༢༠༡༣ ཟླ་ ༡༠ ཚེས་ ༡༦ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༡༠ ཚེས་ ༡༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མེཀ་སི་ཁོ་ཁུལ་གྱི་ཉིན་མཐའ་མར་ཆོས་འབྲེལ་དང་བཀའ་སློབ་སོགས་ཀྱི་མཛད་འཕྲིན་ཁག་ལེགས་པར་གྲུབ་རྗེས། རྒྱལ་ཁབ་དེའི་སྲིད་འཛིན་ཟུར་པ་སྐུ་ཞབས་ཝིན་
སེནཊ་ཕོཀ་སི་Vicente Fox མཆོག་གིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར། གོང་ཚེས་ཉིན་གྱི་ཕྱི་དྲོ་༸གོང་ས་མཆོག་མེཀ་སི་ཁོ་ནས་མཁའ་ལམ་བརྒྱུད་རྒྱལ་ཁབ་དེའི་གོ་ཝ་ན་ཧུ་ཝ་ཏོ་(Guanajuato)མངའ་སྡེའི་གྲོང་ཁྱེར་ལི་ཨོན་ནང་༸ཞབས་སོར་བདེ་བར་འཁོད་འདུག སྐབས་དེར་གནམ་ཐང་དུ་རྒྱལ་ཁབ་དེའི་གྲོས་ཚོགས་གོང་མའི་འཐུས་མི་དང་གནད་ཡོད་མི་སྣ་བཅས་ཀྱིས་ཕེབས་བསུར་བཅར་ཡོད། དེ་རྗེས་མགོན་པོ་གང་ཉིད་མཆོག་ཕོཀ་སི་བསྟི་གནས་ཁང་དུ་ཆིབས་སྒྱུར་བསྐྱངས་སྐབས་ཡུལ་དེའི་སྲིད་འཛིན་ཟུར་པ་སྐུ་ཞབས་ཝིན་སེནཊ་ཕོཀ་སི་མཆོག་དང་སྐུ་འཁོར་ལྷན་རྒྱས་ཀྱིས་གཙོས་སློབ་ཕྲུག་མང་པོ་ཞིག་གིས་ཕེབས་བསུའི་སྣེ་ལེན་གཟབ་རྒྱས་ཞུས་འདུག
གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་གིས་མེཀ་སི་ཁོ་ཁུལ་གྱི་ཉིན་མཐའ་མའི་མཛད་འཆར་ཁྲོད་སྤྱོད་འཇུག་ཆེན་མོའི་བཀའ་ཆོས་མཇུག་སྒྲིལ་མཛད་རྒྱུ་དང་། སྔ་དྲོར་ཆོས་ཞུ་བ་ཚོར་སེམས་བསྐྱེད་ཀྱི་སྡོམ་པ་འབོགས་ཆོག་དང་། ཕྱེད་ཡོལ་ན་གཞོན་ཚོར་བཀའ་སློབ་མ་སྩལ་གོང་ (National Geographic) ཞེས་པའི་དུས་དེབ་ཀྱི་རྩོམ་སྒྲིག་པ་ལྕམ་སྐུ་Fernanda Gonzalez Vilchisལགས་ཀྱིས་བཅར་འདྲིར་བཀའ་ལན་སྩལ་ཡོད། དེ་རྗེས་གྲོས་ཁྱེར་དེའི་ཨེ་རི་ན་ཚོགས་ཁང་ཆེན་མོའི་ནང་ཆིབས་སྒྱུར་བསྐྱངས་ཏེ་མགོན་པོ་གང་ཉིད་མཆོག་དང་ལྷན་ཚོགས་ཁང་དེའི་ནང་ལྷན་ཞུགས་
གནང་མཁན་ཆོས་ལུགས་འདྲ་མིན་གྱི་དབུ་ཁྲིད་རྣམས་དང་ལྷན་མཇལ་འཕྲད་མཛད་ཡོད། སྐབས་དེར་གྲོང་ཁྱེར་དེའི་ཁུལ་གྱི་སློབ་གྲྭ་ཁག་གི་དགེ་ལས་སློབ་ཕྲུག་དང་ཕ་མ་བཅས་ཁྱོན་མི་གྲངས་ ༡༢༠༠༠ བརྒལ་བར་ཤེས་ཡོན་སློབ་གསོའི་ཁྲོད་ཆོས་དང་མ་འདྲེས་པའི་བཟང་པོའི་ཡོན་ཏན་གོང་མཐོར་གཏོང་ཐབས་ཀྱི་བརྗོད་གཞིའི་ཐོག་བཀའ་སློབ་སྩལ་འདུག སྐབས་དེར་༸གོང་ས་མཆོག་གིས་སློབ་ཕྲུག་ཚོར་ཕྱི་དངོས་པོ་ཡར་རྒྱས་འགྲོ་བ་དང་དུས་མཚུངས་ནང་སེམས་ཀྱི་བཟང་པོའི་ཡོན་ཏན་གོང་མཐོར་གཏོང་རྒྱུ་ཧ་ཅང་གལ་ཆེན་པོ་ཡིན་སྐོར་བཀའ་སློབ་ཕེབས་དོན།
དེ་རིང་འདིར་ཡོད་པའི་གཞོན་སྐྱེས་ཁྱེད་རང་ཚོ་དུས་རབས་ ༢༡ པའི་མི་རབས་ཤིག་ཆགས་ཡོད། དུས་རབས་ ༢༠ ནང་ཕྱོགས་གཅིག་ནས་འགྲོ་བ་མིའི་ལོ་རྒྱུས་ནང་ཕྱི་དངོས་པོའི་ཡར་རྒྱས་ཧ་ཅང་ཡག་པོ་ཕྱིན་ཡོད་ནའང་། ཕྱོགས་གཞན་ཞིག་ནས་དུས་རབས་དེའི་ནང་དྲག་གཅོད་དང་མི་གསོད་ཁྲག་སྦྱོར་ཚབས་ཆེ་བྱུང་ཡོད། འདས་པ་དེར་བསྐྱར་བཅོས་བྱེད་རྒྱུ་མེད་པར་བརྟེན་མ་འོངས་པ་དེ་བཟོ་ལྟ་གང་འདྲ་ཞིག་བཟོ་རྒྱུ་དེ་ཁྱེད་ཚོའི་ལག་ཏུ་ཡོད། དུས་རབས་ ༢༡ པའི་ནང་རྩོད་རྙོག་རིགས་དེ་དག་འདུམ་འགྲིག་དང་གུས་བརྩི་ལྡན་པའི་གྲོས་མོལ་གྱི་ལམ་ནས་སེལ་ཐབས་བྱེད་དགོས། ཞེས་སོགས་ཀྱི་བཀའ་སློབ་སྩལ།
