེས་དགོས། དེ་འདྲ་ཡིན་དུས་ཁྱེད་ཚོར་དེ་སྔ་ནང་ཆོས་ལ་སློབ་སྦྱོང་བྱས་མེད་པའི་སྐབས་སུ་མ་ཎི་བགྲངས་སྐབས་བསམ་བློ་ཇི་འདྲ་ཞིག་གཏོང་བཞིན་ཡོད། ད་ཆ་སློབ་སྦྱོང་གང་ཙམ་ཡོད་སྐབས་མ་ཎི་འདོན་སྐབས་བསམ་བློ་ཇི་འདྲ་ཞིག་འཁོར་ཐུབ་རྒྱུ་འདུག ཁྱད་མཐོང་གི་འདུག་གམ།

དཔེར་ན་སངས་རྒྱས་ཆོས་ཚོགས་མ་ཞིག་སྟོན་པ་ཡིན་ན། དེ་སྔ་ནང་ཆོས་ལ་སློབ་སྦྱོང་མེད་པའི་སྐབས་སངས་རྒྱས་ཆོས་ཚོགས་མ་སྟོན་པ་དང་ད་ལྟ་སློབ་སྦྱོང་བྱས་ནས་སངས་རྒྱས་ཆོས་ཚོགས་མ་སྟོན་པ་གཉིས་པོ་འདི་བྲོ་བ་མི་འདྲ་བ་ཞིག་ཡོད་པ་འདི་ཁྱེད་ཚོས་ཤེས་ཀྱི་རེད། དེ་འདྲ་ཡིན་དུས་སློབ་སྦྱོང་འདི་ཧ་ཅང་གལ་ཆེན་པོ་རེད། དེ་འདྲ་ཡིན་དུས་ད་བར་སློབ་སྦྱོང་བྱས་པ་དེ་དག་ཧ་ཅང་ཡག་པོ་བྱུང་འདུག སློབ་སྦྱོང་བྱ་རྒྱུའི་དགོས་དོན་དམིགས་ཡུལ་གཙོ་བོ་གང་ཡིན་བརྗོད་ན། བསླབ་པ་གསུམ་བརྗོད་བྱར་བྱས་པའི་སྡེ་སྣོད་གསུམ་སློབ་སྦྱོང་བྱས་པའི་དགོས་དོན་འདི་བསླབ་པ་གསུམ་ཉམས་ལེན་བྱ་རྒྱུ་འདི་ཡིན། ཉམས་ལེན་མེད་ན་ཐོས་པ་གཅིག་པུ་ཚིག་སྐམ་པོ་ཞིག་རེད་མ་གཏོགས་ཕན་ཐོགས་མེད། བཅོམ་ལྡན་འདས་ཀྱིས་ཐོས་པའི་རྗེས་འཇུག་བསྒྲུབ་པ་སྙིང་པོར་བྱས། ཞེས་གསུངས་ཡོད། ཐོས་པ་བྱས་ནས་ཐོས་དོན་བསྒྲུབ་ལ་ཞོལ་ནས་ཉམས་ལེན་བྱས་ནས་རང་གི་བརྒྱུད་ལ་རྟོགས་པ་སྐྱེ་ཐུབ་པ་ཞིག་དང་གཞན་ལ་སངས་རྒྱས་པའི་ཆོས་ངོ་སྤྲོད་བྱེད་དགོས་ཀྱང་སོ་སོར་ཉམས་མྱོང་ཡོད་པའི་ཐོག་ནས་མི་གཞན་ལ་ཤོད་དགོས་པ་རེད་མ་གཏོགས། རང་ལ་ཉམས་མྱོང་གང་ཡང་མེད་པར་བླ་མ་མ་ཎིས་བཤད་པ་ལྟར་འདི་བྱས་ན་འདི་ཡོང་རྒྱུ་རེད། འདི་བྱས་ན་འདི་ཡོང་རྒྱུ་རེད་ཟེར་གི་འདུག