༢༠༡༣ ཟླ་ ༩ ཚེས་ ༢༧ རེས་གཟའ་པ་སངས།

༄༅། །བོད་ལྷོ་ཁུལ་དབུས་སྤྱི་ཁྱབ་རིག་གཞུང་དང་སྤྱི་ཚོགས་བདེ་དོན་ཚོགས་པའི་རྒྱུན་ལས་ཁང་ནས་གསལ་བསྒྲགས་ཞུ་རྒྱུར།
བོད་ལྷོ་ཁུལ་རིག་གཞུང་དང་སྤྱི་ཚོགས་བདེ་དོན་ཚོགས་པའི་འགན་འཛིན་ལྷན་ཚོགས་ཐེངས་གཉིས་བསྟུད་མར་ཚོགས་ཏེ་བསམ་པ་གཅིག་མཐུན་དུ་སྤྱི་མོས་ཐོག་གྲོས་ཆོད་ཤིན་ཏུ་གལ་ཆེན་ཞིག་འཇོག་ཐུབ་པ་བྱུང་བའི་ནང་དོན་ལྟར། རང་ཅག་གཞིས་བྱེས་བོད་མི་ཡོངས་ཀྱི་འདི་ཕྱིའི་བདེ་སྐྱིད་ཀྱི་རྩ་བ། བོད་བསྟན་སྲིད་མི་རིགས་བཅས་པར་བཀའ་དྲིན་བླ་མེད་དུ་ཆེ་བ། འཛམ་གླིང་ཞི་བདེའི་དེད་དཔོན་༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་སྐུ་ཚེ་༸ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དོན་མཐའ་དག་ལྷུན་གྱི་འགྲུབ་པའི་རྟེན་འབྲེལ་བཟང་པོ་སྒྲིག་པའི་དོན་དུ་རང་རེའི་ལྷོ་ཁུལ་གཞིས་བྱེས་དགོན་སྡེ་ཡོངས་ཀྱི་མཁན་པོ་བླ་སྤྲུལ་དགེ་བཙུན་སྔགས་གསུམ་གྱིས་གཙོས་ལྷོ་ཁུལ་མི་མང་ཡོངས་ནས་དགའ་དད་སྤྲོ་གསུམ་གྱིས་བརྟན་བཞུགས་བསྟར་འབུལ་ཆོག་པའི་ཇི་ལྟར་གསོལ་བ་ཕུར་ཚུགས་སུ་བཏབ་པ་བཞིན་མགོན་པོ་མཆོག་ནས་ཕྱི་ལོ་ ༢༠༡༥ བོད་ཟླ་དང་པོའི་ཚེས་ ༡༥ ཆོ་འཕྲུལ་སྨོན་ལམ་ཆེན་མོའི་དུས་ཆེན་ཁྱད་པར་ཅན་དང་སྟབས་བསྟུན་བརྟན་བཞུགས་འབུལ་འཐུས་ཆོག་པའི་བཀའ་བཞེས་བཟང་པོ་སྤྱི་སྩལ་བཀའ་དྲིན་ཆེ་བ་བྱུང་བ་ལྟར་ཐུགས་གཏན་འཁེལ་བ་ལགས་ན། སྤྱིར་བོད་མི་ཡོངས་དང་ལྷག་པར་དུ་ལྷོ་ཁུལ་མི་མང་ཡོངས་ཀྱི་སྤྱི་མཐུན་བསོད་ནམས་གོང་མཐོར་གཏོང་ཆེད་༸རྒྱལ་བའི་བཀའ་དྲིན་རྗེས་སུ་དྲན་པའི་ཐོག་ནས་ལྷག་བསམ་དཀར་པོས་བརྟན་བཞུགས་ཆེད་ཐུགས་སྨོན་དང་འབྲེལ་ལྷག་བསམ་ཆེན་པོས་ཞལ་འདེབས་འབུལ་མཁན་སུ་ཡོད་ནའང་གཤམ་གསལ་ཁ་བྱང་ཐོག་འབྲེལ་བ་གནང་རོགས།

མ་ཟད་བརྟན་བཞུགས་ཀྱི་ལས་དོན་བྱེད་ཕྱོགས་ཚགས་ཚུད་ཡོང་སླད་ལྷོ་ཁུལ་མི་མང་རྣམས་ནས་ཐུགས་འཁུར་མཉམ་བཞེས་དང་དགོངས་འཆར་ཇི་ཡོད་ཐད་ཀར་ཡིག་ངག་གང་རུང་ཐོག་གནང་རོགས་ཞུ། བོད་ལྷོ་ཁུལ་དབུས་སྤྱི་ཁྱབ་རིག་གཞུང་དང་སྤྱི་ཚོགས་བདེ་དོན་ཚོགས་པའི་རྒྱུན་ལས་ཁང་ནས་ ༢༠༡༣ ཕྱི་ཟླ་ ༩ ཚེས་ ༢༦ ལ།།

President
Southern Tibet Cultural and Welfare Society
Dekyiling Tibetan Colony
P.O Kulhan 248001
S.D Road,Dehradun
Uttarakhand,India
E-mail:[email protected] mobile no: 09758253784