༢༠༡༣ ཟླ་ ༩ ཚེས་ ༡༧ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༡༦ རེས་གཟའ་ཟླ་བའི་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཅེཀ་སྤྱི་མཐུན་རྒྱལ་ཁབ་ཀྱི་གསར་འགྱུར་བརྒྱུད་ལམ་གྲགས་ཆེ་ཤོས་ཡིན་པ་ཧོ་སི་པོ་དར་སི་ཀི་ནོ་ཝིན་ནེ་ Hospodárské noviny ཞེས་པའི་གསར་འགོད་པའི་ཆེད་དོན་དྲི་བར་བཀའ་ལན་སྩལ་ཡོད། སྐབས་དེར་རྒྱ་ནག་གི་གནད་དོན་ཐོག་བཀའ་ལན་སྩལ་དོན། རྒྱ་ནག་རྒྱལ་ཁབ་སྟོབས་ཤུགས་ཇི་ཙམ་ཆེ་ན་ཡང་འཛམ་གླིང་རྒྱལ་ཁབ་གཞན་དང་སྤྱི་མཚུངས་ཐོག་གསར་འགྱུར་རང་དབང་དང་མང་གཙོའི་ལམ་ལ་མ་བསྐྱོད་ཐབས་མེད་ཆགས་ཡོད། རྒྱ་ནག་རྒྱལ་ཁབ་ནི་ཧ་ཅང་ཆེན་པོ་ཡིན་པར་བརྟེན་རྒྱལ་སྤྱིའི་ཐོག་ལས་དོན་གལ་ཆེ་མང་པོ་ཞིག་བསྒྲུབ་རྒྱུའི་འགན་ཞིག་ཡོད། འགན་དེ་བསྒྲུབ་པར་འཛམ་གླིང་གི་ཡིད་ཆེས་ཐོབ་དགོས། སྤྱི་ཚོགས་ནང་དམ་བསྒྲགས་དང་ཕྱི་གསལ་ནང་གསལ་མེད་ཚེ་གཞན་གྱི་ཡིད་ཆེས་ཐུབ་ཐབས་མེད། རྒྱ་ནག་གི་འགོ་ཁྲིད་གསར་པ་ཚོས་རྒྱ་རིགས་ནང་ཁུལ་དང་གྲངས་ཉུང་མི་རིགས་ཁྲོད་སྤྱི་ཚོགས་འཆམ་མཐུན་གོང་འཕེལ་གཏོང་རྒྱུའི་སྲིད་བྱུས་རྒྱུན་འཁྱོངས་བྱེད་བཞིན་ཡོད།
འོན་ཀྱང་འཆམ་མཐུན་དེ་དྲག་ཤུགས་ཐོག་ནས་བསྐྲུན་མི་ཐུབ། ད་ལྟའི་སྲིད་འཛིན་གསར་པ་ཞི་ཅིན་ཕིང་གིས་ལྐོག་ས་རུལ་སུངས་མེད་པ་བཟོ་རྒྱུའི་སྲིད་བྱུས་འདི་བསྔགས་འོས་ཞིག་ཡིན། ཁོང་གི་གྲོགས་པོ་མང་པོས་ཞི་ཅིན་ཕིང་ནི་རྒྱུ་མཚན་ལྡན་པའི་བསམ་བློ་གཏོང་མཁན་ཞིག་ཡིན་པར་བསྔགས་བརྗོད་བྱེད་བཞིན་འདུག ཅེས་བཀའ་ལན་སྩལ་བ་དང་སྦྲགས། བོད་དོན་ཐོག་བཀའ་ལན་སྩལ་དོན། བོད་ཀྱི་ཁོར་ཡུག་ནི་ཨེ་ཤི་ཡའི་ཁྱོན་ལ་ཧ་ཅང་གལ་གནད་ཆེན་པོ་ཆགས་ཡོད་པ་མ་ཟད། བོད་ལ་འཛམ་གླིང་གི་སྣེ་གསུམ་པ། Third Pole ཞེས་ཡོངས་སུ་གྲགས་བཞིན་ཡོད། གཞུང་གི་སྲིད་བྱུས་ཟེར་རྒྱུ་དེ་སང་ཉིན་རང་འགྱུར་བ་འགྲོ་སྲིད་པ་ཞིག་རེད། འོན་ཀྱང་ཁོར་ཡུག་ལ་ཉམས་ཆག་ཕོག་ཚེ་སླར་གསོ་ཡོང་རྒྱུར་དུས་ཚོད་ཧ་ཅང་ཡུན་རིང་འགོར་རྒྱུ་ཡིན། ཞེས་བཀའ་ལན་སྩལ།
གཞན་ཡང་གསར་འགོད་པས་༸གོང་ས་མཆོག་ཁུལ་དེར་ཆིབས་སྒྱུར་བསྐྱངས་པ་ལ་བརྟེན་ནས་ཡུལ་དེ་དང་རྒྱ་ནག་བར་ཚོང་འབྲེལ་ལ་དོ་ཕོག་འགྲོ་རྒྱུའི་ཐོག་བཀའ་འདྲི་ཞུས་པར་བཀའ་ལན་སྩལ་དོན། ཚོང་འབྲེལ་གལ་ཆེན་པོ་རེད། སྔོན་མ་ཨ་རིའི་གཞུང་གིས་ཚོང་འབྲེལ་ཡག་ཤོས་བྱེད་སའི་རྒྱལ་ཁབ་ཀྱི་གནས་བབ་ Most Favoured Nation status དེ་རྒྱ་ནག་ལ་སྤྲོད་དགོས་མིན་ཐོག་གོ་བསྡུར་སྦྱང་བཤད་སྐབས་ངོས་ཀྱིས་རྒྱབ་སྐྱོར་བྱས་པ་ཡིན། གང་ཡིན་བརྗོད་ན་རྒྱ་ནག་ནང་མི་མང་དུང་ཕྱུར་ ༡༣ ཡོད་པ་དེ་དག་ཟུར་ཕུད་བྱས་པ་ལས་ཁོང་ཚོ་དང་འབྲེལ་བ་འཛུགས་རྒྱུ་དེར་ངོས་ཀྱིས་མོས་མཐུན་དང་རྒྱབ་སྐྱོར་བྱེད་བཞིན་ཡོད། རྒྱ་ནག་དང་ཚོང་འབྲེལ་བྱ་རྒྱུ་གལ་ཆེན་པོ་རེད། རྒྱ་ནག་རང་ཉིད་ཀྱང་གོ་ལའི་དཔལ་འབྱོར་གྱི་ཁྲོམ་རྭའི་ནང་མཉམ་ཞུགས་བྱ་འདོད་ཡོད། དེ་ལྟར་ནའང་འགྲོ་བ་མིའི་ཐོབ་ཐང་གི་གནད་དོན་སྐོར་རྒྱ་ནག་དང་འབྲེལ་བ་བྱེད་སྐབས་ལངས་ཕྱོགས་བརྟན་པོ་བཟུང་རྒྱུ་དེ་ཧ་ཅང་གལ་ཆེན་པོ་ཆགས་ཡོད། ཅེས་བཀའ་ལན་སྩལ།