ཅེས་དེ་འདྲའི་ཐོག་ནས་ཕྱིན་པ་ཡིན་ན་ཡག་པོ་མེད། དེར་བརྟེན་སོ་སོས་ཉམས་ལེན་བྱེད་དགོས། རྟོགས་པ་ཆ་ཚང་ཞིག་བསྐྱེ་ཐུབ་རྒྱུ་ཁག་པོ་རེད། འོན་ཀྱང་ལམ་གྱི་འགྲོ་སྟངས་དེ་དག་ཆ་ཚང་བ་ཞིག་བློ་ལ་འཆར་བྱས་ནས་གོམ་པ་དང་པོ་འདི་སྤོས་ནས་ཕྱིན་པ་ཡིན་ན་གང་ལ་གང་ཙམ་སོ་སོའི་རྒྱུས་ཡོད་དང་ཉམས་མྱོང་ཡོད་པའི་ཐོག་ནས་གཞན་ལ་ཤོད་ཐུབ་རྒྱུ་ཡིན། དེ་འདྲ་ཡིན་དུས་ཐོས་པའི་རྗེས་འཇུག་བསྒྲུབ་པ་སྙིང་པོ་བྱས། ཞེས་གསུངས་པ་ལྟར་ཁྱེད་ཚོས་ཉམས་ལེན་བྱས་ནས་བསྒྲུབ་ལ་ཞོལ་རྒྱུ་འདི་ཧ་ཅང་གལ་ཆེན་པོ་རེད། མདོར་ན་བཤད་བསྒྲུབ་ཟུང་འབྲེལ་བྱས་ནས་འགྲོ་རྒྱུ་འདི་ཧ་ཅང་གལ་ཆེན་པོ་རེད། སྐབས་རེ་ང་རང་ཚོའི་བཤད་གྲྭ་ཆེན་པོ་དེ་ཚོས་སློབ་གཉེར་རྐྱང་པའི་ཐོག་ལ་ཤུགས་བརྒྱབ་ནས་སློབ་གཉེར་དེ་ཡང་རྟགས་གསལ་རྐྱང་པའི་ཐོག་ལ་ཤུགས་བརྒྱབ་ནས་བསམ་བློ་བཏང་བ་མ་གཏོགས་འདི་གཞུང་དོན་ལམ་གྱི་རིམ་པར་སྒྲིག་ནས་ཉམས་ལེན་བྱ་རྒྱུར་སྐབས་རེ་ཏོག་ཙམ་ལྷོད་ཡངས་འགྲོ་རྒྱུ་དེ་འདྲ་ཡོང་བཞིན་འདུག

དེར་བརྟེན་བར་སྐབས་ང་ཚོའི་གདན་ས་ཁག་ཏུ་བསྒྲུབ་གྲྭ་དང་སྒོམ་གྲྭ་འཛུགས་དགོས་ཀྱི་འདུག་བསམ་ནས་དགེ་རྒན་རྣམ་པ་ཚོ་ཡིན་ནའང་དབུ་འཕར་དང་ཚད་མའི་གཞུང་སོགས་པུ་ཏི་ལྔ་དེ་དག་སློབ་ཁྲིད་བྱེད་བཞིན་ཡོད་པ་དེ་དག དགེ་ལུགས་པར་ཆ་མཚོན་ན་རྗེ་རིན་པོ་ཆེས་མཛད་པའི་ལམ་རིམ་ཆེ་ཆུང་རེད། དེ་བཞིན་ཕར་ཕྱིན་དང་འདྲེས་ནས་འགྲེལ་བཤད་བསྐྱོན་མཁན་འདི་རྣམ་ཤེས་སྙིང་རྒྱན་རྒྱལ་ཚབ་རིན་པོ་ཆེས་མཛད་པ་རེད། རིན་པོ་ཆེས་ཕར་ཕྱིན་གྱི་བཤད་པ་གནང་བཞིན་དུ་ལམ་རིམ་ལ་ཞལ་འཕང་གནང་ནས་གནང་བཞིན་ཡོད། དེར་བརྟེན་ང་ཚོའི་དཔེ་ཁྲིད་དགེ་རྒན་ཚོས་ཀྱང་ཐོས་དོན་བསྒྲུབ་ལ་གཞོལ་སྟངས་འདི་གང་འདྲ་གཞོལ་དགོས་མིན་དེ་དག་ངོ་སྤྲོད་དང་། མཚམས་འབྱོར་བྱ་རྒྱུ་དེ་དག་ཧ་ཅང་གལ་ཆེན་པོ་ཆགས་ཡོད། བཤད་བསྒྲུབ་ཟུང་འབྲེལ་ཐོག་ནས་སངས་རྒྱས་བསྟན་པའི་ཞབས་འདེགས་བསྒྲུབ་ཐུབ་པ་བྱུང་ན་དེ་རིང་ཁ་སང་སྤྱིར་སངས་རྒྱས་ཀྱི་བསྟན་པ། ཡང་སྒོས་བོད་གངས་ཅན་ལྗོངས་ཀྱི་སངས