༢༠༡༣ ཟླ་ ༩ ཚེས་ ༢༣ རེས་གཟའ་ཟླ་བ།
༄༅། །རྒྱ་གར་གྲོས་ཚོགས་ཀྱི་འཐུས་མི་ཡིན་པ་སྤྱི་འབངས་ཆབ་སྲིད་ཚོགས་པའི་ Samajwadi Party ཚོགས་མི་དང་ཡུན་རིང་ནས་བོད་དོན་ལ་ཁ་ཞེ་གཉིས་མེད་ཀྱིས་རྒྱབ་སྐྱོར་གནང་མཁན་རང་ལོ་ ༦༨ ལ་ཕེབས་པའི་སྐུ་ཞབས་མོ་ཧན་སིང་ Mr Mohan Singh མཆོག་ལ་སྐྲན་ནད་ཀྱི་ནད་གཞི་ཕོག་སྟེ་ཡུན་རིང་སྨན་བཅོས་བྱས་ཀྱང་དྲག་སྐྱེད་མ་བྱུང་བར་ཕྱི་ལོ་ ༢༠༡༣ ཟླ་ ༩ ཚེས་ ༢༢ རེས་གཟའ་ཉི་མའི་ཉིན་ལྡི་ལི་ཨེམ་སི་སྨན་ཁང་ AIIMS དུ་འདས་གྲོངས་སུ་གྱུར་བར་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༦ པའི་ཉིན་ལྔ་པར་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་ཞིག་བོད་མི་མང་སྤྱི་འཐུས་སྒྲོལ་མ་ཚེ་རིང་ལགས་ཀྱིས་སྒྲོགས་སྦྱང་གནང་བའི་ནང་འཁོད་དོན།
རྒྱ་གར་ས་མྗ་ཝ་ཏི་ (Samajwadi) པའི་དྲུང་ཡིག་ཆེན་མོ་དང་། ཡུན་རིང་བོད་དོན་ཐོག་རྒྱབ་སྐྱོར་ཤུགས་ཆེ་གནང་མཁན་སྐུ་ཞབས་མོ་ཧན་སིང་ (Mohan Singh) མཆོག་ཁ་ས་ཕྱི་ལོ་ ༢༠༡༣ ཟླ་ ༩ ཚེས་ ༢༢ ཉིན་རྒྱབ་ཆུ་ཚོད་ ༤།༡༥ ཐོག་ཡུན་རིང་སྙུན་མནར་རྐྱེན་པས་ལྡི་ལི་ (AIIMS) སྨན་ཁང་དུ་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་འདུག ཁོང་རྒྱ་གར་ཡུ་སྤིའི་མངའ་སྡེའི་རྡེའུ་རིཡཱ་ (Deoria) ཁོངས་ཇ་ཡེ་ན་སྒར་ (Jai Nagar) དུ་ཕྱི་ ལོ་ ༡༩༤༥ ལོར་སྐུ་འཁྲུངས་པ་དང་། སློབ་གཉེར་གནང་སྐབས་ ༡༩༦༨ ནས་ ༡༩༦༩ བར་ཨ་ལཱ་བྷ་རྡ་གཙུག་ལག་སློབ་གཉེར་ཁང་གི་སློབ་ཕྲུག་ཚོགས་པའི་ཚོགས་གཙོ་གནང་ཡོད་པ་དང་། དེའི་སྐབས་ཀྱི་རྒྱ་གར་སྤྱི་ཚོགས་རིང་ལུགས་པའི་དབུ་འཁྲིད་སྙན་གྲགས་ཅན་རཱཇ་ན་ར་ཡན་ (Raj-Narain) མཆོག་དང་། སྐུ་ཞབས་ Dr. Ram Manohar Lohia མཆོག་རྣམ་གཉིས་ཀྱི་སྣེ་འཁྲིད་འོག་སེམས་འགུལ་ཐེབས་པའི་རྒྱལ་གཅེས་པ་ཞིག་ཡིན། དེ་ལྟའི་ལས་འགུལ་ནང་ཞུགས་སྐབས་བཙོན་ཁང་ནང་ཐེངས་མང་ཞུགས་དགོས་བྱུང་ཡོད།
