༢༠༡༣ ཟླ་ ༡༠ ཚེས་ ༡༧ རེས་གཟའ་ཕུར་བུ།

༄༅། །ཕྱི་ལོ་ ༢༠༡༣ ཟླ་ ༡༠ ཚེས་ ༡༥ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མེཀ་སི་ཁོའི་སྲིད་འཛིན་ཟུར་པའི་གཟིམ་ཤག་ཏུ་མཇལ་མོལ་གྲུབ་མཚམས། གསར་དུ་བཞེངས་པའི་སྲིད་འཛིན་ཟུར་པ་ཝེ་སིན་ཏི་ཕོཀ་སིའི་Vicente Fox Center of Studies སྦྱོང་བརྡར་དང་དཔེ་མཛོད། འགྲེམས་སྟོན་ཁང་བཅས་ཡོད་པའི་བསྟི་གནས་ཁང་དུ་ཆིབས་སྒྱུར་བསྐྱངས་ཏེ་དྲན་ཐོའི་ནང་མཚན་རྟགས་བཀོད། དེ་རྗེས་སྲིད་འཛིན་ཟུར་པ་མཆོག་གིས་ངོ་སྤྲོད་གསུང་བཤད་གནང་གྲུབ་བསྟུན་མགོན་པོ་གང་ཉིད་མཆོག་གིས་མང་ཚོགས་ ༦༠༠༠ བརྒལ་བར་བཀའ་སློབ་སྩལ་དོན།

ངོས་ལ་སྲིད་འཛིན་ཕོཀ་སི་མཆོག་གིས་མགྲོན་འབོད་གནང་བར་བརྟེན་རྣམ་པ་ཚོ་དང་ཐུག་རྒྱུ་བྱུང་བར་ཧ་ཅང་དགའ་པོ་བྱུང་། ངོས་རང་འགྲོ་བ་མི་ཞིག་ཡིན་པའི་ཆ་ནས་དོན་དམ་གྱི་བདེ་སྐྱིད་ཞིག་དགོས་ན་གཙོ་བོ་བྱམས་བརྩེའི་བློ་ནས་ཡོང་དགོས་པ་ལས་དངུལ་དང་ཕྱི་དངོས་པོའི་མཐུན་རྐྱེན་གྱིས་བསྐྲུན་ཐུབ་རྒྱུ་མིན་པ་གསལ་པོར་ཤེས་རྟོགས་བྱུང་། ངོས་རང་ཕོཀ་སི་བསྟི་གནས་ཁང་ད་ལྟ་མཐོང་མ་ཐག་ཡིན། བསྟི་གནས་ཁང་དེས་མི་ཉམས་ཐག་དབུལ་ཕོངས་དང་མགོན་མེད་ཚོར་རོགས་རམ་གནང་གི་ཡོད་པ་མ་ཟད། འགྲོ་བ་མིའི་བདེ་ཐབས་ལ་སྨིན་པའི་ལས་གཞི་བསྒྲུབས་དང་བསྒྲུབ་མུས་ཡིན་པ་གོ་ཐོས་བྱུང་། ངོས་ཀྱིས་བྱམས་བརྩེའི་སྐོར་ཤོད་རྒྱུ་ཙམ་ལས་ངོ་ཐོག་ཁྱེད་ཚོས་བྱམས་བརྩེའི་ཉམས་ལེན་གནང་བཞིན་ཡོད་པ་འདི་ནི་བསྔགས་འོས་ཤིག་ཡིན། དེར་བརྟེན་ངོས་ཀྱིས་ཁྱེད་རྣམ་པའི་ལས་དོན་ལ་ཡི་རང་བསྔགས་བརྗོད་ཞུ་རྒྱུ་ཡིན།

མི་ཚང་མར་མའི་མངལ་ནས་སྐྱེས་མ་ཐག་པ་ནས་བཟུང་མི་ཚེ་བདེ་སྐྱིད་ལྡན་པ་ཞིག་འདོད་པ་ལྟར་བདེ་སྐྱིད་དོན་དུ་གཉེར་རྒྱུའི་ཐོབ་ཐང་ཡང་ཡོད། ལས་དོན་གང་ཡིན་རུང་རང་གིས་ཇི་ལྟར་འདོད་པ་ལྟར་བསྒྲུབ་ཐུབ་རྒྱུ་རེད། ཅེས་གདེང་འཁེལ་བ་ཞིག་སྔོན་དཔག་བྱ་རྒྱུ་དཀའ་ནའང་། དུས་རྟག་ཏུ་རེ་བ་བཟང་ཕྱོགས་ནས་རྒྱག་དགོས། རེ་བས་ང་ཚོ་འཚོ་གནས་བྱ་རྒྱུར་ཕན་ཐོག་ཡོད། ངོས་ཀྱིས་བརྗོད་དོན་གཙོ་བོ་ནི། དགའ་བདེའི་ཚོར་བ་དེ་དག་གཙོ་བོ་ཡིད་བློར་བརྟེན་ཡོད། ཉིན་རེའི་འཚོ་བའི་ནང་ཆ་བཞག་ནའང་ཡིད་ཤེས་ལ་བརྟེན་པའི་ཚོར་བདེ་དེ་དབང་ཤེས་ཀྱི་ཚོར་བེད་ལས་ཤུགས་ཆེ། ང་ཚོར་ཕྱི་དངོས་པོའི་ཡར་རྒྱས་དགོས། འོན་ཀྱང་ང་ཚོས་དོན་དམ་གྱི་བདེ་བ་དེ་ཕྱི་དངོས་པོ་ཁོ་ནས་བསྐྲུན་ཐུབ་རྒྱུ་རེད་བསམས་ན་ནོར་འཁྲུལ་ཡིན། དེར་བརྟེན་ང་ཚོས་ནང་སེམས་རྒྱུད་དང་འབྲེལ་བའི་བཟང་པོའི་རིན་ཐང་དཔེར་ན། བྱམས་པ་དང་བརྩེ་བ། བཟོད་བསྲན་སོགས་ཀྱི་རིན་ཐང་དེ་དག་གོང་མཐོར་གཏོང་རྒྱུ་ཧ་ཅང་གལ་ཆེན་པོ་ཆགས་ཡོད།

