༢༠༡༣ ཟླ་ ༧ ཚེས་ ༣༠ རེས་གཟའ་མིག་དམར།
༄༅། །བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཕྱི་ལོ་ ༢༠༡༣ ཟླ་ ༧ ཚེས་ ༣༡ ནས་ཕྱི་ཟླ་ ༨ ཚེས་ ༦ བར་བྷན་ད་ར་ནོར་རྒྱས་གླིང་དང། མན་སྤར་ཕན་བདེ་གླིང། ཨོ་རི་ས་ཕུན་ཚོགས་གླིང་བོད་མིའི་གཞིས་ཆགས་ཁག་གཅིག་ཏུ་གཞུང་འབྲེལ་གཟིགས་སྐོར་ཕེབས་གཏན་འཁེལ་འདུག
དེ་ཡང་སྲིད་སྐྱོང་མཆོག་ཕྱི་ཟླ་ ༧ ཚེས་ ༣༡ ཉིན་རྡ་ས་ནས་ལྡི་ལིར་ཕེབས་ཐོན་གྱིས། ཕྱི་ཚེས་ ༡ ཉིན་ལྡི་ལི་ནས་ནཱག་པུར་དུ་ཕེབས་ཏེ་བོད་དོན་རྒྱབ་སྐྱོར་ཚོགས་པ་དང་མི་སྣ་ཁག་གཅིག་མཇལ་འཕྲད་གནང་རྗེས། ཕྱི་ཚེས་ ༢ ཉིན་བྷན་ད་ར་གཞིས་ཆགས་སུ་ཕེབས་འབྱོར་གནང་རྒྱུ་དང། དེ་ཉིན་ཕྱི་དྲོ་ནཱག་པུར་ནས་རཡཱི་པུར་བརྒྱུད་མན་སྤར་གཞིས་ཆགས་སུ་ཕེབས་འབྱོར་གནང་རྒྱུ། ཕྱི་ཚེས་ ༣ ཉིན་ས་གནས་ཀྱི་ལས་རིམ་ཁག་གྲུབ་མཚམས་རཡཱི་པུར་བརྒྱུད་ལྡི་ལིར་ཕེབས་ཐོན་གནང་རྒྱུ་ཡིན་འདུག
ཕྱི་ཚེས་ ༤ ཉིན་ལྡི་ལི་ནས་འབུབ་ནེཤ་ཝར་བརྒྱུད་ཨོ་རི་ས་བོད་མིའི་གཞིས་ཆགས་སུ་ཕེབས་འབྱོར་གནང་རྒྱུ་དང་། ཕྱི་ཚེས་ ༥ ཉིན་གྱི་ཕྱེད་ཡོལ་ཙམ་ནས་འབུབ་ནེཤ་ཝར་དང་ལྡི་ལི་བརྒྱུད་རྡ་སར་ཕེབས་ཐོན་གྱིས། ཕྱི་ཚེས་ ༦ ཉིན་རྡ་སར་ཕེབས་འབྱོར་གནང་རྒྱུ་ཡིན་འདུག་པ་བཅས།།
