༢༠༡༣ ཟླ་ ༩ ཚེས་ ༢༣ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་པོ་མཆོག་ལ་ཐེ་ཝན་དད་ལྡན་ཆོས་ཞུ་བ་ཁག་གཅིག་གིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་སྟེ་མགོན་པོ་གང་ཉིད་མཆོག་གིས་ཕྱི་ལོ་ ༢༠༡༣ ཟླ་ ༩ ཚེས་ ༣༠ ནས་དབུ་འཛུགས་ཀྱིས་ཕྱི་ཟླ་ ༡༠ ཚེས་ ༣ བར་ཉིན་གྲངས་གསུམ་དང་ཕྱེད་ཀའི་རིང་སྔ་དྲོ་ཆུ་ཚོད་ ༨ ནས་ ༡༢ བར་ཐེ་ཝན་དད་ལྡན་ཆོས་ཞུ་བ་རྣམས་ལ་རྡ་ས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་རིག་པ་དྲུག་ཅུ་པ་དང་རྗེ་ཙོང་ཁ་པ་ཆེན་པོས་མཛད་པའི་ལམ་རིམ་བསྡུས་དོན་གྱི་ཆོས་འབྲེལ་བཀའ་དྲིན་སྩལ་རྒྱུ་ཡིན་འདུག
དེ་བཞིན་གསུང་ཆོས་འདི་དག་ཐད་ཀར་རྒྱ་སྐད་ཐོག་བསྒྱུར་རྒྱུ་མ་ཟད། དབྱིན་སྐད་དང་། ཉི་ཧོང་། ཀོ་རི་ཡ། ཝི་ཏི་ནམ་བཅས་ཀྱི་སྐད་ཐོག་ལའང་བསྒྱུར་ཏེ་རླུང་འཕྲིན་དང་དྲ་རྒྱའི་ཐོག་གཏོང་རྒྱུ་ཡིན་འདུག་པ་བཅས། །
