༢༠༡༣ ཟླ་ ༡༠ ཚེས་ ༩ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༡༠ ཚེས་ ༨ ཉིན་ཨ་རིའི་ཇོར་ཇི་ཡའི་ Georgia མངའ་སྡེའི་ཨེ་ཊ་ལེན་ཊའི་གྲོང་ཁྱེར་ནང་རྟེན་གཞི་བྱས་པའི་ཨེ་མོ་རི་གཙུག་ལག་སློབ་གཉེར་ཁང་དུ་མཛད་འཆར་ཁག་མི་འདྲ་བ་གཉིས་བསྐྱངས་ཡོད། དེ་ཡང་མཛད་འཕྲིན་གྱི་ཐོག་མར་༸གོང་ས་མཆོག་གིས་མང་ཚོགས་ལ་དུས་རབས་ ༢༡ སྐབས་འདིར་འགན་འཁུར་ལྡན་པའི་མི་སེར་ (Pillars of Responsible Citizenship in the 21st Century Global Village) ཞིག་བྱ་རྒྱུའི་དགོས་དམིགས་གཙོ་བོ་གང་ཡིན་སྐོར་བཀའ་སློབ་སྩལ། སྐབས་དེར་ཐོག་མར་༸གོང་ས་མཆོག་བཞུགས་གནས་མགྲོན་ཁང་ནས་གྷི་ཝིན་ནེ་ཊི་ས་གནས་སུ་ Gwinnet Arena ཆིབས་སྒྱུར་བསྐྱངས་སྐབས་ཨེ་མོ་རི་གཙུག་ལག་སློབ་ཁང་གི་ཚོགས་གཙོ་སྐུ་ཞབས་ཇེམ་སི་ཝེག་ནར་ Emory University President James Wagner མཆོག་གིས་ཕེབས་བསུ་གཟབ་རྒྱས་ཞུས་པ་དང་སྦྲགས། མང་ཚོགས་སྟོང་ཕྲག་མང་པོས་གུས་བསུའི་སྣེ་ལེན་གཟབ་རྒྱས་ཞུས་ཡོད།
དེ་རྗེས་ཚོགས་གཙོ་མཆོག་གིས་ངོ་སྤྲོད་གསུང་བཤད་གནང་སྐབས་ཨེ་མོ་རི་གཙུག་ལག་སློབ་གྲྭ་དེ་བཞིན་ཐོག་མར་གསར་གཏོད་གནང་མཁན་ཚོའི་དམིགས་ཡུལ་ནང་གཙུག་ལག་སློབ་གྲྭ་འདི་ནས་ཐོན་པའི་སློབ་ཕྲུག་རྣམས་མི་ཡག་པོ་ཞིག་བསྐྲུན་རྒྱུའི་རེ་བ་འཆང་ཡོད་སྐོར་གསུངས། དེ་ནས་༸གོང་ས་མཆོག་གིས་བཀའ་སློབ་མ་སྩལ་གོང་ཚོགས་ཁང་ནང་དུ་སྐུ་ཞབས་རི་ཆ་ཌི་མུར་Richard Moore ལགས་ཡོད་པ་གཟིགས་སྐབས་ཁོང་ལ་འཚམས་འདྲི་ཞུས་གནང་མཛད་པ་མ་ཟད། སྐུ་ཞབས་ཁོང་ནི་༸གོང་ས་མཆོག་གིས་དཔའ་བོ་ཞིག་ལ་ངོས་འཛིན་མཛད་བཞིན་ཡོད་སྐོར་བཀའ་སློབ་སྩལ་དོན། ཁོང་གི་མིག་དཔེ་བསྟན་པ་དེ་ཧ་ཅང་ཁྱད་དུ་འཕགས་པའི་དཔེ་མཚོན་ཞིག་ཆགས་ཡོད། ཁོང་རང་ལོ་ ༡༠ ཡིན་སྐབས་བྱང་ཕྱོགས་ཨ་ཡིར་ལེན་ཌིའི་ནང་གཟིང་འཁྲུག་སྐབས་འགྱིག་གི་མེ་མདེལ་ཕོག་སྟེ་མིག་གཉིས་ཀ་ལོང་བ་བཟོས་ཡོད་ཀྱང་འཁོན་འཛིན་གྱི་བསམ་བློ་མ་བཏང་བར་བཟོད་བསྲན་བསྟེན་ཡོད། ངོས་ཀྱི་སྐད་ཆ་མང་པོ་ཤོད་བཞིན་ཡོད་ཀྱང་ངོ་ཐོག་ལག་ལེན་ཁོང་གིས་གནང་བར་བརྟེན། རྒྱུན་ལྡན་ཁོང་ནི་ངོས་ཀྱིས་དཔའ་བོ་ཞིག་ཏུ་ངོས་འཛིན་བྱེད་བཞིན་ཡོད། ཅེས་བཀའ་སློབ་སྩལ་རྗེས་ཆོས་ལུགས་རིས་མེད་ལ་བསྟེན་པའི་བཟང་སྤྱོད་སྐོར་བཀའ་སློབ་སྩོལ་སྐབས་སྤྱི་ཚོགས་ནང་བཟང་ཕྱོགས་ཀྱིས་བསྒྱུར་བ་གཏོང་རྒྱུ་ཧ་ཅང་གལ་ཆེ་ཡིན་པ་དང་།
དེ་ལྟར་ཡོང་བར་ཐོག་མར་མི་སྒེར་རང་ཉིད་ཀྱི་བསམ་བློར་བསྒྱུར་བ་གཏོང་དགོས། རང་ཉིད་ཀྱི་སེམས་ལ་བསྒྱུར་བཅོས་མ་བཏང་བར་སྤྱི་ཚོགས་ནང་ཞི་བདེ་དང་བརྟན་ལྷིང་མེད་པ་དང་རྙོག་གྲ་ཡོད་སྐོར་སོགས་བརྒྱ་བཤད་གཏོང་བཤད་ཇི་ཙམ་བྱས་ཀྱང་ཕན་ཐོགས་མེད། འཛམ་གླིང་ནང་ཞི་བདེ་ཡོང་བར་ཤོག་ཅེས་སྨོན་ལམ་བརྒྱབ་ནས་ཕན་རྒྱུ་མེད། དོན་སྙིང་ལྡན་པའི་ཕན་ཐོགས་ཤིག་བྱེད་དགོས་ན་ཐོག་མར་རང་རྒྱུད་ཀྱི་ཉོན་མོངས་པའི་བསམ་བློ་དེ་དག་ལ་གཉེན་པོ་བསྟེན་ནས་བཏུལ་ཏེ། གང་ཐུབ་ཀྱིས་གཞན་ཕན་གྱི་བསམ་བློས་ཀུན་ནས་བླངས་ཏེ་གཞན་གྱི་བདེ་དོན་ལ་བསམ་བློ་མང་ཙམ་གཏོང་རྒྱུ་གལ་ཆེ་ཡིན་པ་དང་། དེའི་ཐོག་ནས་མི་སྒེར་གྱི་བསམ་བློར་བསྒྱུར་བ་བཏང་བ་བརྒྱུད་ནས་ཁྱིམ་ཚང་དང་དེ་ནས་སྤྱི་ཚོགས་ནང་བཟང་ཕྱོགས་ཀྱི་བསྒྱུར་བ་བཏང་བ་བརྒྱུད་ནས་འཛམ་གླིང་ནང་དོན་དམ་གྱི་ཞི་བདེ་དང་འཆམ་མཐུན་གྱི་ཁོར་ཡུག་གཅིག་སྐྲུན་ཐུབ་རྒྱུ་ཡིན་སྐོར་བཀའ་སློབ་སྩལ། དེ་རྗེས་མང་ཚོགས་ཀྱི་དྲི་བ་རྣམས་ལ་བཀའ་ལན་སྩལ། སྐབས་དེར་དྲི་བ་གཅིག་ནང་བོད་ནང་དགེ་འདུན་པ་ཚོས་རང་ལུས་མེར་སྲེག་གི་ལས་འགུལ་སྤེལ་བའི་གནད་དོན་སྐོར་དྲི་བ་ཞུས་པར་༸གོང་ས་མཆོག་གིས་བཀའ་ལན་སྩལ་དོན། གཅིག་