༢༠༡༣ ཟླ་ ༧ ཚེས་ ༡༠ རེས་གཟའ་ལྷག་པ།

༄༅། །བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཕྱི་ལོ་ ༢༠༡༣ ཟླ་ ༧ ཚེས་ ༡༠ རེས་གཟའ་ལྷག་པའི་སྔ་དྲོ་ཆུ་ཚོད་ ༡༡། ༣༠ ཙམ་ལ་ཨུཏྟར་ཁཎྜ་མངའ་སྡེའི་རྒྱལ་ས་སྡེ་ར་ལྡུན་ནང་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཝི་ཇེ་བྷ་ཧུ་གྷུ་ན་ (Chief Minister Vijay Bahuguna)མཆོག་དང་མཇལ་འཕྲད་གནང་ཡོད། སྐབས་དེར་སྲིད་སྐྱོང་མཆོག་གིས་ཨུཏྟར་ཁཎྜ་མངའ་སྡེའི་ནང་ཉེ་ལམ་ཆུ་ལོག་གི་གོད་ཆག་ཚབས་ཆེ་ཕོག་པར་བརྟེན་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱིས་ཐུགས་གསོའི་འཚམས་འདྲི་སྩལ་ཡོད་པ་དེ་བཞིན་བརྒྱུད་སྤྲོད་ཞུས་པ་མ་ཟད། ངལ་སེལ་རོགས་སྐྱོབ་ཆེད་བོད་མིའི་སྒྲིག་འཛུགས་ནས་ཞལ་འདེབས་ཧིན་སྒོར་འབུམ་གསུམ་དང་རྡ་ས་ས་གནས་ཀྱིས་ཧིན་སྒོར་ཉིས་འབུམ་ལྷག་ཙམ་ཞལ་འདེབས་གནང་བའི་དངུལ་འཛིན་ཅེཀ་ཕུལ་བར་སྤྱི་ཁྱབ་བློན་ཆེན་མཆོག་གིས་ཐུགས་རྗེ་ཆེ་ཞུས་ཡོད།

དེ་བཞིན་སྲིད་སྐྱོང་མཆོག་གིས་མངའ་སྡེ་དེའི་ནང་གནས་སྡོད་བྱེད་བཞིན་ཡོད་པའི་བོད་མི་སྐྱབས་བཅོལ་བ་རྣམས་ཀྱི་དཀའ་ངལ་ཁག་གཅིག་ལ་རོགས་རམ་གང་ཡོང་གནང་སྐྱོང་ཡོང་བའི་འབོད་སྐུལ་ཞུས་པ་ལྟར། བློན་ཆེན་མཆོག་གིས་ཀྱང་བོད་མིའི་དཀའ་ངལ་སེལ་ཆེད་འབད་བརྩོན་གང་ཡོད་གནང་རྒྱུའི་ཁས་ལེན་ཡང་གནང་ཡོད། གཞན་ཡང་དབུ་ཁྲིད་རྣམ་གཉིས་མཇལ་འཕྲད་སྐབས་བོད་མིའི་སྒྲིག་འཛུགས་ཀྱི་ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལགས་དང་། རྡ་ས་ས་གནས་བདེ་དོན། སྡེ་ར་ལྡུན་ས་གནས་བདེ་དོན་གྱི་སྐུ་ཚབ། དེ་བཞིན་སྲིད་སྐྱོང་མཆོག་གི་སྒེར་དྲུང་འཇིགས་མེད་པ་སངས་ལགས་བཅས་ལྷན་བཅར་ཞུས་འདུག

དེ་ཉིན་སྔ་དྲོ་ཐོག་མར་སྲིད་སྐྱོང་མཆོག་ཉེ་ལམ་གསར་འཛུགས་བྱུང་བའི་ཚེ་རིང་དོན་ལྡན་གཞིས་ཆགས་སུ་གཟིགས་སྐོར་ཕེབས་ཏེ་མི་མང་ལ་གསུང་བཤད་གནང་ཡོད་པ་མ་ཟད། དེ་རྗེས་ཉེ་འགྲམ་དུ་ཡོད་པའི་དོན་འགྲུབ་གླིང་གཞིས་ཆགས་སུ་ཕེབས་སྐབས་མང་ཚོགས་རྣམས་ཀྱིས་ཕེབས་བསུ་གཟབ་རྒྱས་ཞུས་འདུག