༢༠༡༣ ཟླ་ ༡༠ ཚེས་ ༣༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༡༠ ཚེས་ ༣༡ ཉིན་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་སྦིར་བོད་མིའི་གཞིས་ཆགས་སུ་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཝིར་བྷ་དྷར་སིངྒ་མཆོག་དང་ལྷན་མཇལ་འཕྲད་གནང་ཡོད། དེ་ཡང་གོང་ཚེས་ཉིན་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་དང་ནང་སྲིད་བཀའ་བློན་མཆོག་རྣམ་གཉིས་ལ་ཀང་ར་རྫོང་ཁོངས་སུ་ཡོད་པའི་སྦིར་བོད་མིའི་གཞིས་ཆགས་ཁུལ་དུ་མངའ་སྡེའི་ཡུལ་སྐོར་སྤྲོ་འཆམ་ལས་ཁུངས་ཀྱིས་གོ་སྒྲིག་འོག་བདུན་ཕྲག་གཅིག་གི་རྒྱལ་སྤྱིའི་པེ་ར་གྷི་ལའི་ཌིང་འམ་མཁའ་དབྱིང་འཕུར་ལྡིང་རྩེད་འགྲན་་མཇུག་སྒྲིལ་གྱི་མཛད་སྒོར་གདན་ཞུ་ལྟར་ཆེད་ཕེབས་གནང་ཡོད།
དེ་ཉིན་མཛད་སྒོ་དང་བསྟུན་ནས་སྦིར་དཔལ་ཡུལ་ཆོས་འཁོར་གླིང་དགོན་པའི་ནང་སྦིར་བོད་མིའི་གཞིས་ཆགས་སུ་རྟེན་གཞི་བྱས་པའི་པདྨ་ཨེ་ཝམ་ཆོས་སྒར་འགྱུར་མེད་གླིང་དགོན་པ་འམ་མཆོག་གླིང་དགོན་པ་དང་། ས་སྐྱ་དང་རྙིང་མ་དགོན་པ། དེ་བཞིན་སྦིར་ཅོན་ཏྰ་ར་ཁུལ་གྱི་བོད་མིའི་གཞིས་ཆགས་བཅས་ནས་མངའ་སྡེའི་སྤྱི་ཁྱབ་བློན་ཆེན་མཆོག་དང་ནང་སྲིད་བཀའ་བློན་མཆོག་རྣམ་གཉིས་ཀྱིས་གཙོས་འབྲེལ་ཡོད་མངའ་སྡེའི་གྲོང་ཁྱེར་ཡར་རྒྱས་བློན་ཆེན་མཆོག་དང་། ཀང་ར་རྫོང་དང་མན་ཌི་རྫོང་གི་སྐོར་སྲུང་སྤྱི་ཁྱབ་པ། དེ་བཞིན་རྫོང་དཔོན་སོགས་དཔོན་རིགས་ཁག་ཅིག་དང་། བོད་མིའི་ས་གནས་གཞིས་ཆགས་དང་དགོན་སྡེ་ཁག་གི་ལས་སྣེ་རྣམ་པ་བཅས་ལ་གསོལ་ཚིགས་འདེགས་འབུལ་ཞུས་ཡོད་པས་མ་ཟད། ས་གནས་བོད་མི་ཚོས་གཞས་སྣ་འཁྲབ་སྟོན་ཡང་གཟིགས་འབུལ་ཞུས་འདུག བཀའ་བློན་མཆོག་གིས་མཇལ་འཕྲད་དང་བསྟུན་ནས་མངའ་སྡེའི་སྤྱི་ཁྱབ་བློན་ཆེན་མཆོག་ལ་བོད་མིའི་བདེ་སྡུག་ཁག་ཅིག་སྙན་སེང་ཡང་ཞུས་གནང་འདུག
སྤྱིར་བཏང་མཁའ་དབྱིང་འཕུར་ལྡིང་རྩེད་འགྲན་་ནང་འཛམ་གླིང་ས་ཕྱོགས་གང་ས་ནས་མཉམ་ཞུགས་གནང་གི་ཡོད་པ་དང་། འདི་ལོར་འཛམ་གླིང་ཡུལ་གྲུ་འདྲ་མིན་ ༢༥ ཙམ་ནས་རྩེད་འགྲན་ཁྱོན་ ༡༠༧ མཉམ་ཞུགས་གནང་འདུག་པ་བཅས།།