་རྒྱས་ཀྱི་བསྟན་པ་ཉག་ཕྲ་བོའི་སྒང་ལ་གནས་ཡོད་པ་དེར་བསྟན་པའི་ཞབས་འདེགས་ནུས་པ་ཐོན་པ་ཞིག་བསྒྲུབ་ཐུབ་པ་ཞིག་ཡོང་རྒྱུ་ཡིན་པ་འདི་ཁྱེད་ཚོས་བློ་ལ་འཇོགས། བསྒྲུབ་པ་ཉམས་ལེན་བྱ་རྒྱུ་གལ་ཆེན་པོ་ཡིན་དུས་སློབ་གཉེར་ཐོན་ནས་རབ་བྱུང་ན་བྱ་བྲལ་བྱས་ནས་ཚེ་དང་བསྒྲུབ་པ་མཉམ་པ་འགྲོ་རྒྱུ་བྱུང་ན་རབ་རེད། དེ་འདྲ་བྱེད་མཁན་ཉུང་ཤས་མ་གཏོགས་ཚང་མས་བྱེད་ཐུབ་རྒྱུ་མ་རེད། ཚང་མས་བྱས་ཀྱང་དེར་བསམ་བློ་གཏོང་དགོས་པ་ཞིག་རེད། གང་ལྟར་མི་རབས་ནས་མི་རབས་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་བྱེད་དགོས་སྟབས་ཁྱེད་ཚོ་སློབ་གཉེར་ཐོན་མཁན་དེ་ཚོས་བཙུན་དགོན་སོ་སོའི་ནང་སྡད་ནའང་འདྲ། དགེ་རྒན་གྱི་འགན་འཁྱེར་ནས་གཞན་ལ་སློབ་ཁྲིད་བྱེད་ཐུབ།

ད་སྐབས་བཙུན་དགོན་མང་ཆེ་བའི་ནང་དཔེ་ཆ་ཁྲིད་མཁན་རབ་བྱུང་ཆགས་ཡོད། དགེ་སློང་ལ་རེ་དགོས་ཀྱི་ཡོད། མཇུག་ཏུ་དགེ་སློང་ལ་རེ་མི་དགོས་པར་བཙུན་མ་རང་ཉིད་ཀྱིས་མཁན་པོ་ལམ་སེང་ཡོང་མ་ཐུབ་ནའང་སློབ་དཔོན་བྱས་ནས་སློབ་ཁྲིད་དགེ་རྒན་བཙུན་མ་རང་ཉིད་ཀྱིས་བྱེད་ཐུབ་པ་ཞིག་དགོས། བཙུན་དགོན་ཚོའི་ནང་སློབ་ཁྲིད་བྱ་རྒྱུའི་ལས་འགན་བྱས་པ་ཙམ་དུ་མ་ཟད། སློབ་གྲྭ་ཁག་གི་ནང་དུའང་ཆོས་དགེ་བཙུན་མ་དེ་འདྲ་བྱུང་བ་ཡིན་ན་ཏན་ཏན་ཕན་ཐོགས་ཆེན་པོ་ཡོང་རྒྱུ་རེད་བསམ་གྱི་འདུག འདི་གལ་ཆེན་པོ་འདུག སྤྱི་ཚོགས་ནང་དུ་ནང་ཆོས་འགྲེལ་བཤད་རྒྱག་མཁན་རབ་བྱུང་མ་དེ་འདྲ་བྱུང་བ་ཡིན་ན་ཏན་ཏན་ཕན་ས་རེད། འདི་གལ་ཆེན་པོ་འདུག ཕྱི་རྒྱལ་ཆོས་ཚོགས་ཁག་ལ་ཡིན་ནའང་རྟེན་བུད་མེད་ཀྱི་ཐོག་ནས་ནང་ཆོས་འགྲེལ་བཤད་རྒྱག་ཐུབ་མཁན་བྱུང་བ་ཡིན་ན་ཧ་ཅང་གལ་ཆེན་པོ་འདུག