༢༠༡༣ ཟླ་ ༩ ཚེས་ ༡༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༩ རེས་གཟའ་ཟླ་བའི་ཉིན་༸གོང་ས་མཆོག་གིས་ཡུ་རོབ་རྒྱལ་ཁབ་ལ་ཏི་ཝི་ཡའི་གསར་འགྱུར་བརྙན་འཕྲིན་ Latvian Television ཚན་པའི་ཆེད་དོན་དྲི་བར་བཀའ་ལན་སྩལ་ཡོད། སྐབས་དེར་མགོན་པོ་གང་ཉིད་མཆོག་གིས་འཛམ་གླིང་ཡུལ་གྲུ་གང་དུ་ཆིབས་སྒྱུར་བསྐྱངས་ནའང་ཆབ་སྲིད་དབུ་ཁྲིད་མི་སྣ་ལས་མི་མང་དཀྱུས་མ་ཐུག་རྒྱུ་གལ་ཆེར་འཛིན་བཞིན་ཡོད་པ་དང་འབྲེལ། ཆབ་སྲིད་ཀྱི་སྐུ་དབང་རྩིས་སྤྲོད་མཛད་པའི་སྐོར་བཀའ་སློབ་སྩལ་དོན། ངོས་རང་ཆུང་དུས་ནས་དབང་ཆ་མི་རེ་ཟུང་གི་ལག་ཏུ་ཡོད་ན་དེར་སྐྱོན་ཞིག་ཡོད་པ་མཐོང་གི་ཡོད། དེར་བརྟེན་མང་གཙོའི་ལམ་ལུགས་དེ་མི་མང་གིས་དབང་སྒྱུར་གཙོ་བོ་ཡིན་པ་དང་མི་མང་ནས་དགོས་མཁོ་ནམ་མཆིས་སྐབས་སྲིད་གཞུང་བརྗེས་པོ་རྒྱག་རྒྱུའི་དབང་ཆ་ཡོད།
དེར་བརྟེན་སྲིད་བྱུས་དེ་ཡང་དག་པ་ཞིག་ཡིན་པར་ངོས་འཛིན་བྱེད་བཞིན་ཡོད། ལོ་རྒྱུས་ཐོག་བོད་སོག་རྒྱ་གསུམ་དབང་ཤུགས་ལྡན་པའི་རྒྱལ་ཁབ་ཆགས་ཡོད། འོན་ཀྱང་བོད་ནང་དེང་རབས་འཕྲུལ་ཆས་ཡར་རྒྱས་གང་ཡང་མེད་པའི་ལུང་པ་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་མཉམ་གནས་བྱས་ནས་བསྡད་ན་བོད་མི་ཚོར་ཁེ་ཕན་ཡོད། ཅེས་བཀའ་སློབ་སྩལ་བ་དང་སྦྲགས་དེ་སྔ་རྒྱ་གར་གྱི་སྲིད་བློན་པཎྜི་ཏ་ནེ་རུས་༸གོང་ས་༸སྐྱབས་མགོན་ཆེན་པོ་མཆོག་ལ་བོད་དོན་དེ་མཉམ་སྦྲེལ་རྒྱལ་ཚོགས་ལ་ཞུ་གཏུག་མཛད་པ་ལས་རྒྱ་ནག་གཞུང་དང་ཐད་ཀར་འབྲེལ་བ་མཛད་ན་དགེ་མཚན་ཆེ་བ་ཡོད་ལུགས་ཀྱི་ལམ་སྟོན་ཞུས་པ་རྣམས་ཐུགས་དྲན་གསོ་མཛད་པ་དང་སྦྲགས། སྔ་ཕྱི་མ་གཏོགས་རྒྱ་ནག་གཞུང་དང་སྐད་ཆ་ཤོད་རྒྱུ་གོ་སྐབས་ཡོང་རྒྱུ་ཡིན་པར་བརྟེན་ཕྱི་ལོ་ ༡༩༧༤ ཙམ་ནས་བོད་མི་ཚོས་རང་བཙན་མ་རྩོད་པར་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་གནས་བབ་ཅིག་རྩོད་པ་ཡིན་ན། རྒྱ་ནག་མི་དམངས་ཚོས་ཀྱང་བསམ་བློ་གཏོང་རྒྱུ་ཞིག་ཡོང་རྒྱུ་ཡིན་སྐོར་སོགས་ཀྱི་བཀའ་སློབ་སྩལ།
གཞན་ཡང་ཨི་སི་ཏོ་ནི་ཡའི་དུས་དེབ་གསར་ཤོག་གི་གསར་འགོད་པ་ཞིག་ནས་བོད་དོན་རྒྱབ་སྐྱོར་ཆེད་ལས་དོན་ཡག་ཤོས་ཤིག་ཇི་ལྟར་སྤེལ་དགོས་མིན་བཀའ་འདྲི་ཞུས་པར་༸གོང་ས་མཆོག་གིས་བཀའ་ལན་སྩལ་དོན། བོད་དོན་ཐོག་རྒྱབ་སྐྱོར་གནང་མཁན་རྣམས་ལ་ཐུགས་རྗེ་ཆེ་ཞུ་རྒྱུ་ཡིན། ངོས་ཀྱིས་བོད་མིའི་ཆབ་སྲིད་ཐོབ་ཐང་ཁོ་ན་གཙོ་བོར་འཛིན་གྱི་མེད། ཆབ་སྲིད་ཐོབ་ཐང་དེ་ལས་བོད་མིའི་ཐུན་མིན་ཆོས་དང་རིག་གཞུང། སྐད་ཡིག་སྲུང་སྐྱོབ་བྱ་རྒྱུ་དེ་གཙིགས་ཆེར་འཛིན་བཞིན་ཡོད། དེར་བརྟེན་ཁྱེད་རྣམས་ཀྱིས་འཚེ་མེད་ཞི་བ་དང་བྱམས་བརྩེའི་ལྟ་གྲུབ་ལ་གཞི་བཅོལ་བའི་བོད་མིའི་ཆོས་དང་རིག་གཞུང་མི་ཉམས་རྒྱུན་འཛིན་དང་ཉམས་པ་སླར་གསོ་ཇི་ལྟར་ཐུབ་མིན་ཐད་རོགས་རམ་གནང་རོགས་ཞུ་རྒྱུ་ཡིན། ཞེས་བཀའ་ལན་སྩལ།
