༢༠༡༣ ཟླ་ ༩ ཚེས་ ༢༠ རེས་གཟའ་པ་སངས།
༄༅། །ཉེ་ཆར་མང་གཙོའི་དུས་ཆེན་ཉིན་ཕོ་བྲང་ནང་དུ་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། སྲི་ཞུའི་ལས་བྱེད་སྡེ་ཚན་འགན་འཛིན་ཡན་ལ་༸གོང་ས་མཆོག་གིས་གང་ཉིད་མཆོག་ཐུགས་ཕམ་དང་དགུང་གྲངས་ཉུང་འཕྲི་མཛད་དགོངས་ཀྱི་བཀའ་སློབ་ཕེབས་པར་བརྟེན། ཕྱི་ལོ་ ༢༠༡༣ ཟླ་ ༩ ཚེས་ ༡༩ ཉིན་སྐབས་བཅོ་ལྔ་པའི་གྲོས་ཚོགས་ཚོགས་དུས་དྲུག་པའི་ཉིན་གཉིས་པའི་ཕྱེད་ཡོལ་སྤྱི་འཐུས་གྲོས་ཚོགས་ནང་ལྷ་དགོངས་དྭངས་ཆེད་སྤྱི་མོས་ཐོག་གཞུང་འབྲེལ་གྲོས་ཆོད་ཅིག་བཞག་འདུག
གྲོས་ཆོད་དེར་གྲོས་འཆར་འདོན་མཁན་སྤྱི་འཐུས་སྨན་པ་མཁྱེན་རབ་རྒྱ་མཚོ་ལགས་དང་། རྒྱབ་སྐྱོར་གནང་མཁན་སྤྱི་འཐུས་སྒྲོལ་མ་ཚེ་རིང་ལགས་གཉིས་ཀྱིས་གཙོས་གྲོས་ཚོགས་ཀྱི་འཐུས་མི་ཚང་མས་སྤྱི་མོས་ཀྱིས་རྒྱབ་སྐྱོར་གནང་འདུག དེ་ཡང་གཞུང་འབྲེལ་གྲོས་ཆོད་གྲོས་འཆར་དེའི་སྔོན་འགྲོའི་ནང་། སྤྱིར་༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་དུ་ཕེབས་དགོས་པའི་བརྒྱུད་རིམ་དང་། ལྷག་པར་འདི་གར་༸ཞབས་སོར་འཁོད་པ་ནས་བཟུང་གཞན་དོན་ཆེད་སྐུའི་གསང་བ་གསུམ་གྱི་མཛད་འཕྲིན་རྒྱ་ཆེ་བསྐྱངས་དང་སྐྱོང་མུས་ཡིན། བར་སྐབས་ང་ཚོའི་སྤྱི་ཚོགས་ཁྲོད་བོད་མི་རེ་བཟུང་གི་བྱ་སྤྱོད་ལ་བརྟེན་ནས་ཐུགས་ཕམ་དང་བཅས་ཉེ་སྔོན་མང་གཙོའི་དུས་ཆེན་ཉིན་གྱི་ཕྱི་དྲོར་ཕོ་བྲང་ཚོམས་ཆེན་དུ། མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། སྲི་ཞུའི་ལས་བྱེད་སྡེ་ཚན་འགན་འཛིན་ཡན་གྱི་གནས་རིམ་ཅན་ཡན་ལ་ཞལ་གསུང་དྲོན་མོས་དགུང་གྲངས་ ༡༠༨ བར་ཉུང་འཕྲི་མཛད་དགོངས་ཕེབས་པ་ནི་གུས་ཅག་རྣམས་བློས་བཟོད་ཐབས་རྩ་བྲལ་གྱིས་གདུང་ཤུགས་དྲག་པོས་གསོལ་འདེབས་ཞུ་རྒྱུར། མགོན་པོ་མཆོག་གིས་འཛམ་གླིང་སྐྱེ་འགྲོ་སྤྱིའི་བདེ་སྐྱིད་དང་། ཁྱད་པར་གངས་ཅན་བོད་མི་རྣམས་ལ་རླབས་ཆེའི་མཛད་བཟང་བསྐྱངས་དང་སྐྱོང་བཞིན་པའི་བཀའ་དྲིན་བདག་གཞན་ལུས་ངག་ཡིད་གསུམ་ལོངས་སྤྱོད་དུས་གསུམ་དགེ་ཚོགས་བཅས་པ་དང། སྟོང་གསུམ་རིན་ཆེན་བདུན་གྱིས་བཀང་སྟེ་བསྐལ་བརྒྱར་དབུལ་ཡང་བཀའ་དྲིན་གྱི་ཆ་ཕྲ་མོ་ཙམ་ཡང་གཞལ་བར་མི་ནུས་ཀྱང། གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་སྒོ་གསུམ་གུས་ཕྱག་དང་བཅས་བཀའ་དྲིན་བླ༌ཆེད་དུ་ཞུ་རྒྱུ་ཡིན། ཞེས་སོགས་འཁོད་འདུག
