༢༠༡༣ ཟླ་ ༡༠ ཚེས་ ༡༧ རེས་གཟའ་ཕུར་བུ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་གྱིས། ཕྱི་ལོ་ ༢༠༡༣ ཟླ་ ༡༠ ཚེས་ ༡༢ ནས་དབུ་འཛུགས་ཀྱིས་ལྷོ་ཨ་རིའི་གླིང་ཕྲན་མེཀ་སི་ཁོ་རྒྱལ་ཁབ་ཀྱི་གྲོང་ཁྱེར་ཁག་ཏུ་མང་ཚོགས་ལ་ཆསོ་འབྲེལ་དང་བཀའ་སློབ། དེ་བཞིན་གནས་ཡོད་མི་སྣ་བཅས་མཇལ་འཕྲད་མཛད་པ་སོགས་ཉིན་གྲངས་ལྔའི་རིང་མཛད་འཕྲིན་ཁག་བསྐྱང་མུས་ལྟར། ཕྱི་ལོ་ ༢༠༡༣ ཟླ་ ༡༠ ཚེས་ ༡༦ ཉིན་༸གོང་ས་མཆོག་མེཀ་སི་ཁོའི་གྲོང་ཁྱེར་ལི་ཨོན་ནང་གི་མཛད་འཕྲིན་ཁག་ལེགས་པར་གྲུབ་རྗེས། ཉིན་དེའི་ཕྱི་དྲོར་རྒྱལ་ཁབ་དེའི་མངའ་སྡེ་ཛ་ཀ་ཊེ་ཀས་ (Zacatecas) ནང་༸ཞབས་སོར་བདེ་བར་འཁོད་འདུག སྐབས་དེར་གནམ་ཐང་དང་བཞུགས་གནས་གསོལ་སྒྲོན་ཁང་བཅས་སུ་མངའ་སྡེའི་སྲིད་སྐྱོང་མཆོག་གི་སྐུ་ཚབ་དང་གནད་ཡོད་མི་སྣ། དེ་བཞིན་གོ་སྒྲིག་ཚོགས་ཆུང་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་འདུག
ལྷག་པར་༸གོང་ས་མཆོག་གི་ཛ་ཀ་ཊེ་ཀས་ཁུལ་གྱི་མཛད་འཆར་དེ་མངའ་སྡེས་གོ་སྒྲིག་ཞུས་པ་ཞིག་ཡིན་འདུག ༸གོང་ས་མཆོག་གིས་མེཀ་སི་ཀོའི་ཁུལ་དུ་ཐེངས་བཞི་ཙམ་༸ཞབས་སོར་འཁོད་ཟིན་ཡོད་ནའང་ཛ་ཀ་ཊེ་ཀས་ཁུལ་དུ་ཆིབས་སྒྱུར་ཐེངས་དང་པོ་ཆགས་ཡོད། མངའ་སྡེ་དེའི་ནང་༸གོང་ས་མཆོག་གིས་ཡེ་ཤུའི་ཆོས་ལུགས་ཀྱི་ཆོས་དཔོན་ (Monsenor Sigifredo Noriega Barcelo) མཆོག་གིས་གོ་སྒྲིག་ཞུས་པའི་ཆོས་ལུགས་ཕན་ཚུན་དབར་གྱི་བགྲོ་གླེང་ཐོག་ལྷན་ཞུགས་དང་། དེཉིན་གྱི་ཕྱེད་ཡོལ་མགོན་པོ་གང་ཉིད་མཆོག་གིས་མངའ་སྡེ་དེའི་ནང་རྟེན་གཞི་བྱས་པའི་ཀོན་ཝེན་ཤན་(Conventon Center)བསྟི་གནས་ཁང་དུ་མང་ཚོགས་ ༥༠༠༠ བརྒལ་བར་བདེ་སྐྱིད་ཀྱི་ཐབས་ལམ་ཞེས་པའི་བརྗོད་གཞིའི་ཐོག་བཀའ་སློབ་སྩལ། དེ་བཞིན་གསར་འགོད་པ་དང་ལྷན་མཇལ་འཕྲད་སོགས་ཀྱི་མཛད་འཕྲིན་བསྐྱངས་ཡོད་པ་བཅས།།