ཁོང་ཡུ་སྤི་ (U.P.) མངའ་སྡེའི་ཕྱི་ལོ་ ༡༩༧༧ ནས་ ༡༩༨༥ ལོ་བར་གྲོས་ཚོགས་འཐུས་མི་གནང་མྱོང་བ་དང་། རྒྱ་གར་གྲོས་ཚོགས་འོག་མའི་སྐབས་བཅུ་པ་དང་། བཅུ་གཉིས། བཅུ་བཞི་བཅས་སོ་སོར་འདེམས་ཐོན་ལྟར་མཛད་འཁུར་བཞེས་ཡོད། དེའི་རྗེས་སུ་རྒྱ་གར་གྲོས་ཚོགས་གོང་མའི་ཚོགས་མིའང་སྐབས་གཉིས་རིང་གནང་དང་གནང་མུས་ཡིན་པ་མ་ཟད། Samajwadi ཆབ་སྲིད་ཚོགས་པའི་མགྲིན་ཚབ་པ་དང་། གྲོས་ཚོགས་ནང་ཚོགས་པའི་སྣེ་འཁྲིད་འགན་འཁུར་གནང་ཡོད། ལྷག་པར་དུ་ཕྱི་ལོ་ ༢༠༠༨ ལོར་གྲོས་ཚོགས་འཐུས་མི་ལེགས་ཤོས་ཀྱི་གཟེངས་རྟགས་ཀྱང་འཐོབ་ཡོད། ཁོང་བཟང་སྤྱོད་དང་ལྡན་པའི་གྲོས་ཚོགས་ཀྱི་འཐུས་མི་ཞིག་ཡིན་པ་ཙམ་མ་ཟད། ཕྱག་དེབ་ཀྱང་འགའ་ཤས་བརྩམས་གནང་མཛད་ཡོད།
ཁོང་ནི་བོད་དོན་ཐོག་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན་པ་མ་ཟད། ཕྱི་ལོ་ ༡༩༩༤ ལོར་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་དང་པོ་རྒྱལ་ས་ལྡི་ལིར་སྐུ་ཞབས་འཇོར་ཇ་ཕར་ནན་ཌསེ་ (George Fernandes) མཆོག་ལྷན་དུ་གོ་སྒྲིག་འགན་འཁུར་གནང་མཁན་གཙོ་བོ་ཞིག་ཡིན། དེའི་རྗེས་སུའང་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་སྔ་རྗེས་སུ་མཉམ་ཞུགས་གནང་ཡོད། དུས་རྒྱུན་དུ་བོད་དོན་དང་འབྲེལ་བའི་གནད་དོན་སྐོར་གྲོས་ཚོགས་ནང་གླེང་སློང་གནང་བ་དང་། སློབ་སྟོན་ཞུ་ཡུལ་གཙོ་བོ་ཞིག་ཡིན། ལྷག་པར་ཁོང་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དུས་རྟག་དུ་དད་གུས་ཆེན་པོ་ཞུ་མཁན་ཞིག་ཡིན་པས་༸གོང་ས་༸སྐྱབས་མགོན་ཆེན་པོ་མཆོག་ཐེངས་མང་མཇལ་མྱོང་ཡོད་པ་ཞིག་ཡིན་པ་བཅས།།
གྲོས་ཆོད།
སྐུ་གཤེགས་དེ་ཉིད་ཀྱི་མཛད་རྗེས་ལ་ཡི་རངས་བསྔགས་བརྗོད་ཞུ་རྒྱུ་དང་། དམ་པ་ཁོང་གི་ཕུགས་འདུན་བཟང་པོ་རྣམས་ཡོངས་སུ་འགྲུབ་ཅིང་། ཚེ་རབས་ཀུན་ཏུ་བདེ་ནས་བདེ་བར་བགྲོད་པའི་སྨོན་ལམ་ཤུགས་དྲག་ཏུ་ཞུ་རྒྱུ་བཅས་དང་། ཤུལ་ལུས་ལྟོས་བཅས་ནང་མི་རྣམས་ལ་ཐུགས་གསོའི་འཚམས་འདྲི་ཞུ་རྒྱུ་བཅས་ཀྱི་གྲོས་ཆོད་དུ། ཞེས་སྒྲོགས་སྦྱངས་གནང་གྲུབ་བསྟུན། སྤྱི་འཐུས་འཇམ་དབྱངས་བཟོད་པ་ལགས་ཀྱིས་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་ལ་རྒྱབ་སྐྱོར་གནང་ཡོད། དེ་རྗེས་བོད་མི་མང་སྤྱི་འཐུས་རྣམ་པ་དང་བཀའ་བློན་རྣམ་པས་འདས་པོ་ཁོང་ལ་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་གནང་ཡོད་པ་བཅས།།