གྲོས་ཆོད་དེར་དོན་ཚན་གསུམ་ཡོད་པ་ལས།
༡༽སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་དང་འཛིན་སྐྱོང་གི་ཐད་ཀའི་དབུ་འཁྲིད་མ་མཛད་པར་གཞིས་བྱེས་གངས་ཅན་པ་རྣམས་བློ་བདེ་བག་ཕེབས་ཤིག་ད་དུང་ཡོང་གི་མེད་པས། མགོན་པོ་མཆོག་ནི་བོད་དོན་བདེན་མཐའ་གསལ་ཐབས་ཀྱི་རེ་བའི་འབྱུང་ཁུངས་དང་། གཞིས་བྱེས་གཉིས་ཀའི་ལྷག་བསམ་དང་། སེམས་ཤུགས། སྙིང་སྟོབས། བདེ་སྐྱིད་བཅས་ཀྱི་གཞི་རྩ་ཆགས་ཡོད་ན། ཉེ་ཆར་མང་གཙོའི་དུས་ཆེན་ཉིན་གྱི་ཕྱི་དྲོར་ཕོ་བྲང་ཚོམས་ཆེན་དུ། མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། སྲི་ཞུའི་ལས་བྱེད་སྡེ་ཚན་འགན་འཛིན་ཡན་གྱི་གནས་རིམ་ཅན་ཡན་ལ་ཞུགས་མོལ་སྐབས། ༸གོང་ས་མཆོག་གིས་ཞལ་གསུང་དྲོན་མོས་དགུང་གྲངས་ཉུང་འཕྲི་མཛད་དགོངས་ཕེབས་པར་གུས་ཅག་རྣམས་བློས་བཟོད་ཐབས་རྩ་བྲལ་ལ་བརྟེན། དེ་ལྟ་བུའི་དགོངས་གཞི་མི་མཛད་པར་བླ་ལྷའི་ལུང་དོན་དང་། སྔོན་ནས་ཞལ་བཞེས་བཀའ་དྲིན་ཆེ་བ་བཞིན་དགུང་གྲངས་ ༡༡༣ ལྷག་བཞུགས་གནང་མཛད་སྐྱོང་ཡོང་བའི་གྲོས་ཚོགས་ཚོགས་དུས་དྲུག་པ་འདིའི་ཐོག་ནས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་གསོལ་བ་ཕུར་ཚུགས་སུ་འདེབས་རྒྱུ་དང་། བོད་མིའི་སྒྲིག་འཛུགས་དང་མང་ཚོགས་བཅས་ཡོངས་ཀྱིས་སྐུ་ཚེ་༸ཞབས་པད་རྒྱལ་བ་ཚེ་མཐའ་ཡས་པའི་ངོ་བོར་བརྟན་པར་བཞུགས་སུ་གསོལ་བའི་བརྟན་བཞུགས་རྒྱས་པ་ཞིག་བསྟར་འབུལ་འཐུས་ཆོག་པའི་ཞལ་བཞེས་བཀའ་བཟང་སྐྱབས་འཇུག་སྤྱི་སྨིན་ཡོང་བའི་གསོལ་འདེབས་རྩེ་གཅིག་ཏུ་ཞུ་རྒྱུ།