འདས་པའི་དུས་རབས་ཁ་ཤས་ནང་ང་ཚོས་ཡར་རྒྱས་ཐོག་མདུན་སྐྱོད་བྱས་ཐུབ་ཡོད་ནའང་ད་དུང་དཀའ་ངལ་མུ་མཐུད་འཕྲད་བཞིན་ཡོད། དཀའ་ངལ་སུས་ཀྱང་འདོད་ཀྱི་མེད། འོན་ཀྱང་དཀའ་ངལ་དེ་དག་མང་ཆེ་བ་ང་ཚོས་བཟོས་པ་ཞིག་ཆགས་ཡོད། དེ་འདྲ་ཅིའི་ཕྱིར་ཡིན་ནམ་བརྗོད་ན། ང་ཚོ་མའི་བྱམས་བརྩེའི་འོག་འཚོ་བར་བརྟེན་གཞི་བརྩའི་འགྲོ་བ་མིའི་རང་བཞིན་དེ་བྱམས་བརྩེ་ལྡན་པ་ཞིག་ཡིན། འོན་ཀྱང་ང་ཚོའི་རྒྱུས་ལ་རང་གཅེས་འཛིན་གྱི་བློ་དེ་ཤུགས་ཆེ་དྲག་ནས་ཕུག་རྒྱང་རིང་པོའི་བསམ་བློ་མ་བཏང་བར་བརྟེན་དཀའ་ངལ་འཕྲད་བཞིན་ཡོད།

དེར་བརྟེན་ང་ཚོས་བསམ་བློ་དཔྱོད་བསྒྱུར་གཏོང་ཆེད་ཤེས་ཡོན་གྱི་ཐབས་ལམ་བསྟེན་དགོས། འོན་ཀྱང་དེང་རབས་ཤེས་ཡོན་ལམ་ལུགས་ནང་གཙོ་བོ་ཕྱི་དངོས་པོ་དོན་གཉེར་ཙམ་གྱི་ཆེད་དུ་ཡིན་པ་ལས་གཞན་ལ་བྱམས་བརྩེའི་བསམ་པ་ཉམས་ལེན་བྱ་རྒྱུའི་སྐོར་གྱི་ལམ་སྟོན་འདང་ངེས་ཤིག་མེད། དེར་ང་ཚོས་དོ་སྣང་བྱེད་དགོས། ང་ཚོས་དེང་དུས་ཤེས་ཡོན་ལམ་ལུགས་ནང་དུ་ནང་ཤེས་རྒྱུས་དང་འབྲེལ་བའི་བཟང་པོའི་རིན་ཐང་གོང་མཐོར་གཏོང་ཐབས་བྱེད་དགོས།

ཁྱེད་ཚོ་མང་པོ་ཞིག་མཆི་ཁར་ལྷ་ཡུལ་སྐྱེ་བ་ཤོག ཅེས་སྨོན་ལམ་རྒྱག་བཞིན་ཡོད། དེ་ལས་གལ་ཆེ་བ་ནི་མ་མཆི་གོང་ནས་འཛམ་གླིང་འདི་བཞིན་ལྷ་ཡུལ་དུ་བསྐྲུན་རྒྱུར་འབད་བརྩོན་གནང་རྒྱུ་དེ་རེད། ཅེས་སོགས་ཀྱི་བཀའ་སློབ་སྩལ་རྗེས་མང་ཚོགས་ཀྱི་དྲི་བར་བཀའ་ལན་སྩལ། ཉིན་གུང་ལྗགས་སྨིན་གྲུབ་བསྟུན་༸གོང་ས་མཆོག་གིས་མེཀ་སི་ཁོའི་སྲིད་འཛིན་ཟུར་པ་སྐུ་ཞབས་ཕོག་སི་མཆོག་གིས་ཨེ་ཛི་ཊེ་ཁ་ TV Azteca ཞེས་པའི་བརྙན་འཕྲིན་བརྒྱུད་ལམ་ཐོག་བཅར་འདྲིར་དང་ལེན་མཛད་ཡོད། དེ་རྗེས་༸གོང་ས་མཆོག་ཁུལ་དེ་ནས་ཛ་ཀ་ཊེ་ཀ་ Zacatecas སིར་ཆིབས་སྒྱུར་བསྐྱངས་ཡོད་པ་བཅས།།