༢༠༡༣ ཟླ་ ༩ ཚེས་ ༡༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༡༨ ཉིན་༸གོང་ས་༸སྐྱབས་མགོན་ཆེན་པོ་མཆོག་ཇར་མན་གྲོང་ཁྱེར་ཧ་ནུ་ཝར་ནང་རྟེན་གཞི་བྱས་པའི་སུད་སི་ལ་ཨིབ་ཚོགས་ཁང་ Swiss Life Hall ཞེས་པའི་ནང་དུ་༸ཞབས་སོར་འཁོད་སྐབས་མང་ཚོགས་རྣམས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་རྗེས་སྡིངས་ཆའི་ཞབས་སྟེགས་ཐོག་༸ཞབས་སོར་འཁོད་མཚམས་མང་ཚོགས་ལྔ་སྟོང་བརྒལ་བར་༸གོང་ས་མཆོག་གིས་བཀའ་སློབ་སྩལ་དོན། ཐོག་མར་ངོས་ཀྱིས། ཁྱེད་ཚོས་ཇར་མན་ཡུལ་འདི་བཞིན་མང་གཙོར་གཞི་བཅོལ་བའི་ཞི་བདེ་དང་ཡར་རྒྱས་ལྡན་པའི་རྒྱལ་ཁབ་ཚུལ་ལྡན་ཞིག་བསྐྲུན་ཐུབ་པར་འཚམས་འདྲི་ཞུ་རྒྱུ་ཡིན། ངོས་རང་ས་གནས་གང་དུ་ཕྱིན་ཡང་འགྲོ་བ་མིའི་ནང་གི་བཟང་པོའི་རིན་ཐང་དང་ཆོས་ལུགས་མཐུན་སྒྲིལ་གོང་འཕེལ་གཏོང་རྒྱུའི་སྐོར་སྐད་ཆ་ཤོད་བཞིན་ཡོད། ང་ཚོ་འགྲོ་བ་མིའི་རིགས་ནི་སྤྱི་ཚོགས་ལ་བརྟེན་ནས་འཚོ་གནས་བྱེད་དགོས་པ་ཡིན། དེར་བརྟེན་ང་ཚོར་གྲོགས་པོ་དང་། ཕན་ཚུན་ཡིད་ཆེས། ཕྱི་གསལ་ནང་གསལ། དྲང་པོ་དྲང་ཤག ཁ་རི་ཁར་ཐུག་སོགས་བྱ་རྒྱུ་གལ་ཆེན་པོ་ཆགས་ཡོད། གལ་ཏེ་ང་ཚོའི་སེམས་དེ་ཉོན་མོངས་པའི་གཞན་དབང་དུ་སོང་ཚེ་བསམ་བློ་གསལ་པོ་མི་ཡོང་། དཔེར་ན།
ཁྱེད་རང་ཁོང་ཁྲོ་ལངས་སྐབས་སེམས་དེ་ཞེ་སྡང་གི་དབང་དུ་སོང་ནས་ཡུལ་དེ་ཧ་ཅང་མི་སྡུག་པ་མཐོང་རྒྱུ་རེད། དེ་ལྟར་མཐོང་བ་དེ་ཉོན་མོངས་ཀྱིས་བཟོས་པ་ཞིག་ཕལ་ཆེར་རེད། དེར་བརྟེན་བཟོད་བསྲན་དང་བསམ་ཤེས་བྱ་རྒྱུའི་བློ་དེས་ཁྱེད་ཀྱི་བྱམས་བརྩེའི་བསམ་པ་སྲུང་སྐྱོབ་བྱེད་ཐུབ། འོན་ཀྱང་མི་ལ་ལས་བཟོད་བསྲན་སོགས་བཟང་པོའི་བློ་དེ་དག་ཉམ་ཐག་པའི་བློ་དང་ང་རྒྱལ་གྱི་བློ་དེ་བློ་ནུས་ལྡན་ཞིག་ལ་རྩི་བཞིན་ཡོད། ང་རྒྱལ་གྱི་བློ་དེ་གཙོ་བོ་ཞེ་སྡང་ནས་ཡོང་བཞིན་ཡོད། ཞེ་སྡང་དེ་སེམས་གཏིང་ན་འཇིགས་སྣང་ཡོད་པའི་རྟགས་རེད། གལ་ཏེ་སེམས་ནང་གདེང་སྤོབས་ཡོད་ཚེ་གནས་སྟངས་ཇི་འདྲ་ཞིག་དང་འཕྲད་ཀྱང་དེར་གདོང་ལེན་བྱེད་ཐུབ་པའི་སྤོབས་པ་ཡོད་སྟབས། ཁོང་ཁྲོ་ལངས་དགོས་དོན་རྩ་བ་ནས་མེད། གཞི་རྩའི་འགྲོ་བ་མིའི་རང་བཞིན་དེ་ཞི་འཇམ་ལྡན་པ་ཞིག་ཡིན། ང་ཚོར་བྱམས་བརྩེའི་ཉམས་མྱོང་དང་པོ་དེ་མ་ལས་ཡོང་བཞིན་ཡོད། མའི་བྱམས་སྐྱོང་མེད་ན་ང་ཚོ་འཚོ་མི་ཐུབ། འོན་ཀྱང་རྒྱུ་མཚན་དང་དངོས་ཡོད་གནས་ཚུལ་སོགས་བརྟེན་ནས་ང་ཚོས་བྱམས་བརྩེའི་བསམ་བློ་དེ་ཡར་རྒྱས་བཏང་སྟེ་མཐར་རང་ཉིད་ཀྱི་དགྲ་བོར་ཡང་བྱམས་བརྩེ་བསྟེན་ཐུབ། མིའི་བཟང་པོའི་རིན་ཐང་དེ་དག་ཤེས་ཡོན་དང་སྦྱོང་བརྡར་ཐོག་ནས་ཡར་རྒྱས་གཏོང་ཐུབ། ཅེས་སོགས་ཀྱི་བཀའ་སློབ་སྩལ་རྗེས་མང་ཚོགས་ཀྱི་དྲི་བར་བཀའ་ལན་སྩལ།
དེ་རྗེས་ཚོགས་ཁང་ནས་ཆིབས་སྒྱུར་བསྐྱངས་ཏེ་རྒྱལ་སྒོའི་མདུན་དུ་བོད་མི་ཁག་གཅིག་ལ་མཇལ་ཁ་སྩོལ་ཆེད་ཆིབས་འགྲོ་ནས་བབ་གཤོལ་མཛད་དེ་བོད་མི་ཚོར་རང་གི་ཐུན་མིན་ཆོས་དང་རིག་གཞུང་གཅེས་འཛིན་བྱ་རྒྱུ་གལ་ཆེ་ཡིན་པའི་ལམ་སྟོན་བཀའ་སློབ་སྩལ་རྗེས་སྐུ་དཔར་སྒྲོན་ནས་བཞུགས་གནས་མགྲོན་ཁང་དུ་ཆིབས་སྒྱུར་བསྐྱངས། ཕྱི་ཚེས་ ༡༩ ཉིན་༸གོང་ས་མཆོག་གིས་སྔ་དྲོ་ཐོག་མར་གཞོན་སྐྱེས་ཚོར་བཀའ་སློབ་སྩལ་རྗེས་ཕྱེད་ཡོལ་བྱམ་བརྩེའི་ནུས་སྟོབས་སྐོར་མང་ཚོགས་བཀའ་སློབ་སྩལ་རྒྱུ་ཡིན་འདུག་པ་བཅས།།