༢༽སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་གསང་བ་གསུམ་ལ་ཚུལ་བསྟན་སྐུ་གེགས་ཀྱི་མཚན་མ་ཆ་ཕྲ་མོས་ཀྱང་མ་རེག་པར་༸ཞབས་པད་མི་འགྱུར་རྡོ་རྗེའི་ཁམས་སུ་རྟག་བརྟན་འཚོ་ཞིང་བཞུགས་པ་ནི། གཙོ་བོ་མགོན་པོ་མཆོག་གང་ཉིད་ཀྱི་ཐུགས་བསྐྱེད་སྨོན་ལམ་གྱི་བྱིན་མཐུ་དང་། བོད་མིའི་སྤྱི་མཐུན་གྱི་བསོད་ནམས། བོད་སྐྱོང་ལྷ་སྲུང་དམ་ཅན་རྒྱ་མཚོའི་སྡོང་གྲོགས་བཅས་དང་། དེ་བས་ཀྱང་གལ་ཆེ་བ་ནི་བཀའ་བཞིན་སྒྲུབ་པའི་མཆོད་པས་མཉེས་པ་ཞུ་རྒྱུ་དང་། ཆོལ་གསུམ་བོད་མི་ཡོངས་རྫོགས་དམ་ཚིག་གཟོང་ཁ་གཅིག་སྒྲིལ་ཐོག་སྤྱི་མཐུན་གྱི་བསོད་ནམས་ལ་རག་ལས་ཡོད་པ་རྟག་ཏུ་བླ་ལྷའི་ཐུགས་དམ་དང་། བཀའ་ལུང་ཕེབས་དང་ཕེབས་བཞིན་པ་ལྟར་བོད་མི་ཡོངས་ཀྱི་ཉམས་ལེན་འཕྱུག་མེད་ཞུ་རྒྱུ་དང་། བཀའ་དྲིན་བསམ་ཤེས་མི་ཐུབ་ཅིང་། དུས་ཀྱི་འགྱུར་འགྲོས་སྤྱི་དང་། བོད་རིགས་སྤྱི་དང་། བོད་མིའི་ཐུན་མོང་མ་ཡིན་པའི་ཆོས་རིག་རྒྱུན་གནས་ཐུབ་པ་ཡོང་ཐབས་ལ་བསམ་པའི་དངོས་ཡོད་གནས་སྟངས་བཅས་ལ་ཁྱོན་ཡོངས་ནས་བསམ་ཤེས་ཞིབ་ཏུ་མེད་པར་རྒྱལ་ཞེན་ལྷག་བསམ་ཡིན་ཤས་ཀྱང་། སེམས་ཚོར་ཙམ་གཙོར་འདོན་གྱིས་མ་འོངས་བོད་མིའི་བདེ་དོན་སྤྱི་དང་བྱེ་བྲག་བཅས་གང་ཅིར་གསབ་ཐབས་བྲལ་བའི་གྱོང་གུན་འགྲོ་གཞིའི་ཐལ་སྤྱོད་སྤེལ་མཁན་རྣམས་ལ་བོད་མིའི་སྒྲིག་འཛུགས་ཀྱིས་ཚམ་ཚོམ་དང་འཛེམས་ཟོན་སྤངས་པའི་སྒོ་ནས་གདོང་ལེན་ཞུ་སྒོ་ལྷོད་མེད་བྱ་རྒྱུ།
༣༽མགོན་པོ་མཆོག་གིས་མཁའ་མཉམ་སྐྱེ་འགྲོ་སྤྱི་དང་། ཁྱད་པར་ཁ་བའི་ལྗོངས་ཀྱི་ཆེས་ཉམ་ཐག་པའི་སྐྱེ་འགྲོ་རྣམས་ལ་ཐུགས་བརྩེ་བ་ཆེན་པོས་ཉེ་བར་དགོངས་ཏེ་བོད་མིའི་བདེ་དོན་སྤྱི་དང་། ཁྱད་པར་ཆོས་སྲིད་གང་གི་ཐོག་ཏུའང་ཞན་ཆའི་རིགས་གཟིགས་ཚེ་དུས་ནས་དུས་སུ་ལམ་སྟོན་བཀའ་སློབ་གསུང་གི་བདུད་རྩི་ཆུ་བོའི་རྒྱུན་བཞིན་སྨིན་སྩོལ་བཀའ་དྲིན་ཆེ་བ་ཞུ་རྒྱུ་དང་། གུས་འབངས་རྣམས་ཀྱིས་ཀྱང་༸རྒྱལ་བའི་དགོངས་གཞི་ལྟར་མང་གཙོ་ཡང་དག་པའི་ལམ་བཟང་ཐོག་ཤར་བསྐྱོད་ཞུ་རྒྱུ་དང་། སྲི་ཞུའི་ཞུ་སྒོ་གང་ཅིར་སྔར་ལྷག་འབད་འབུངས་འཁུར་བསྐྱེད་བྱ་རྒྱུའི་དམ་བཅའ་བརྟན་བཟུང་ཞུ་རྒྱུ་བཅས་ཀྱི་སྤྱི་མོས་གྲོས་ཆོད་དུ། བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༡༣ ཟླ་ ༩ ཚེས་ ༡༩ ལ། །
