༢༠༡༣ ཟླ་ ༧ ཚེས་ ༡༥ རེས་གཟའ་ཟླ་བ།

༄༅། །ཕྱི་ལོ་ ༢༠༡༣ ཟླ་ ༧ ཚེས་ ༡༠ དང་ ༡༡ བཅས་ཉིན་གྲངས་གཉིས་རིང་ཨ་རིའི་རྒྱལ་ས་ཝ་ཤིང་ཊོན་ (Washington) དུ་ཨ་རི་དང་རྒྱ་ནག་གཉིས་ཀྱི་འགོ་ཁྲིད་དབར་ཐབས་བྱུས་དང་དཔལ་འབྱོར་ཐོག་གྲོས་མོལ་ཚོགས་འདུ་ཚོགས་སྐབས་ཨ་རིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གླེང་སློང་གནང་འདུག

དེ་ཡང་ཕྱི་ཚེས་ ༡༡ ཉིན་ཚོགས་འདུ་མཇུག་སྒྲིལ་དང་འབྲེལ་ཨ་རིའི་ཕྱི་སྲིད་དྲུང་ཆེ་གཞོན་པ་སྐུ་ཞབས་ཝི་ལི་ཡམ་བྷར་ན་སི་ (William Burns) མཆོག་གིས་གསར་འགོད་ལྷན་ཚོགས་ཐོག་གསུང་དོན། ང་ཚོས་རྒྱ་ནག་གི་སྐུ་ཚབ་དང་ལྷན་གྲོས་མོལ་བྱས་པའི་བརྒྱུད་རིམ་ཁྲོད་དེང་སྐབས་རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་པའི་གནད་དོན་དང་། ལྷག་པར་ཉེ་ཆར་བོད་དང་ཡུ་གུར་ནང་བརྟན་ལྷིང་མེད་པའི་དཀའ་ངལ་སྐོར་ལ་གླེང་སློང་བྱས་ཡོད། གྲོས་མོལ་འདིའི་དམིགས་ཡུལ་གཙོ་བོ་ནི། ཨ་རི་དང་རྒྱ་ནག་རྒྱལ་ཁབ་གཉིས་ཕན་ཚུན་གྱི་འབྲེལ་ལམ་ཐོག་འགྲོ་བ་མིའི་ཐོབ་ཐང་གི་གནད་དོན་དེ་གལ་ཆེན་ཡིན་པ་གསལ་ཁ་འདོན་ཆེད་ཡིན།

གལ་ཏེ་རྒྱ་ནག་གཞུང་ནས་མང་ཚོགས་ཀྱི་གཞི་རིམ་ཐོབ་ཐང་དང་རང་དབང་ལ་གུས་བརྩི་ཞུས་ཚེ་རྒྱ་ནག་དེ་བཞིན་སྔར་ལས་ཞི་བདེ་ལྷིང་འཇགས་དང་བདེ་འཇགས་ཆེ་རུ་འགྲོ་རྒྱུའི་ཡིད་ཆེས་བརྟན་པོ་ཞུ་གི་ཡོད་ཅེས་གསུངས་ཡོད། ཐེངས་འདིའི་ཨ་རི་དང་རྒྱ་ནག་དབར་གྱི་གྲོས་མོལ་ཚོགས་འདུའི་ཐོག་རྒྱ་ནག་གི་སྲིད་བློན་གཞོན་པ་(Wang Yang) དང་རྒྱལ་དོན་བློན་ཆེན་ (Yang Jiechi) ཡིས་སྣེ་ཁྲིད་པའི་སྐུ་ཚབ་ཚོགས་པས་ཚོགས་འདུའི་ཐོག་མཉམ་ཞུགས་གནང་འདུག་པ་བཅས། །