ཕྱེད་ཡོལ་རི་ག་ས་ཁུལ་གྱི་ Arena Riga ཚོགས་ཁང་ཞིག་ཏུ་ཐོག་མར་སྐུ་ཞབས་ཇ་ནི་སི་མར་ཊིན་སི་སུ་ཀུ་ཇ་ Janis Martins Skujaལགས་ཀྱིས་གཞས་སྣ་འཁྲབ་སྟོན་གཟིགས་འབུལ་ཞུས་ཡོད། དེ་རྗེས་ཁོང་གིས་ཡུལ་སྐད་ཐོག་ནས་མང་ཚོགས་རྣམས་ལ་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ངོ་སྤྲོད་གནང། སྐབས་དེར་མང་ཚོགས་རྣམས་ཀྱིས་སྡིངས་ཆའི་ཉེ་འགྲམ་དུ་བཅར་ནས་༸གོང་ས་མཆོག་ལ་གུས་འདུད་མཚོན་ཆེད་མེ་ཏོག་ཀུ་མུ་ད་འབུལ་ལམ་ཞུས། སྤྱིར་ཁོང་ནི་ལ་ཏི་ཝི་ཡའི་བོད་དོན་རྒྱབ་སྐྱོར་ཚོགས་པ་ Latvian Tibet Union གསར་འཛུགས་གནང་མཁན་ཡིན་འདུག དེ་རྗེས་སྐུ་ཞབས་ཇ་ནི་སི་མར་ཊིན་སི་སུ་ཀུ་ཇ་ལགས་ཀྱིས་གསོལ་འདེབས་ཞུས་དོན་ལྟར། ༸གོང་ས་མཆོག་གིས་གཞོན་སྐྱེས་ཁག་གཅིག་ལ་བྱམས་བརྩེའི་གཟེངས་རྟགས་ Award for Youth Compassion སྩོལ་རས་སྩལ། སྐབས་དེར་འདི་ལོའི་གཟེངས་རྟགས་ཐོབ་མཁན་ལྕམ་ཏེ་རེ་ཛི་ཊེལ་པེ་ལགས་ཡིན་པ་དང། ཁོ་མོས་རང་གི་ཉེ་འཁོར་ས་ཁུལ་དུ་བྱམས་བརྩེ་ཉམས་ལེན་གནང་བར་ངོས་འཛིན་ཐོབ་པ་ཞིག་ཡིན་འདུག གཟེངས་རྟགས་གསོལ་སྩལ་གྲུབ་རྗེས་༸གོང་ས་མཆོག་གིས་བཀའ་སློབ་ཕེབས་དོན། ཆོས་གྲོགས་ཕོ་མོ་ཚོ་དང་སླར་ཡང་མཇལ་ཏེ་རང་གི་ཉམས་མྱོང་ཕྲན་བུ་ཡོད་པའི་སྐོར་ལ་ཞུ་རྒྱུའི་གོ་སྐབས་ཐོབ་པར་ཧ་ཅང་དགའ་ཚོར་བྱུང། ངོས་ཀྱིས་གོ་སྐབས་ནམ་བྱུང་ལ་ནང་གི་བཟང་པོའི་རིན་ཐང་གོང་མཐོར་གཏོང་ཐབས་བྱེད་བཞིན་ཡོད། དེང་འཛམ་གླིང་སྤྱི་ཚོགས་དེ་བཞིན་ཕྱི་དངོས་པོའི་འཛུགས་སྐྲུན་གཙོ་བོར་འཛིན་བཞིན་པའི་སྐབས་འདིར་དངོས་པོའི་མཐུན་རྐྱེན་རྐྱང་པས་འཕྲལ་སེལ་གྱི་བདེ་བ་ཙམ་དང་དེ་ཡང་གཟུགས་སྒྲ་སོགས་གཙོ་བོ་དབང་ཤེས་ཚོར་བ་བདེ་བ་སྤྲོད་རྒྱུ་ལས། ཡིད་ཤེས་ལ་བརྟེན་པའི་ཕུགས་རྒྱང་རིང་པོའི་བདེ་བ་བསྐྲུན་མི་ཐུབ། བདེ་བ་དེ་ཡུན་གྱི་བདེ་བ་ཡིན། ལུས་པོའི་འཕྲོད་བསྟེན་ལའང་བདེ་བ་དེས་ཕན་ཐོགས་ཡོད། དགེ་སྡིག་གི་ལས་གང་ཡིན་ཡང་གཙོ་བོ་ཀུན་སློང་ལ་རག་ལུས་ཡོད། ང་ཚོས་གཞན་གྱི་བདེ་དོན་ལ་བསམ་བློ་གཏང་ཚེ་གཞན་ལ་བརྙས་བཅོས་དང་བསླུ་བྲིད་བྱ་རྒྱུའི་གོ་སྐབས་གཏན་ནས་མེད། ཅེས་བཀའ་སློབ་ཕེབས་འདུག
