༢༠༡༣ ཟླ་ ༡༠ ཚེས་ ༩ རེས་གཟའ་ལྷག་པ།

༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༣ ཟླ་ ༡༠ ཚེས་ ༢ ཉིན་བོད་མདོ་སྨད་མགོ་ལོག་ར་རྒྱར་ཡོད་པའི་གངས་ལྗོངས་རྩྭ་ཐང་བུ་མོའི་སློབ་གྲྭའི་སློབ་མ་ཚོ་ཕྱི་རྒྱལ་དུ་སློབ་སྦྱོང་ཆེད་བསྐྱོད་རྒྱུའི་ཁོངས་སུ་འདེམས་ཐོན་བྱུང་ཡོན་ནའང་རྒྱ་ནག་གཞུང་གིས་བཀག་འགོག་བྱས་པར་བརྟེན། གོང་ཚེས་ཉིན་སློབ་མ་ཁག་གཅིག་གིས་ཟི་ལིང་གི་སྲིད་གཞུང་མདུན་དུ་འཛོམས་ནས་སྲིད་གཞུང་གིས་དཔོན་རིགས་མཐོ་པོའི་བུ་ཕྲུག་ཕྱི་རྒྱལ་གྱི་སློབ་གྲྭ་འགྲིམས་ཕྱོགས་པ་དང་བོད་རིགས་མི་སེར་གྱི་སློབ་ཕྲུག་རྣམས་ཕྱི་རྒྱལ་གྱི་སློབ་གྲྭ་འགྲིམས་མི་ཆོག་པ་དེར། ང་ཚོས་སྤྱི་དམངས་ཀྱི་ཐོབ་ཐང་བེད་སྤྱོད་བཏང་ནས་སྲིད་གཞུང་གི་འདྲ་མཉམ་མེད་པའི་བྱེད་ཕྱོགས་འདིར་ངོ་རྒོལ་བྱེད་ཀྱི་ཡོད་ཅེས་བཀོད་པའི་ཕྲད་དར་ཕྱར་ནས་ངོ་རྒོལ་བྱས་ཡོད་པའི་གནས་ཚུལ་ཐོན་འདུག དེ་ཡང་ཕྱི་ཟླ་ ༧ ཚེས་ ༨ ཉིན་ཨ་རིའི་ Skagit Valley College ཞེས་པའི་སློབ་གྲྭ་ནས་སློབ་མ་འདེམས་མཁན་ཁག་གཅིག་གིས་གངས་ལྗོངས་རྩྭ་ཐང་བུ་མོའི་སློབ་གྲྭ་དང་གངས་ལྗོངས་ཤེས་རིག་ནོར་བུ་གླིང་སློབ་གཉིས་ཀར་ཕེབས་ཏེ། མཐར་ཕྱིན་སློབ་མ་རྣམས་ལ་དབྱིན་སྐད་ངག་རྒྱུགས་དང་འབྲི་རྒྱུགས་བླངས་མཐར་སློབ་མ་ ༤༢ རྒྱུགས་འཕྲོད་དེ་ཨ་རིའི་སློབ་གྲྭ་དེར་མཐའ་མའི་མི་འགྲོའི་ཁོངས་སུ་འདེམས་ཐོན་བྱུང་ཡོད་འདུག ཕྱི་ཟླ་ ༧ ཚེས་ ༩ ཉིན་མཚོ་སྔོན་མི་རིགས་སློབ་གྲྭ་ཆེན་མོར་སྐད་ཡིག་གླིངདུ་གངས་ལྗོངས་ཤེས་རིག་ནོར་བུ་གླིང་སློབ་ཀྱི་སློབ་མ་ ༡༣ དང་གངས་ལྗོངས་རྩྭ་ཐང་བུ་མོའི་སློབ་གྲྭའི་སློབ་མ་ ༢༡ བཅས་ཁྱོན་སློབ་མ་གྲངས་ ༣༤ ཉི་ཧོང་དུ་སློབ་བསྐྱོད་ཆོག་པའི་ཐག་གཅོད་བྱུང་ནས་སློབ་མ་ཁག་གཅིག་སློབ་བསྐྱོད་ཐུབ་པ་བྱུང་ཡོད་ཀྱང། སློབ་མ་ཁག་གཅིག་ལ་རྒྱ་ནག་གཞུང་གིས་ཕྱིར་བསྐྱོད་ལག་འཁྱེར་མ་སྤྲད་པར་སློབ་སྦྱོང་གི་མདུན་ལམ་བཀག་འགོག་བྱས་རྐྱེན་གྱིས་ཕྱི་ཟླ་ ༡༠ ཚེས་ ༢ ཉིན་ཟི་ལིང་གི་སྲིད་གཞུང་མདུན་དུ་དྲང་བདེན་མ་ཡིན་པའི་བྱ་སྤྱོད་དེར་ངོ་རྒོལ་བྱས་ཡོད་འདུག སྐབས་དེར་སློབ་མ་རྣམས་ཀྱིས་རྒྱུ་ནོར་ཡོད་མཁན་དང་དཔོན་པོ་མཐོ་པོའི་ཕྲུ་གུ་རྣམས་ཕྱི་རྒྱལ་དུ་སློབ་གྲྭར་འགྲོ་ཆོག་པ་དང། ང་ཚོ་མི་ཚང་དཀྱུས་མའི་སློབ་ཕྲུག་ལ་ཐོབ་ཐང་གཅིག་གྱུར་དགོས་པའི་འབོད་སྐུལ་ཞུས་འདུག་པ་བཅས།།