༢༠༡༣ ཟླ་ ༨ ཚེས་ ༡༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༨ ཚེས་ ༡༢ ཉིན་སྲིད་སྐྱོང་བློ་བཟང་སེང་གེ་མཆོག་གིས་རྡ་ས་གངས་སྐྱིད་དུ་བོད་མིའི་དང་བླངས་ཞབས་ཞུ་བའི་སྡོད་ཁང་བསྐྱར་སྐྲུན་གྱི་དབུ་འབྱེད་གནང་ཡོད།
དེ་ཡང་གོང་ཚེས་ཉིན་ཕྱི་དྲོ་ཆུ་ཚོད་ ༤ ཐོག་སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་གེ་མཆོག་གི་དབུས་བཀའ་བློན་རྣམ་པ་དང་། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག ལྷན་ཁང་ཁག་གི་དྲུང་ཆེ་རྣམས་ཆེད་ཕེབས་ཀྱིས་ཐོག་མར་སྲིད་སྐྱོང་མཆོག་གིས་སྒོ་འབྱེད་ཀྱི་དར་ཚོན་གཅོད་བྲེག་རྗེས་སྣང་གསལ་ཞལ་ཕྱེ་གྲུབ་མཚམས། ༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་ཞུས། དེ་ནས་བོད་མིའི་དང་བླངས་ཞབས་ཞུ་བའི་འགན་འཛིན་སྐལ་རྡོར་ལགས་ཀྱིས་ལས་གཞི་འདི་དབུ་འཛུགས་བྱས་ཏེ་ད་བར་ལོ་གཅིག་དང་ཟླ་བ་བཞི་ཙམ་རིང་དང་བླངས་ཞབས་ཞུ་བ་གྲངས་ ༡༧ ཙམ་བྱུང་ཡོད་པ་དང་།
བོད་མིའི་སྒྲིག་འཛུགས་ཀྱི་ལྷན་ཁང་ཁག་བདུན་དང་རང་དབང་ཅན་གྱི་སྡེ་ཚན་ལས་ཁུངས་ཁག དེ་བཞིན་རྒྱ་གར་ལྷོ་ཕྱོགས་གཞིས་ཆགས་ཀྱི་འཕྲོད་བསྟེན་སྨན་ཁང་དུ་སྨན་པ་དང་སྨན་ཞབས་པ་སོགས་ཀྱི་དང་བླངས་ཞབས་ཞུ་བ་སོ་སོའི་ལས་དོན་ཇི་གནང་དང་། ལྷག་པར་དང་བླངས་ཞབས་ཞུའི་དྲ་རྒྱའི་ནང་མཐོ་སློབ་ཀྱི་སློབ་ཕྲུག་དང་ཁྱད་ལས་པ་མི་གྲངས་ ༥༠༠ མ་ཟིན་ཙམ་འཛུལ་ཞུགས་བྱེད་མཁན་བྱུང་ཡོད་པ་བཅས་ཀྱི་ལས་བསྡོམས་སྙིང་བསྡུས་ངོ་སྤྲོད་རྗེས་སྡོད་ཁང་གསར་སྐྲུན་ཁག་ལ་ལྟ་སྐོར་གནང་ཡོད། དེ་སྔའི་ནང་སྲིད་ཀྱི་མགྲོན་ཁང་དུ་དང་བླངས་ཞབས་ཞུར་ཕེབས་མི་རྣམས་ཀྱི་ཆེད་ཁང་མིག་དྲུག་ཅན་ཞིག་དང་སྟེང་དུ་སྲིད་སྐྱོང་ཚོགས་ཁང་ཞེས་པ་ཞིག་བསྐྱར་སྐྲུན་ལེགས་བཅོས་ཀྱི་དབུ་འབྱེད་གནང་ཡོད་པ་བཅས།།
