༢༠༡༣ ཟླ་ ༨ ཚེས་ ༣ རེས་གཟའ་སྤེན་པ།
༄༅། །འདི་གར་ཆོས་རིག་ལས་ཁུངས་ཀྱིས་ཕྱི་ལོ་ ༢༠༡༣ ཟླ་ ༨ ཚེས་ ༣ ཉིན་བཏང་གནས་ནང་འཁོད་དོན། བཀའ་དྲུང་ཡིག་ཚང་ནས་ཕྱི་ལོ་ ༢༠༡༣ ཟླ་ ༧ ཚེས་ ༣༡ འཁོད་གནས་གནང་འབྱོར་ལྟར། ཕྱི་ལོ་ ༢༠༡༣ ཟླ་ ༨ ཚེས་ ༨ ཉིན་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ནས་བཀའ་བློན་ཁྲི་པའི་མཛད་ཁུར་དམ་འབུལ་གནང་ནས་ལོ་གཉིས་ཧྲིལ་པོར་འཁོར་རྒྱུ་དང།
དུས་ཡུན་དེའི་ནང་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོའི་ཐུགས་རྗེའི་བྱིན་མཐུ་དང། གཞུང་བསྟན་ཆོས་སྲུང་རྣམས་ཀྱི་འཕྲིན་ལས། གཞིས་བྱེས་བོད་མི་ཡོངས་ཀྱི་ཡིད་ཆེས་དང་རྒྱབ་སྐྱོར། བོད་མིའི་སྒྲིག་འཛུགས་ཀྱི་མཛད་གཙོ་དང་ལས་བྱེད་པ་རྣམས་ཀྱི་མཐུན་སྐྱོར་བཅས་ལ་བརྟེན་ནས་བོད་མིའི་སྤྱི་དོན་འགན་འཁུར་ཞུ་སྒོ་གང་ཅི་གེགས་མེད་ལམ་ལྷོངས་དང། གྲུབ་འབྲས་མི་དམན་ཙམ་བྱུང་བའི་བཀའ་དྲིན་གཏང་རག་མཚོན་ཕྱིར་དང།
བོད་དང་བོད་མིའི་རྩ་དོན་ཆེད་ཕྱི་ལོ་ ༢༠༠༩ ནས་བཟུང་རང་ལུས་མེར་སྲེག་གནང་མཁན་འདས་གསོན་འབྲེལ་ལྟོས་ཡོངས་ཀྱི་ཆེད་དུ་མཆོག་གསུམ་༸རྒྱལ་བ་རྒྱ་མཚོར་གདུང་འབོད་གསོལ་འདེབས་ཞུ་བའི་སླད་གོང་ཚེས་ཕྱི་ལོ་ ༢༠༡༣ ཟླ་ ༨ ཚེས་ ༨ སྔ་དྲོ་ཆུ་ཚོད་ ༩།༣༠ ཐོག་ཐེག་ཆེན་ཆོས་གླིང་གཙུག་ལག་ཁང་དང། བཙན་བྱོལ་བོད་མིའི་འདུས་སྡོད་ས་གནས་གཞན་བཅས་སུ་སྨོན་ལམ་མཆོད་འབུལ་གྱི་འདུ་འཛོམས་རྒྱས་པ་རེ་གོ་སྒྲིག་དགོས་རྒྱུ་ཞེས་བཀའ་ཤག་ནས་ཐག་གཅོད་ལམ་སྟོན་ཕེབས་སོང་ན། སེར་སྐྱ་མང་ཚོགས་རྣམས་དུས་ཐོག་ཚང་འཛོམས་དགོས་པ་ཁྱབ་ཁོངས་གཞིས་སྒར་ཁག་དང། ཆོས་སྡེ་ཁག་དང། སློབ་གྲྭ་སོགས་ལ་འཚེམས་ལུས་མེད་པར་བརྡ་ཁྱབ་ནན་འདྲོངས་གནང་གལ་ཆེ་བ་ཡིན་སྐོར་འཁོད་འདུག་པ་བཅས། །
