༢༠༡༣ ཟླ་ ༩ ཚེས་ ༡༩ རེས་གཟའ་ཕུར་བུ།
༄༅ །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལི་ཐུ་ཝེ་ནི་ཡ་དང་ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རག་ནང་གི་མཛད་འཕྲིན་ཁག་ལེགས་པར་གྲུབ་སྟེ། ཕྱི་ལོ་ ༢༠༡༣ ཟླ་ ༩ ཚེས་ ༡༧ ཉིན་གྱི་ཕྱི་དྲོ་ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རག་ནས་མཁའ་ལམ་བརྒྱུད་ཇར་མ་ནིའི་གྲོང་ཁྱེར་ཧ་ནོ་ཝར་(Hanover)དང་། དེ་ནས་བཞུགས་གནས་མགྲོན་ཁང་དུ་༸ཞབས་སོར་འཁོད་སྐབས་ཧ་ནོ་ཝར་མངའ་སྡེའི་གྲོས་ཚོགས་ཀྱི་ཚོགས་གཙོ་མཆོག་གིས་གཙོས་གནད་ཡོད་མི་སྣ་ཁག་གཅིག་དང་བོད་རིགས་བཅས་ཀྱིས་ཕེབས་བསུ་གཟབ་རྒྱས་ཞུས་འདུག
ཕྱི་ཚེས་ ༡༨ ཉིན་སྔ་དྲོ་མགོན་པོ་གང་ཉིད་མཆོག་ཇར་མ་ནིའི་གྲོང་ཁྱེར་ཧ་ནོ་ཝར་དུ་རྟེན་གཞི་བྱས་པའི་ཨ་ཡེ་ཇི་ཨེས་(IGS School) སློབ་གྲྭའི་ཚོགས་ཁང་ནང་༸ཞབས་སོར་འཁོད་སྐབས། ཧ་ནུ་ཝར་གྲོང་སྡེའི་ལྷན་ཚོགས་ཀྱི་ཚོགས་མི་དང་སློབ་གྲྭ་དེའི་སློབ་སྤྱིས་༸གོང་ས་མཆོག་ལ་དུས་རབས་ ༡༧ ལོ་མཇུག་དང་དུས་རབས་ ༡༨ ནང་ལྟ་གྲུབ་སྨྲ་བ་གྲགས་ཅན་སྐུ་ཞབས་ལིབ་ནི་ཛི་མཆོག་གི་ Leibnitzའདྲ་སྐུ་ཕྱེད་གཟུགས་ཤིག་ཕྱག་རྟགས་སུ་འབུལ་ལམ་ཞུས་པ་དང་འབྲེལ་སློབ་ཕྲུག་རྣམས་ཀྱིས་ཆེ་བསྟོད་རོལ་དབྱངས་ཀྱི་ལམ་ནས་༸གོང་ས་མཆོག་ལ་ཕེབས་བསུ་གཟབ་རྒྱས་ཞུས། སྐབས་དེར་སློབ་གྲྭ་དེའི་སློབ་ཕྲུག་རྣམས་ཀྱིས། བོད་མིའི་སློབ་གྲྭ་ཁག་གཅིག་ལ་རོགས་རམ་གནང་ཆེད་ཞལ་འདེབས་བསྡུ་རུབ་ཀྱི་ལས་འགུལ་སྤེལ་བའི་བརྙན་འཕྲིན་ཐུང་ངུ་ཞིག་གཟིགས་འབུལ་ཞུས་གྲུབ་བསྟུན། ༸གོང་ས་མཆོག་གིས་བཀའ་སློབ་སློབ་སྩལ་དོན།
ངོས་རང་དེ་རིང་འདིར་གཞོན་སྐྱེས་ཁྱེད་རྣམས་དང་ཐུག་རྒྱུ་བྱུང་བར་ཧ་ཅང་དགའ་པོ་བྱུང་། དུས་རྒྱུན་ཁྱེད་ཚོ་དང་འདྲ་བའི་གཞོན་སྐྱེས་དང་ཐུག་སྐབས་ངོས་ཀྱིས་སོ་སོའི་ལོ་ཡང་བརྗེད་འགྲོ་བཞིན་འདུག གལ་ཆེ་ཤོས་དེ་ང་ཚོ་ཚང་མ་འཛམ་གླིང་འདིའི་སྟེང་གནས་པའི་མི་ཐེར་འབུམ་བདུན་གྱི་གྲས་ཤིག་ཆགས་ཡོད། ང་ཚོ་ཚང་མས་མི་ཚེ་བདེ་སྐྱིད་ལྡན་པ་ཞིག་འདོད་པ་བཞིན་ང་ཚོར་དེ་བསྒྲུབ་རྒྱུའི་ཐོབ་ཐང་ཡང་ཡོད། ཅེས་བཀའ་སྩལ།
