༢༠༡༣ ཟླ་ ༩ ཚེས་ ༡༡ རེས་གཟའ་ལྷག་པ།
༄༅། །འདི་གར་ཕྱི་ལོ་ ༢༠༡༣ ཟླ་ ༩ ཚེས་ ༡༡ རེས་གཟའ་ལྷག་པའི་ཉིན་ངག་དབང་ཐར་པ་ལགས་ཀྱིས་བཏང་གནས་ནང་འཁོད་དོན། ཁམས་འབྲི་རུ་རྫོང་ནས་ཡིན་པའི་ལོ་ན་ ༦༨ སོན་པའི་རྒན་པོ་ཟླ་གཡང་ལགས་ཀྱིས་བོད་རང་དབང་རང་བཙན་ཡིན། ༸རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག་ཅེས་སྐད་འབོད་བརྒྱབ་རྐྱེན་རྒྱ་གཞུང་གི་ཉེན་རྟོག་པས་འཛིན་བཟུང་བྱས་ཏེ་ཉེས་རྡུང་ཚད་མེད་བཏང་ཡོད་འདུག
དེ་ཡང་ཟླ་འདིའི་ཕྱི་ཚེས་ ༡༠ ཉིན་བོད་ནས་འབྲེལ་ཡོད་ཀྱིས་གནས་ཚུལ་མཁོ་སྤྲོད་བྱས་དོན་ལྟར་ན། ཟླ་འདིའི་ཕྱི་ཚེས་ ༣ ཉིན་ནག་ཆུ་འབྲི་རུ་རྫོང་གི་ས་ཁུལ་ཁག་གི་ནང་ལ་བོད་རང་སྐྱོང་ལྗོངས་ཀྱི་གོ་སྒྲིག་འོག ས་གནས་ལས་ཁུངས་ཁག་གི་ཆབ་སྲིད་དྲིལ་བསྒྲགས་བྱེད་མཁན་གྱི་ཚོགས་ཆུང་དང་ཟློས་གར་འཁྲབ་སྟོན་པ་ཁག་གཅིག་གྲོང་ཚོ་ཁག་ལ་བཏང་སྟེ་ཆབ་སྲིད་དང་ཁྲིམས་ལུགས་དྲིལ་བསྒྲགས་བྱེད་སྐབས། ནག་ཆུ་འབྲི་རུ་རྫོང་ཚ་ཆུ་ཡུལ་ཚོའི་གདོང་ལ་རི་མདོ་གྲོང་ཚོའི་གྲོང་མི་དགུང་ལོ་ ༦༨ ལ་སོན་པའི་ཟླ་གཡང་ལགས་ཀྱིས་ལག་ཏུ་ཁ་བཏགས་བཟུང་སྟེ། བོད་ནི་རང་དབང་རང་བཙན་ཡིན། ༸རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག རྒྱ་མི་བོད་ནས་འགྲོ་དགོས། ཞེས་སྐད་འབོད་ཐེངས་མང་བརྒྱབ་པར་བརྟེན། རྒྱ་གཞུང་གི་ཉེན་རྟོག་པས་མཚན་མོ་དེ་རང་ལ་ཁོང་གི་མགོ་ལ་རས་ནག་པོ་ཞིག་གཡོག་ནས་འཛིན་བཟུང་བྱས་པ་མ་ཚད་ཉེས་རྡུང་ཚད་མེད་བཏང་ཡོད་འདུག
ཕྱི་ཚེས་ ༩ ཉིན་འབྲི་རུ་རྫོང་མི་མང་སྨན་ཁང་དུ་ཁོང་ཤི་མིན་རོ་མིན་ངང་སྨན་བཅོས་བྱེད་བཞིན་ཡོད་འདུག་ཀྱང་། དེ་རྗེས་ཁོང་ཤི་གསོན་གང་ཡིན་གྱི་གནས་ཚུལ་ཁ་གསལ་རག་ཐུབ་ཀྱི་མེད་པ་རེད་ འདུག དེང་སྐབས་ནག་ཆུ་རྫོང་གི་སྟར་ཆེན་ཡུལ་ཚོ་དང་། འབྲི་རུ་རྫོང་གི་ཟླ་ཐང་ཡུལ་ཚོ། ཚ་ཆུ་ཡུལ་ཚོ་བཅས་ཀྱི་ས་གནས་ཁག་ལ་སླར་ཡང་ལས་དོན་ཚོགས་ཆུང་གི་ལས་འགུལ་སྣ་ཚོགས་སྤེལ་ཏེ། གོང་གསལ་ཡུལ་གྲོང་ཁག་ལ་ལས་བྱེད་མི་སྣ་ ༡༠༠༠ ལྷག་ཆེད་གཏོང་གིས། མི་ཚང་གསུམ་རེ་ལ་ལྟ་རྟོག་བྱེད་མཁན་ལས་བྱེད་རེ་བསྐོ་འདེམས་བྱས་ནས་ཧ་ཅང་དམ་བསྒྲགས་ཆེན་པོའི་ངང་གནས་འདུག