ནས་གནས་ཚུལ་འདི་ཚོ་རྙོག་གྲ་ཚ་པོ་རེད། ནད་རྟགས་ལྟ་བུ་ཞིག་ཆགས་ཡོད། གནས་ཚུལ་ཐབས་སྐྱོ་བོ་དེ་དག་འབྱུང་སྐབས་ངོས་ཀྱིས་གསལ་བཤད་འདི་ལྟར་བྱེད་བཞིན་ཡོད། དྲག་གནོན་ཤུགས་ཆེའི་འོག་ཧ་ཅང་དཀའ་སྡུག་མྱངས་པའི་ན་ཚ་རྙིང་པ་ཡར་ལངས་པ་ལྟ་བུ་ཆགས་ཡོད། མི་བཟོད་པའི་རྣམ་འགྱུར་བསྟན་པ་ཞིག་ཡིན་པ་གསལ་པོ་རེད། གཉིས་ནས་ལས་འགུལ་དེ་རིགས་འཚེ་བའི་བྱ་སྤྱོད་ཡིན་མིན་དེ་གཙོ་བོ་ཀུན་སློང་ལ་རག་ལུས་ཡོད། དཔེར་ན། རང་ལུས་མེར་སྲེག་གཏོང་མཁན་གཅིག་གིས་རང་ཉིད་མ་འཆི་བའི་སྔོན་དུ་བཞག་པའི་ཁ་ཆེམས་ནང་གཞན་ཕན་གྱི་བསམ་བློ་རྒྱ་ཆེན་པོ་བཏང་ཡོད། དེ་དག་ནི་འཚེ་བའི་ལས་རེད་ཅེས་བརྗོད་མི་ཐུབ། ཐོག་མ་ཉིད་ནས་རང་ལུས་མེར་སྲེག་བཏང་བ་དེས་ཕན་ཐོགས་ཇི་ཙམ་ཡོང་བཞིན་ཡོད་མེད་ཐོག་ངོས་ལ་ཐེ་ཚོམ་ཡོད་པའི་བསམ་ཚུལ་བརྗོད་ཟིན་པ་མ་ཟད། ད་ཆ་ངོས་རང་བོད་མིའི་ཆབ་སྲིད་ཀྱི་ལས་འགན་ནས་ཡོངས་སུ་རྒས་ཡོལ་ཞུས་ཟིན་པ་བརྟེན། ཆབ་སྲིད་ཐོག་སྐད་ཆ་ཤོད་རྒྱུ་མེད།
ལྷག་པར་རྒྱ་ནག་གཞུང་ནས་ངོས་ཀྱི་སྐད་ཆ་དེ་ཚོར་དོནན་པོའི་ཐོག་ནས་ལྟ་བཞིན་ཡོད། ཅེས་སོགས་ཀྱི་བཀའ་ལན་སྩལ། ཕྱེད་ཡོལ་དུ་༸གོང་ས་མཆོག་གིས་ཚན་རིག་པ་གྲགས་ཅན་དང་སློབ་གསོའི་ལམ་ལུགས་ལ་མཁས་པ་ཁག་ཅིག་དང་ལྷན་དེང་དུས་ཀྱི་ཤེས་ཡོན་ལམ་ལུགས་ནང་ཆོས་ལུགས་རིས་མེད་ཀྱི་བཟང་པོའི་བསླབ་བྱའི་སློབ་གསོ་སྤྲོད་རྒྱུའི་སྐོར་བགྲོ་གླེང་མཛད་ཡོད། སྐབས་དེར་༸གོང་ས་མཆོག་གིས་དེང་སྐབས་ཚན་རིག་གི་གནས་ཚད་ཐོག་ཡར་རྒྱས་ཧ་ལས་ཕྱིན་ཡོད་པ་དང་། མིའི་ཀླད་པ་ཡར་རྒྱས་གཏོང་རྒྱུ་སོགས་ཀྱི་ཐོག་ལ་གྲུབ་འབྲས་ཧ་ཅང་ཐོན་ཡོད་པར་བརྟེན་ད་ཆ་ནང་གི་བསམ་བློའི་རྣམ་གཞག་དང་འབྲེལ་བའི་སེམས་ཀྱི་འཕྲོད་བསྟེན་སྐོར་ལ་དོ་སྣང་བྱ་རྒྱུའི་དུས་ལ་བསླེབས་ཡོད་སྐོར་སོགས་ཀྱི་བཀའ་སློབ་སྩལ། །