རབ་ལ་ཚེ་གཅིག་བསྒྲུབ་ལ་གཞོལ་ནས་འགྲོ་རྒྱུ་དང་། རིམ་པ་གཉིས་པ་འདི་སློབ་ཁྲིད་ཀྱི་འགན་འཁྱེར་ནས་བཙུན་དགོན་རང་ཉིད་ནང་དུ་ཡིན་ནའང་རེད། ཡང་ན་སློབ་གྲྭ་ཁག་གི་ནང་དུ་ཡིན་ནའང་རེད། དེ་བཞིན་སྤྱི་ཚོགས་ནང་ཡིན་ནའང་བསྟན་པའི་ཞབས་འདེགས་བསྒྲུབ་ཐུབ་པ་ཞིག་ཡོང་རྒྱུ་འདི་སེམས་ལ་འཇོགས། སྡུག་ས་གཅིག་ནས་བཤད་ན་གལ་ཏེ་ཆོས་སྒོ་མ་ཐོན་ནའང་རང་ཉིད་ནང་གི་ཨ་མ་བྱས་ནས་དངོས་ནས་ནང་ཁྱིམ་དེའི་ནང་དུ་རང་ཉིད་ཀྱི་ཕྲུ་གུ་ཚོར་ཆུང་དུས་ནས་ནང་ཆོས་ངོ་སྤྲོད་ཐོག་ནས་བསླབ་ཐུབ་པ་ཞིག་བྱེད་དགོས། དེ་འདྲ་ཞིག་བྱུང་བ་ཡིན་ན་དངོས་གནས་ཕུགས་རྒྱང་རིང་པོར་བསྟན་པ་འཛིན་སྐྱོང་སྤེལ་གསུམ་བྱ་རྒྱུ་ཕྲུ་གུ་ཚོའི་བསམ་བློའི་ནང་སངས་རྒྱས་པའི་ཆོས་ཀྱི་འགྲོ་སྟངས་དེ་དག་ཤེས་ན་ཧ་ཅང་ཕན་ཐོགས་ཡོད།

ད་ལྟ་ང་ཚོའི་གཞིས་ཆགས་ཁག་ནས་གདན་ས་ཁག་ནང་བཞུགས་མཁན་ཉུང་ཉུང་ཆགས་ཡོད། གང་ཡིན་བརྗོད་ན་ཆོས་ལ་བག་ཆགས་དེ་ཙམ་མེད་པས་རེད། ཕ་མ་ཚོས་མ་ཤེས། སློབ་གྲྭའི་ནང་དུ་ཆོས་དགེ་ཡོད་ཀྱང་ཆོས་དགེས་མཐུས་ཤོར་ཧ་ཅང་ཕྱིན་འདུག དེ་རིང་ཁ་སང་གདན་སའི་ནང་དུའང་སློབ་གཉེར་ཐོག་ཤུགས་རྒྱག་མཁན་དེ་དག་ཧི་མཱ་ལ་ཡི་རི་རྒྱུད་ནས་ཡིན་པ་ཚོ་དང་བོད་ནང་ཡོང་མཁན་དེ་དག་ཆགས་ཡོད་པ་མ་གཏོགས་རྒྱ་གར་ནང་གི་བོད་མིའི་གཞིས་ཆགས་ཁག་ནས་ཡོང་མཁན་ཧ་ཅང་ཉུང་ཉུང་ཆགས་ཡོད། དེ་འདྲ་ཡིན་དུས་ང་ཚོས་མང་ཚོགས་ཁྲོད་ནང་ཆོས་ཀྱི་གོ་རྟོགས་སྤེལ་ཐུབ་པ་བྱུང་ན་ནང་ཆོས་ལ་ཡིད་འཕྲོག་རྒྱུ་ཞིག་དང་ཤེས་ནས་དད་པ་ཐོབ་རྒྱུ་ཞིག་ཡོང་རྒྱུ་རེད། འདི་ཧ་ཅང་གལ་ཆེན་པོ་རེད། ཆོས་བསླབ་བརྗོད་སྐབས་ཁ་འདོན་དང་མ་ཎི་འདྲེན་རྒྱུ་ཙམ་མིན།

གཞི་ལམ་འབྲས་གསུམ་གྱི་རྣམ་གཞག་དེ་དག་ཤེས་པའི་ཐོག་ནས་ཆོས་ཉམས་ལེན་བྱེད་དགོས། དེ་འདྲ་མིན་ན་བཀའ་བསྟན་པོ་ཏི་གསུམ་བརྒྱ་དགོས་དོན་མེད། འདི་ངོས་ཀྱིས་ཁྱེད་ཚོར་བརྗོད་འདོད་བྱུང་། གཞན་ངོས་ལ་ཤོད་རྒྱུ་མེད། ཐུགས་རྗེ་ཆེ། བཀྲ་ཤིས་བདེ་ལེགས། ཞེས་བཀའ་སློབ་བཀྲིན་ཆེ་བ་སྩལ།།