༢༠༡༣ ཟླ་ ༨ ཚེས་ ༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༨ ཚེས་ ༦ ཉིན་སྐུ་ཞབས་ཝི་ཇེ་ཀརནཌི་ལགས་ཀྱིས་རྩོམ་སྒྲིག་དང་བསོད་ནམས་དོན་གྲུབ་ལགས་ཀྱིས་རི་མོ་བྲིས་པའི་༸གོང་ས་མཆོག་གི་མཛད་རྣམ་མུ་འབྲེལ་རི་མོའི་ལམ་ནས་པར་སྐྲུན་གནང་བ་དེ་བོད་སྨྱུག་དཔེ་སྐྲུན་ཁང་ནས་དེ་རིང་རྡ་ས་མེཀ་ལོར་བོད་ཁྱིམ་ཉིན་སློབ་ནང་དབུ་འབྱེད་ཀྱི་མཛད་སྒོ་སྟབས་བདེ་ཞིག་ཚོགས་ཡོད། དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༤།༣༠ ཐོག་མེཀ་ལོར་བོད་ཁྱིམ་ཉིན་སློབ་ཚོགས་ཁང་དུ་སློབ་ཕྲུག་དང་དགེ་རྒན་གསར་འགོད་པ་བཅས་ཁྱོན་མི་གྲངས་བརྒྱ་ཕྲག་བརྒལ་བ་འདུ་འཛོམས་ཀྱི་ཐོག་མར་བོད་སྨྱུག་དཔེ་སྐྲུན་ཁང་གི་ཚོགས་མི་བསྟན་འཛིན་བརྩོན་འགྲུལ་ལགས་ཀྱིས་རྩོམ་པ་པོ་དང་གསར་འགོད་པ། པར་པ། བོད་དོན་རྒྱབ་སྐྱོར་བ་བཅས་ཡིན་པ་སྐུ་ཞབས་ཝི་ཇེཀརནཌི་ལགས་ངོ་སྤྲོད་གནང་བའི་ནང་། ཁོང་ནི་དུས་ཡུན་ལོ་ངོ་ ༣༠ རིང་བོད་དོན་ལ་རྒྱབ་སྐྱོར་གནང་མཁན་ཞིག་ཡིན་པ་མ་ཟད། དེབ་རིགས་ཁག་དགུ་ཙམ་བྲིས་ཡོད། ཕྱི་ལོ་ ༡༩༨༢ ལོར་ཁོང་གིས་༸གོང་ས་མཆོག་གི་མཛད་རྣམ་དཔེ་དེབ་རྩོམ་སྒྲིག་གནང་ཡོད་པ་དང་། དེ་བཞིན་བོད་དོན་རྒྱབ་སྐྱོར་གྱི་པར་རིགས་སྟོང་ཕྲག་བརྒལ་བ་བརྒྱབ་མྱོང་ཡོད། གཞན་ཡང་ཁོང་སྐུ་ངོ་མ་བོད་ཀྱི་ས་ཁུལ་ཁག་ལ་དངོས་སུ་ཕེབས་ཏེ་བོད་ཀྱི་གནས་ཚུལ་རྒྱུས་ལོན་དང་པར་བརྒྱབ་སྟེ་རྒྱལ་སྤྱིའི་སྟེང་འགྲེམས་སྤེལ་གནང་ཡོད།
ཅེས་སོགས་ཀྱི་ངོ་སྤྲོད་གྲུབ་རྗེས་རྩོམ་པ་པོ་སྐུ་ཞབས་ཝི་ཇེ་ཀརནཌི་ལགས་ཀྱིས་གསུང་དོན། དེ་སྔོན་ཕྱི་ལོ་ ༡༩༨༢ ལོར་ཕྲན་ནས་༸གོང་ས་མཆོག་གི་མཛད་རྣམ་རྩོམ་སྒྲིག་ཞུས་པ་དེ་ནི་རྒྱ་གར་གཞོན་སྐྱེས་ཚོར་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ངོ་སྤྲོ་ཞུ་རྒྱུ་དང་། ད་ཆ་༸གོང་ས་མཆོག་འཛམ་གླིང་ནང་ཧ་ཅང་མཚན་སྙན་གྲགས་རྒྱས་པའི་དུས་སྐབས་འདིར་ཕྲན་ནས་བོད་རིགས་སློབ་ཕྲུག་ཁྱེད་རྣམ་པའི་ཆེད་དུ་མཛད་རྣམ་འདི་མུ་འབྲེལ་རི་མོའི་ལམ་ནས་རྩོམ་སྒྲིག་བྱས་ཡོད་པས་ཡག་པོ་ལྟ་ཀློག་གནང་རྒྱུའི་རེ་བ་ཡོད། ཅེས་སོགས་ཀྱི་མཛད་རྣམ་གྱི་ནང་དོན་རྣམས་ངོ་སྤྲོད་གནང་རྗེས་སློབ་ཕྲུག་ཚོའི་དྲི་བར་ལན་འདེབས་ཀྱང་གནང་། མཐར་ཉིན་སློབ་ཀྱི་སློབ་སྤྱི་གཡང་ལགས་ཀྱིས་ཐུགས་རྗེ་ཆེ་ཞུའི་མཇལ་དར་བསྒྲོན་ཏེ་དབུ་འབྱེད་མཛད་སྒོ་གྲུབ་པ་བཅས།།