ལྷག་པར་མགོན་པོ་གང་ཉིད་མཆོག་གིས་ཤེས་ཡོན་གྱི་དགོས་དམིགས་དང་འབྲེལ་བའི་སྐོར་བཀའ་སློབ་ཕེབས་དོན། ང་ཚོ་ཚང་མས་མི་ཚེ་བདེ་སྐྱིད་ལྡན་པ་ཞིག་སྐྱེལ་རྒྱུའི་དམིགས་ཡུལ་གཅིག་མཚུངས་ཡིན། ཤེས་ཡོན་ནི་ལག་ཆ་ལྟ་བུ་རེད། དེས་གཏོར་བཤིག་དང་འཛུགས་སྐྲུན་གཉིས་ཀ་བྱེད་ཐུབ། འཛམ་གླིང་དམག་ཆེན་གཉིས་པའི་རྗེས་ཡུལ་འདིར་གོད་ཆག་འོག་དཀའ་སྡུག་ཧ་ཅང་མྱངས་ཡོད། འོན་ཀྱང་ཇར་མ་ནིའི་མི་མང་རྣམས་ཀྱི་ཡིད་ཆེས་དང་སྙིང་སྟོབས། དཀའ་ལས་བརྒྱབ་པར་བརྟེན་རྒྱལ་ཁབ་རླབས་ཆེན་འདི་སླར་ཡང་འཛུགས་སྐྲུན་ཐུབ་པ་བྱུང་ཡོད།
ངོས་རང་དུས་རབས་ ༢༠ པའི་མི་རབས་ཤིག་ཆགས་ཡོད། ཁྱེད་རང་ཚོ་གཞོན་སྐྱེས་རྣམས་དུས་རབས་ ༢༡ པའི་མི་རབས་ཡིན། དུས་རབས་ ༢༠ ནི་ད་ཆ་ཡོལ་ཟིན། བསྐྱར་ལོག་མི་ཐུབ། འདས་པའི་དུས་སྐབས་ཀྱི་ཉམས་མྱོང་ལས་ང་ཚོས་བསླབ་བྱ་བླང་ཆོག་ཀྱང་དེར་འགྱུར་བཅོས་གཏོང་ཐབས་བྲལ། འོན་ཀྱང་མ་འོངས་པ་དེ་བཟོ་ལྟ་གང་འདྲ་བཟོ་མིན་ང་ཚོའི་ལག་ཏུ་ཡོད། དུས་རབས་ ༢༠ ནང་འཛུགས་སྐྲུན་དང་ཡར་རྒྱས་ཧ་ལས་པ་ཕྱིན་ཡོད་ཀྱང་། མི་གསོད་ཁྲག་སྦྱོར་གྱི་དུས་རབས་དེའི་ནང་མི་ས་ཡ་ཉིས་བརྒྱ་ཙམ་དྲག་གཅོད་འོག་དམར་གསོད་བཏང་ཡོད། ཁྱེད་ཚོར་དུས་རབས་འདི་བདེ་སྐྱིད་ལྡན་པ་ཞིག་བསྐྲུན་རྒྱུའི་གོ་སྐབས་དང་འགན་ཡོད། ཁྱེད་རང་ཚོས་རྩོད་རྙོག་དེ་དག་གྲོས་མོལ་དང་འདུམ་འགྲིག་བྱས་ཏེ་དཀའ་རྙོག་སེལ་ཐབས་བྱེད་དགོས། དེ་ལྟར་བྱེད་རྒྱུར་ཁྱེད་ཚོས་མི་གཞན་གྱི་ཐོབ་ཐང་དང་བསམ་ཚུལ་སོགས་ལ་སྤུན་མཆེད་ཀྱི་འདུ་ཤེས་ཐོག་གུས་བརྩི་བྱེད་དགོས། ཁྱེད་ཚོས་འགྲོ་བ་མི་རིགས་ཚང་མ་ཁྱིམ་ཚང་གཅིག་གི་མི་ཞིག་གི་འདུ་ཤེས་འཛིན་དགོས། དེའི་ཐོག་བསམ་བློ་ཞིག་གཏོང་རོགས་ཞེས་ངོས་ཀྱིས་འབོད་སྐུལ་ཞུ་རྒྱུ་ཡིན། ཞེས་སོགས་ཀྱི་བཀའ་སློབ་དང་སློབ་ཕྲུག་རྣམས་ཀྱི་དྲི་བར་བཀའ་ལན་ཡང་སྩལ་ཡོད་པ་བཅས།།
