༢༠༡༣ ཟླ་ ༨ ཚེས་ ༧ རེས་གཟའ་ལྷག་པ།

༄༅། །ཕྱི་ལོ་ ༢༠༡༣ ཟླ་ ༨ ཚེས་ ༦ ཉིན་གྱི་ཞོགས་པ་ཆུ་ཚོད་ ༧།༤༥ ཡས་མས་ཙམ་དུ་བོད་ལྗོངས་ལྷ་ས་གྲོང་ཁྱེར་ཁོངས། འདམ་གཞུང་རྫོང་ཡངས་པ་ཅན་གྲོང་རྡལ་གྱི་ཕ་འཇམ་དབྱངས་བཀྲ་ཤིས་དང་། མ་ཨུ་རྒྱན་གཉིས་ཀྱི་བུ་རང་ལོ་ ༣༩ སོན་པ་ཡངས་པ་ཅན་དགོན་གྱི་དགེ་འདུན་པ་ཀརྨ་ངེས་དོན་རྒྱ་མཚོ་ལགས་ཀྱིས་བོད་བསྟན་པ་ཆབ་སྲིད་ཆེད་བལ་ཡུལ་མཆོད་རྟེན་བྱ་རུང་ཁ་ཤོར་གྱི་སྐོར་ལམ་ནང་རང་ལུས་མེར་སྲེག་གི་ངོ་རྒོལ་གནང་སྟེ་འདས་གྲོངས་སུ་གྱུར་བའི་གནས་ཚུལ་ཐོན་འདུག དེ་ཡང་ཁོང་གི་ལུས་ལ་མེ་འབར་བཞིན་པ་གཡས་གཡོན་གྱི་མི་རེ་ཟུང་གིས་མཐོང་རྗེས་ཆུ་བཤོས་ཏེ་མེ་བསད་ཡོད་པ་དང་། དེ་ནས་བལ་ཡུལ་ཉེན་རྟོག་པས་ Tribhuvan University Teaching Hospital (TUTH) ཞེས་པའི་སྨན་ཁང་དུ་འཁྱེར་རྗེས་ཁོང་འདས་གྲོངས་སུ་གྱུར་བའི་འགྲེལ་བརྗོད་བྱས་འདུག ཀརྨ་ངེས་དོན་རྒྱ་མཚོ་ལགས་ནི། ཕྱི་ལོ་ ༡༩༩༨ ལོར་བོད་འདམ་གཞུང་ཡངས་པ་ཅན་དགོན་དུ་ཆོས་ཞུགས་གནང་བ་དང་། ཕྱི་ལོ་ ༢༠༡༡ ཟླ་ ༡༡ ཚེས་ ༡༨ ཉིན་བལ་ཡུལ་བརྒྱུད་བཙན་བྱོལ་དུ་འབྱོར་བ་ཞིག་ཡིན་འདུག  ཡངས་པ་ཅན་དགོན་ནི། བོད་ཀྱི་ལྷ་ས་གྲོང་ཁྱེར་ཉེ་འགྲམ་འདམ་གཞུང་རྗོང་དུ་ཆགས་ཤིང་། ཞྭ་དམར་སྐུ་ཕྲེང་གསུམ་པའི་སྒྲུབ་ཁང་ཡོད་ཤུལ་དུ་ཞྭ་དམར་སྐུ་ཕྲེང་བཞི་པ་ཆོས་གྲགས་ཡེ་ཤེས་ཀྱིས་ཕྱི་ལོ་ ༡༥༠༣ ལོར་བདེ་ཆེན་ཡངས་པ་ཅན་དགོན་པ་ཕྱག་བཏབ་པ་དང་ཀརྨ་ཞྭ་དམར་བའི་གདན་ས་ཡིན།  དགོན་གནས་དེར་ལོ་རྒྱུས་ཐོག་དར་རྒུད་སྣ་ཚོགས་བྱུང་ཞིང་ཐ་ན་གྲུབ་མཐའ་དགེ་ལུགས་སུ་བསྒྱུར་པ་སོགས་ཀྱང་བྱུང་ཡོད། རྒྱ་ནག་གཞུང་གིས་རིག་གནས་གསར་བརྗེའི་སྐབས་རྩ་གཏོར་བཏང་ཡང་ཕྱི་ལོ་ ༡༩༨༣ ལོ་ནས་ས་གནས་མི་མང་གིས་ཉམས་གསོ་ཞུས་ཏེ་སྔར་སྲོལ་ལྟར་ཀརྨ་བཀའ་བརྒྱུད་ཀྱི་ཕྱག་སྲོལ་མི་ཉམས་ཙམ་ཡོད་འདུག  གཞན་ཡང་འདི་ལོའི་ཕྱི་ཟླ་ ༢ ཚེས་ ༡༣ ཉིན་དཀར་མཛེས་གསེར་རྟ་རྫོང་ནུབ་ཟུར་ཡུལ་ཚོ་རྒྱལ་ཕྱུག་སྡེ་བ་ནས་ཡིན་པའི་དགེ་འདུན་པ་སྒྲུབ་ཆེན་ཚེ་རིང་ལགས་ནས་ཀྱང་བལ་ཡུལ་མཆོད་རྟེན་བྱ་རུང་ཁ་ཤོར་གྱི་ཉེ་འགྲམ་དུ་རང་ལུས་མེར་སྲེག་བཏང་ཡོད།