༢༠༡༣ ཟླ་ ༡༠ ཚེས་ ༡༧ རེས་གཟའ་ཕུར་བུ།
༄༅། །བོད་ནས་གནས་ཚུལ་ཁུངས་ལྡན་འབྱོར་བ་ལྟར་ན། བོད་ཤར་ཕྱོགས་ཁམས་ནགས་ཤོད་འབྲི་རུ་རྫོང་རྩ་ལ་ཤང་གྲོང་ཚོ་དང་པོ་ནས་ཡིན་པའི་སྐལ་བཟང་ཟེར་བའི་བུད་མེད་ཅིག་འདི་ཟླའི་ཚེས ༡༡ སྔ་དྲོའི་ཆུ་ཚོད ༡༡ ཙམ་ལ་བོད་ལྗོངས་ནག་ཆུ་ས་གནས་མཐོ་སྒང་ལམ་བདེ་འབྱང་མགྲོན་ཁང་སྒོ་འགྲམ་ནས་གློ་བུར་ཐོག་རྒྱག་ངང་ས་གནས་ཉེན་རྟོག་པས་འཛིན་བཟུང་བྱས་འདུག རྒྱ་ནག་གཞུང་གིས་སྐལ་བཟང་ལགས་འཛིན་བཟུང་བྱེད་དགོས་པའི་རྒྱུ་མཚན་ནི་སྐད་འཕྲིན we chat གི་གླེང་སྟེགས་ཚོགས་པ་འགའ་ཤས་ནང་སྐད་ཆ་འདྲ་མིན་བཤད་ཡོད་པ་དང་། སྐད་འཕྲིན་ནང་ངོས་སུ་གོང་ས་མཆོག་གི་སྐུ་པར་སོགས་རྒྱ་གཞུང་གིས་བཀག་སྡོམ་བྱས་པའི་སྐུ་པར། དེ་བཞིན་བཀག་སྡོམ་བྱས་ཡོད་པའི་བོད་ཀྱི་གླུ་གཞས་ཅི་རིགས་ཉར་ཚགས་བྱས་ཡོད་པའི་རྒྱུ་མཚན་ཁོ་ན་ཙམ་གྱིས་འཛིན་བཟུང་བྱས་འདུག སྐལ་བཟང་ལགས་གློ་བུར་ངང་འཛིན་བཟུང་བྱས་རྗེས་ཁོ་མོའི་སྤུན་ཤ་ཉེ་ཚོས་འབྲེལ་ཡོད་ལས་ཁུངས་སུ་བཅར་ནས་སྐལ་བཟང་ལགས་གང་བྱུང་འཛིན་བཟུང་བྱས་དགོས་པའི་རྒྱུ་མཚན་དང་ནག་ཉེས་ཅི་ཡོད་སྐད་ཆ་དྲིས་པར། འབྲེལ་ཡོད་ལས་ཁུངས་འགོ་ཁྲིད་ཚོས་གང་དུ་ཡོད་མེད་ཤེས་ཀྱི་མེད་ཚུལ་བརྗོད་ཡོད་པ་མ་ཟད། ཐག་གཅོད་བྱས་མ་ཚར་བར་དུ་དེའི་སྐོར་ཧ་གོ་ཐུབ་རྒྱུ་མིན་ཚུལ་བརྗོད་ནས་ལན་ཁ་གསལ་སྤྲད་མེད། དུས་སྐབས་དེ་ནས་བཟུང་ད་བར་སྐལ་བཟང་ལགས་གང་དུ་ཁྲིད་ཡོད་མེད་ཤེས་རྟོགས་ཅི་གང་མེད་པ་རེད་འདུག སྐལ་བཟང་ལགས་ནི་བོད་ཀྱི་བུད་མེད་བྱིངས་ལྟར་ཁྱིམ་འཛིན་མ་དཀྱུས་མ་ཞིག་ཡིན་འདུག་ལ་མོ་རང་ལ་ཕྲུ་གུ་གསུམ་ཡོད་པ་ལས། བུ་མོ་ཆེ་བ་སྲིད་ཐར་ཚེ་མཚོ་ལོ ༡༡ དང་། འབྲིང་བ་ལོ ༩ དང་མི་ངལ་ལྷ་མོ་ཟེར། བུ་མོ་ཆུང་བ་བཀྲ་ཤིས་ལྷ་མོ་ལོ ༤ ཡིན་འདུག
