༢༠༡༣ ཟླ་ ༨ ཚེས་ ༡༣ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༨ ཚེས་ ༡༠ ཉིན་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་ཡུ་རོབ་ཁུལ་གྱི་ལས་རིམ་མཐའ་མའི་སྐབས་ཕ་རན་སི་ཁུལ་དུ་གནས་སྡོད་བོད་རིགས་ཁྱོན་མི་གྲངས་ ༡༥༠ ཙམ་འདུ་འཛོམས་བྱུང་བ་རྣམས་ལ་བཙན་བྱོལ་བོད་མིའི་གཞིས་ཆགས་སྲ་བརྟན་ཡོང་ཆེད་ཀྱི་ལས་གཞི་ནང་མཉམ་ཞུགས་གནང་དགོས་པའི་འབོད་སྐུལ་ཞུས་པ་སྦྲགས། དེ་ནི་བོད་དོན་འཐབ་རྩོད་ལ་ཞབས་འདེགས་སྒྲུབ་པ་ཞིག་ཀྱང་མཚོན་རྒྱུ་ཡིན་སྐོར་གསུངས།
དེ་བཞིན་ཕ་རན་སི་བོད་རིགས་ཚོགས་པ་དང་སྐུ་ཚབ་དོན་ཁང་ཐུན་མོང་གིས་གོ་སྒྲིག་འོག་སྲིད་སྐྱོང་བློ་བཟང་སེང་གེ་མཆོག་གིས་ལས་འཁུར་དམ་འབུལ་ཞུས་ཏེ་ལོ་གཉིས་འཁོར་བའི་དུས་དྲན་དང་སྟབས་བསྟུན་མཆོད་འབུལ་སྨོན་ལམ་ཚོགས་སྐབས་བཀའ་བློན་མཆོག་ཀྱང་མཉམ་ཞུགས་གནང་ཡོད་པ་མ་ཟད། སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་དང་དྲུང་ཆེ་ཚེ་རིང་དོན་གྲུབ་ལགས་ཀྱང་མཉམ་ཞུགས་གནང་ཡོད།
གཞན་ཡང་ནང་སྲིད་བཀའ་བློན་མཆོག་ཨི་ཊ་ལི་དང། བྷེལ་ཇམ། ནེ་དྷར་ལེན་ཌི་བཅས་སུ་ཕྱོགས་ཕེབས་སྐབས་བོད་རིགས་དང་བོད་དོན་རྒྱབ་སྐྱོར་བ་ཚོར་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གཞིས་ཆགས་སྲ་བརྟན་གྱི་ལས་གཞིའི་སྐོར་ངོ་སྤྲོད་གནང་ཡོད་པ་མ་ཟད། ལས་གཞི་འདི་བཞིན་ཆིག་སྒྲིལ། གསར་གཏོད། རང་ཁ་རང་གསོ་བཅས་བཀའ་ཤག་སྐབས་བཅུ་བཞི་པའི་ལྟ་གྲུབ་གཙོ་བོ་གསུམ་གྱི་ཆ་ཤས་ཤིག་ཡིན་སྐོར་སོགས་ངོ་སྤྲོད་གནང་ཡོད་པ་བཅས།།
