༢༠༡༣ ཟླ་ ༩ ཚེས་ ༡༣ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༡༢ ཉིན་བོད་མིིའི་སྒྲིག་འཛུགས་ནང་སྲིད་ལས་ཁུངས་ནས་ལྡི་ལི་བོད་སྒར་བསམ་ཡས་གླིང་གི་ཉིན་སློབ་ཚོགས་ཁང་ནང་ཨི་ཛི་རལ་དུ་སོ་ནམ་འདེབས་ལས་སྐོར་ལ་ཟབ་སྦྱོང་དུ་སྐྱོད་མཁན་བོད་མི་གཞོན་སྐྱེས་ཁག་གཅིག་ལ་ཁྲིམས་ལུགས་དང་ཕྱི་མིར་འབྲེལ་ལམ་བྱེད་ཕྱོགས་སྐོར་གྱི་ཟབ་སྦྱོང་ཞིག་གོ་སྒྲིག་གནང་འདུག
དེ་ཡང་ལས་གཞི་དེའི་འགན་བཞེས་གནང་མཁན་དང་ཐེངས་འདིའི་ཟབ་ཁྲིད་པ་ནང་སྲིད་ལས་ཁུངས་ཀྱི་དྲུང་འཕར་འཆི་མེད་རིག་འཛིན་ལགས་ཀྱིས་གནད་དོན་དེའི་སྐོར་ལ་གསུང་དོན། བོད་མིའི་སྒྲིག་འཛུགས་ནང་སྲིད་ལས་ཁུངས་ནས་ལས་གཞི་འདི་ཕྱི་ལོ་ ༡༩༩༨ ལོར་འགོ་འཛུགས་གནང་སྟེ། ད་རེས་བོད་མི་ཨི་ཛི་རལ་དུ་གཏོང་ཐེངས་བཅོ་ལྔ་པ་ཆགས་ཡོད། དུས་ད་ལྟའི་བར་ལས་གཞི་འདིའི་ཐོག་ནས་བོད་མི་ ༦༥༠ ཙམ་ཞིག་ཟབ་སྦྱོང་ལ་བསྐྱོད་ཐུབ་ཡོད། དེ་བཞིན་དཔལ་འབྱོར་ཐོག་ནས་ཆ་བཞག་ན། དེ་སྔ་མི་རེ་རེ་ནས་ཟླ་ ༡༡ ནང་ཧིན་སྒོར་འབུམ་གསུམ་བཞི་དང་ད་ལྟའི་ཆར་འབུམ་དྲུག་བདུན་གསོག་ཐུབ་ཀྱི་ཡོད་པ་མ་ཟད། སོ་ནམ་འདེབས་ལས་ཀྱི་ཉམས་མྱོང་གསོག་རྒྱུའི་གོ་སྐབས་བྱུང་དང་འབྱུང་བཞིན་ཡོད། ལས་གཞི་འདི་གལ་ཆེན་ཆགས་ཡོད་སྟབས། མུ་མཐུད་ནས་ཚགས་ཚུད་ཡོང་སླད་ཨི་ཛི་རལ་དུ་སྐྱོད་མཁན་བོད་རིགས་གཞོན་སྐྱེས་ཚོར་ཡུལ་དེའི་ཁྲིམས་ཀྱི་འགྲོ་སྟངས་དང་། ཡུལ་མིར་འབྲེལ་བ་བྱེད་ཕྱོགས། རང་ཉིད་ཀྱི་ཀུན་སྤྱོད་འཁྱེར་སྟངས་བཅས་ཀྱི་སྐོར་ལ་ཟབ་ཁྲིད་གནང་ཡོད་སྐོར་གསུངས་འདུག
སྤྱིར་བཏང་ནང་སྲིད་ལས་ཁུངས་ནས་བོད་རིགས་གཞོན་སྐྱེས་ཁག་གཅིག་ཨི་ཛི་རལ་དུ་སོ་ནམ་འདེབས་ལས་ཀྱི་སློབ་སྦྱོང་ངམ་ཟབ་སྦྱོང་ཆེད་བཏང་དང་གཏོང་མུས་ལྟར། ཐེངས་འདིར་བོད་མིའི་གཞིས་ཆགས་ཀོ་ལེ་གྷལ་དང་། ཧོན་སུར་རབ་རྒྱས་གླིང། ཨོ་རུ་ས་ཕུན་ཚོགས་གླིང། མན་སྤར་ཕན་བདེ་གླིང། བྷན་ངྷར་ནོར་རྒྱས་གླིང། ཏི་ཛུ་དར་རྒྱས་གླིང། རྡ་ས། ཀ་ལོན་སྦུག རྡོ་རྗེ་གླིང་བཅས་ནས་བོད་རིགས་ན་གཞོན་ཁྱོན་བསྡོམས་ ༥༣ འདེམས་སྒྲུག་བྱས་ཡོད་ཁོངས་ནས་བུད་མེད་ ༩ དང་གཞན་རྣམས་བུ་ཡིན་འདུག་པ་བཅས། །
