༢༠༡༣ ཟླ་ ༩ ཚེས་ ༤ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༢ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་སྐུ་མགྲོན་གཙོ་བོར་ཆེད་ཕེབས་ཀྱིས་ལྷན་ཞུགས་ཐོག་རྡ་ས་བོད་ཀྱི་གསོལ་མགྲོན་ཁང་དུ་ཨ་རིར་གནས་བཞུགས་རྩོམ་པ་པོ་ཚེ་རིང་དབང་མོ་ལགས་ཀྱིས་བརྩམས་པའི་བོད་ནང་གི་རང་ཁྱིམ་ཞེས་པའི་ནང་གི་སྙན་ངག་གྱེར་འདོན་གྱི་ལྷན་ཚོགས་ཞིག་ཚོགས་ཡོད།
དེ་ཉིན་ཕྱི་དྲོ་ཆུ་ཚོད་ ༣།༣༠ ཐོག་སྐུ་མགྲོན་གཙོ་བོ་སྲིད་སྐྱོང་མཆོག་དང་། བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས། སྤྱི་འཐུས་ཁག་གཅིག་དང་། བཞུགས་སྒར་ཁུལ་གྱི་རྩོམ་པ་པོ་དང་རྩོམ་རིག་ལ་དོ་སྣང་ཅན། དེ་བཞིན་ཕྱི་རྒྱལ་སློབ་ཕྲུག་བཅས་ཁྱོན་མི་གྲངས་ ༨༠ བརྒལ་བ་ལྷན་འཛོམས་ཐོག་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་ཀྱིས་རྩོམ་པ་པོ་དང་དཔེ་དེབ་ཀྱི་བརྗོད་བྱའི་དོན་སྙིང་མདོར་བསྡུས་ཤིག་ངོ་སྤྲོད་གནང་རྗེས་སྐུ་མགྲོན་གཙོ་བོ་མཆོག་གིས་གསུང་དོན།
འདིར་ད་རེས་ང་རང་སྒེར་ཐོག་ནས་ཡོང་དགོས་དོན་ནི། རྩོམ་པ་པོ་ཚེ་རིང་དབང་མོ་ལགས་ཀྱིས་སྔོན་མ་ལྡི་ལི་མཐོ་སློབ་ནས་སློབ་སྦྱོང་གནང་སྟངས་དང་ཀུན་སྤྱོད། སློབ་སྦྱོང་སོགས་རྩེ་ཕུད་དང་ཕྱིས་སུ་ཨ་རིའི་སྙན་གྲགས་ཆེ་བའི་མཐོ་སློབ་ནང་འབུམ་རམས་པའི་སློབ་མཐར་ཕྱིན་རྗེས་དཔེ་དེབ་འབྲི་སྟངས་ཀྱི་དགེ་རྒན་གནང་བའི་སྐོར་དང་། ཁོང་ནི་ང་ཚོའི་སྤྱི་ཚོགས་ནང་སྙན་ངག་རྩོམ་བྲིས་ཀྱི་གཞོན་སྐྱེས་ཚོར་མིག་དཔེ་ལྟ་ཡུལ་ཞིག་ཡིན་པར་བརྟེན་ད་རེས་འདི་གར་ཡོང་རྒྱུ་བྱུང་ལ་བསྔགས་བརྗོད་ཆེན་པོ་ཡོད། ཅེས་སོགས་ཀྱི་གསུང་བཤད་གནང་། དེ་རྗེས་རྩོམ་པ་པོ་ཚེ་རིང་དབང་མོ་ལགས་ཀྱིས་དེབ་དེའི་ནང་གི་སྙན་ངག་དུམ་བུ་འགའ་ཤས་གྱེར་འདོན་ཞུས་རྗེས་བགྲོ་གླེང་གི་ཚུལ་དུ་དྲི་བ་དྲིས་ལན་གནང་སྟེ་གྲོལ། དཔེ་དེབ་དེའི་བརྗོད་བྱ་གཙོ་བོ་ནི་རྩོམ་པ་པོ་རང་ཉིད་ཀྱི་ཨ་མ་ལགས་ཀྱི་ཆུང་དུས་ལོ་རྒྱུས་དང་ཕྱིས་སུ་ཨ་མ་ལགས་བཙན་བྱོལ་དུ་ཕེབས་པའི་བརྒྱུད་རིམ། རྩོམ་པ་པོ་རང་ཉིད་ཕ་ཡུལ་ལ་གཉེན་འཕྲད་དུ་བསྐྱོད་ནས་ཕ་ཡུལ་གྱི་ཡུལ་གོམས་གཤིས་ལུགས་སོགས་ཀྱི་སྐོར་བྲིས་ཡོད་འདུག་པ་བཅས།།
