༢༠༡༣ ཟླ་ ༩ ཚེས་ ༡༢ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༡༡ རེས་གཟའ་ལྷག་པའི་ཉིན་༸གོང་ས་༸སྐྱབས་མགོན་ཆེན་པོ་མཆོག་ལ་ལུ་ཐེ་ནི་ཡའི་སྲིད་འཛིན་ལྕམ་སྐུ་ད་ལི་ཡ་གེར་བྷུ་སི་ཀེ་ཊི་ Ms Dalia Grybauskaite མཆོག་གིས་མཇལ་འཕྲད་ཞུས་ཡོད། སྐབས་དེར་སྲིད་འཛིན་མཆོག་གིས་༸གོང་ས་མཆོག་ཡུལ་དེར་ཆིབས་སྒྱུར་བསྐྱངས་པར་དགའ་བསུའི་འཚམས་འདྲི་ཞུས་རྗེས་༸གོང་ས་མཆོག་གིས་ཀྱང་སྲིད་འཛིན་མཆོག་ལ་དཀར་གཙང་མཇལ་དར་བསྒྲོན་པ་དང་འབྲེལ་འཚམས་འདྲི་མཛད། སྲིད་འཛིན་མཆོག་གིས་༸གོང་ས་མཆོག་ལུ་ཐེ་ནི་ཡའི་ནང་ཉིན་གསུམ་རིང་མཛད་འཕྲིན་བསྐྱང་འཆར་ཡོད་པ་དང་། ཡུལ་མི་ཚོས་མགོན་པོ་གང་ཉིད་མཆོག་ལ་དགའ་མོས་ཧ་ཅང་ཞུ་བཞིན་ཡོད་པར་བརྟེན་ཐེངས་འདིར་༸གོང་ས་མཆོག་དང་མཇལ་ཏེ་དགའ་བསུའི་སྣེ་ལེན་ཞུ་ཐུབ་པར་ཧ་ཅང་དགའ་སྤོབས་ཆེན་པོ་བྱུང་ཡོད་སྐོར་དང། ༸གོང་ས་མཆོག་ཡུལ་དེར་ཆིབས་སྒྱུར་ཐེངས་གསུམ་པའི་སྐབས་འདིར་སྐུའི་འཕྲོད་བཞེས་ཧ་ཅང་ཡག་པོ་ཡོད་པར་བརྟེན་སྲིད་འཛིན་མཆོག་དགའ་སྤྲོ་ལྡན་པ་བྱུང་ཡོད་སྐོར་སྙན་སྒྲོན་ཞུས་ཡོད། དེ་རྗེས་༸གོང་ས་མཆོག་གིས་བྷལ་ཊིག་རྒྱལ་ཁབ་ནང་ཆིབས་སྒྱུར་བསྐྱངས་ཐུབ་པ་མ་ཟད། ཡུལ་མི་ཚོ་ཐུག་ནས་ཕན་ཚུན་འཚམས་འདྲི་མཛད་བྱུང་བ་དང། ལུ་ཐེ་ནི་ཡའི་ཡུལ་དེ་རྒྱལ་ཁབ་གསར་གྲས་ཤིག་ཡིན་པ་དང་སྤྱིར་ལུང་པ་ཆུང་ཆུང་ཡིན་ནའང་སོ་སོའི་རང་དབང་ཆེད་སྙིང་སྟོབས་ཆེན་པོས་འབད་བརྩོན་བྱས་པའི་ལོ་རྒྱུས་དེ་དག་མཐོང་སྐབས་ངོ་མཚར་སྐྱེ་གནང་མཛད་ཡོད་སྐོར་དང་། དེ་བཞིན་སྐུའི་རླབས་ཆེན་གྱི་མཛད་འཕྲིན་གཙོ་བོ་ཁག་གཉིས་སྐོར་ངོ་སྤྲོད་སོགས་ཀྱི་གསུང་མོལ་ཐུགས་དགྱེས་ཚོར་ཆེན་པོའི་ངང་མཛད་ཡོད། སྲིད་འཛིན་ལྕམ་སྐུ་མཆོག་ཡུ་རོབ་སྤྱི་མཐུན་ཚོགས་པའི་ President of the European Unionཚོགས་གཙོ་ཡང་ཡིན་འདུག
དེ་སྔ་ལོ་གཉིས་གོང་ཨི་སི་ཊོ་ནི་ཡའི་ Estoniaསྲིད་འཛིན་ཏུ་མ་སི་ཨིལ་ཝི་སི་Toomas Ilves མཆོག་ནས་ཀྱང་རྒྱ་ནག་གཞུང་གི་གནོན་ཤུགས་ལ་མ་འཛེམ་པར་༸གོང་ས་མཆོག་དང་མཇལ་འཕྲད་ཞུས་ཡོད། སྤྱིར་ཨི་སི་ཊོ་ནི་ཡ་དང་ལུ་ཐེ་ནི་བཅས་བྷལ་ཊིག་ཡུལ་ (Baltic States) གཉིས་དེ་སྔ་དམར་ཤོག་ཚོགས་པའི་དབང་བསྒྱུར་འོག་དཀའ་སྡུག་ཧ་ཅང་མྱངས་ཡོད།

བརྙན་འཕྲིན་གཟིགས་ཆེད་འདིར་གནོན།