༢༠༡༣ ཟླ་ ༡༠ ཚེས་ ༨ རེས་གཟའ་མིག་དམར།
༄༅། འདི་གར་བྷེང་ལོར་ལྷོ་སྤྱི་ལས་ཁུངས་ནས་ཕྱི་ལོ་ ༢༠༡༣ ཟླ་ ༡༠ ཚེས་ ༧ ཉིན་བཏང་གནས་ནང་འཁོད་དོན། བྷེང་ལོར་ལྷོ་སྤྱི་ལས་ཁུངས་ཀྱི་གོ་སྒྲིག་འོག་ཨུ་ཊི་དང་ཀོ་ཊི་ཀར་ནལ་བོད་མིའི་ཚོང་རིགས་སྡེ་ཚན་དང་མེ་སོར་ཁུལ་གྱི་བོད་པའི་མཐོ་རིམ་སློབ་མ་རྣམས་ལ་ནང་ཆོས་ངོ་སྤྲོད་ཀྱི་ལས་འཆར་ཞིག་སྤེལ་ཡོད། དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་རང་རེའི་མི་སྐྱ་རྣམས་ནས་ཀྱང་ནང་ཆོས་ལ་སློབ་སྦྱོང་བྱ་རྒྱུ་གལ་ཆེ་ཡིན་སྐོར་བཀའ་སློབ་རིམ་ཕེབས་དགོངས་དོན་ལྟར་ཕྱི་ཟླ་༡༠ ཚེས་༤ ནས་ ཆེས་༦ བར་སེར་བྱེས་དགེ་བཤེས་ལྷ་རམས་པ་ཐུབ་བསྟན་ནོར་བུ་མཆོག་གདན་ཞུས་ཀྱིས་ཁྱབ་ཁོངས་ས་གནས་ཨུ་ཊི་དང་ཀོ་ཊི་ཀར་ནལ་དུ་གནས་སྡོད་བོད་པའི་ཚོང་པ་རྣམས་དང་མེ་སོར་ཁུལ་གྱི་བོད་པའི་མཐོ་རིམ་སློབ་མ་རྣམས་ལ་གཙོ་བོ་ནང་ཆོས་ཞེས་པ་ནང་སེམས་ལ་བསྒྱུར་བཅོས་གཏོང་རྒྱུ་ཡིན་སྐོར་དང་། དེ་བཞིན་སྐྱབས་འགྲོ་དང་། ལས་འབྲས། སྐྱེ་བ་སྔ་ཕྱི་སྐོར་འགྲེལ་བཤད། མ་ཎི་ཡིག་དྲུག་གི་མཚན་དོན་དང་ཕན་ཡོན་སྐོར་། ལྷག་པར་བོད་མིའི་སྤྱི་ཚོགས་ནང་ཡ་རབས་བཟང་སྤྱོད་མི་ཉམས་ཆེད་རྒྱུན་དུ་ལྷ་ཆོས་དགེ་བ་བཅུ་དང་མི་ཆོས་གཙང་མ་བཅུ་དྲུག་གི་འབྲུ་དོན་འགལ་མེད་ཉམས་ལེན་གནང་ཐབས་དགོས་པ་སོགས་གོ་བདེ་དཔེ་མཚོན་དང་སྦྲགས་ཞིབ་ཕྲ་འགྲེལ་བརྗོད་གནང་བར་བརྟེན་མང་ཚོགས་ངོས་ནས་ཀྱང་ཐུགས་སྣང་ཆེན་པོའི་ངང་ནས་གསན་འཇོག་གནང་བ་མ་ཟད་མཇུག་ཏུ་དོགས་དྲི་ཁག་ལ་ལན་འདེབས་ཁ་གསལ་གནང་ཡོད། ད་དུང་བྷེང་ལོར་ལྷོ་སྤྱི་ལས་ཁུངས་ནས་རྒྱ་གར་ལྷོ་ཕྱོགས་མཐོ་སློབ་ཁག་ནང་ཡོད་པའི་བོད་པའི་སློབ་མ་རྣམས་ལ་ནང་ཆོས་ངོ་སྤྲོད་ཀྱི་ལས་འཆར་མུ་མཐུད་སྤེལ་འཆར་ཡོད་འདུག
