༢༠༡༣ ཟླ་ ༧ ཚེས་ ༡༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༡༠ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་འབྲི་གུང་མ་དགོན་དང་བཙུན་དགོན། ཚེ་རིང་དོན་ལྡན་གཞིས་སྒར་སོགས་ལ་འཚམས་གཟིགས་གནང་གྲུབ་མཚམས་ཕྱེད་ཡོལ་ཆུ་ཚོད་ ༣ པའི་ཐོག་དོན་གྲུབ་གླིང་གཞིས་སྒར་གྱི་ས་གནས་གཏན་སློབ་ནང་ཁུལ་དེའི་སེར་སྐྱ་མི་དམངས་རྣམས་ལ་གསུང་བཤད་གནང་དོན། དེ་རིང་ང་རང་ས་གནས་འདིར་ཡོང་ནས་ཁྱེད་རང་ཚོ་དང་ཐུག་བྱུང་བ་རེད། ང་རང་བཀའ་ཤག་ཏུ་སླེབས་ནས་ལོ་གཉིས་དེའི་ནང་བོད་མི་རྣམས་རྡོག་རྩ་ཆིག་སྒྲིལ་གྱི་རྣམ་པ་ཡོད་པ་མ་ཟད། བོད་མིའི་སྒྲིག་འཛུགས་ཀྱང་ཧྲ་ཏག་ཏག་གནས་ཡོད་པ་དེ་ནི་ང་ཚོའི་གཟི་བརྗིད་རེད། གང་ལྟར་ཕྱོགས་གང་ཅིའི་ཐོག་ནས་བལྟས་རུང་བོད་མི་རྣམས་ནས་ལྷིང་འཇགས་དང་ཆིག་སྒྲིལ་གནང་དང་གནང་མུས་རེད། གང་ལ་ཞེ་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་ཀྱི་འཆར་སྣང་གཞིར་བཟུང་ང་ཚོས་འགན་ཁུར་ལེན་ཐུབ་ཀྱི་ཡོད་པ་མ་ཟད། འགན་འཁྱེར་གྱི་ཡོད་པའི་དམ་བཅའ་ཡང་ཧ་ཅང་གསལ་པོ་བྱུང་ཡོད།
སྤྱིར་བཏང་བོད་ནང་དུ་ཡོད་པའི་བོད་མི་ཚོར་བཙན་བྱོལ་ནང་ཡོད་པའི་བོད་མི་རྣམས་ནས་གང་འདྲ་བྱས་ཡོང་ངམ་སྙམས་པའི་སེམས་ཚོར་ཞིག་ཡོང་སྐབས། ལོ་གཉིས་དེའི་རིང་ལྷིང་འཇགས་པོ་ཞིག་བྱུང་ཡོད་སྟབས། འགན་ཁུར་ལེན་བཞིན་ཡོད་པའི་རྣམ་པ་ཧ་ཅང་གསལ་པོ་སྟོན་ཐུབ་ཡོད། དེ་བཞིན་བོད་ཀྱི་བདེན་དོན་ཆེད་ང་ཚོའི་ཤ་ཁྲག་གཅིག་པའི་བོད་རིགས་སྤུན་ཟླ་ ༡༡༩ ནས་རང་ལུས་མེར་བཏང་ཡོད། ཁོང་རྣམ་པར་གདུང་སེམས་མཉམ་སྐྱེ་ཞུ་རྒྱུས་མཚོན་རྒྱལ་སྤྱིའི་ཐོག་ནས་བོད་ཀྱི་གནད་དོན་ལ་སྔར་ལྷག་རྒྱབ་སྐྱོར་ཐོབ་ཆེད་ལས་འགུལ་འདྲ་མིན་སྤེལ་ཡོད། དེའི་ཁྲོད་ནས་ཉེ་ཆར་ཨོ་སི་ཊོ་ལི་ཡའི་སི་ཌེ་ནིར་གྲོང་ཁྱེར་ནང་མི་དམངས་སྟོང་ཕྲག་བཞི་ལྔ་ཙམ་འདུ་འཛོམས་ཀྱིས་ལས་འགུལ་ནང་མཉམ་ཞུགས་གནང་བ་བྱུང་ཡོད། ཅེས་སོགས་ཀྱི་གསུང་བཤད་གནང་ཡོད།
ལྷག་པར་སྲིད་སྐྱོང་མཆོག་དང་ནང་སྲིད་དྲུང་ཆེ་རྣམ་གཉིས་ནས་ཕྱི་ཚེས་ ༡༡ ཉིན་གླིང་ཚང་གཞིས་སྒར་དང་སེ་ལ་ཀུའི་ལ་འཚམས་གཟིགས། དེ་བཞིན་ཧ་པཱ་པུར། པོན་ཊ། པུ་རུ་ཝ་ལ་བཅས་སུ་འཚམས་གཟིགས་དང་འབྲེལ་ས་གནས་ཀྱི་མི་དམངས་དང་སློབ་ཕྲུག་རྣམས་ལ་གསུང་བཤད་གནང་གྲུབ་མཚམས་ཕྱི་ཚེས་ ༡༥ ཉིན་ལྡི་ལིར་ཕེབས་ཐོན་གནང་རྒྱུ་ཡིན་འདུག ད་རེས་སྲིད་སྐྱོང་མཆོག་སྡེ་ར་ལྡུན་ཁུལ་དུ་འཚམས་གཟིགས་གནང་ཐེངས་དང་པོ་དེ་ཆགས་ཡོད་པ་བཅས། །
