༢༠༡༣ ཟླ་ ༧ ཚེས་ ༢༩ རེས་གཟའ་ཟླ་བ།
སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༢༨ ཉིན་གསར་འགྱུར་བརྒྱུད་ལམ་ཁག་ནས་གནས་ཚུལ་ཐོན་པ་ལྟར་ན། རྒྱ་ནག་གཞུང་གིས་པེ་ཅིན་དུ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གློད་བཀྲོལ་ཆེད་ཞུ་འབོད་དུ་ཕྱིན་པའི་བོད་མི་བཞི་འཛིན་བཟུང་བཀག་ཉར་བྱས་ཡོད་འདུག
དེ་ཡང་ཕྱི་ལོ་ ༢༠༠༢ ཟླ་ ༤ ནང་རྒྱ་ནག་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ། རྒྱ་ནག་ཁྲིན་ཏུའུ་གྲོང་ཁྱེར་གྱི་གས་ཐོར་དོན་རྐྱེན་ལ་འབྲེལ་བ་ཡོད་པའི་ཉེས་མིང་འོག དུས་འགྱངས་སྲོག་ཁྲིམས་ཀྱི་ཉེས་ཆད་ཀྱིས་མི་ལོ་ ༡༡ བརྒལ་བ་འགྲོ་བཞིན་པ་ལྟར། ཉེ་བའི་ལོ་དེ་དག་རིང་ཁོང་གི་ནང་མི་ཉེ་འབྲེལ་གཙོས་ཡུལ་མི་ཚོས་རྫོང་དང་ཁུལ་རིམ་པར་རྒྱ་ནག་གཞུང་གི་དྲང་བདེན་མིན་པའི་ཁྲིམས་ཞིབ་ལ་བསྐྱར་བཅོས་ཡོང་བའི་རེ་འདུན་ཐེངས་མང་བཏོན་ཡང་གྲུབ་འབྲས་མ་ཐོན་བ་མ་ཟད། ཟླ་འདིའི་ཕྱི་ཚེས་ ༩ ཉིན་རིན་པོ་ཆེའི་སྲིང་མོ་དང་ཁམས་ཉག་ཆུའི་མི་སྐྱ་སོག་ར་གླུ་རི་དང་ལུག་རྫི་ཨ་བདེ། ལྷ་མོ་ཆོས་འབྲུག འདུམ་འཕྲིན་ལས་བཅས་མི་ ༤ རྒྱལ་ས་པེ་ཅིན་དུ་ཕྱིན་སྟེ་འབྲེལ་ཡོད་ལས་ཁུངས་ཁག་ལ་ཡིག་ཆ་བཀྲམས་པ་དང་ཞུ་འབོད་བྱེད་སྐབས་ཉག་ཆུ་རྫོང་གི་ཉེན་རྟོག་པས་ཤེས་རྟོགས་བྱུང་སྟེ་ཁོང་ཚོར་རྗེས་འདེད་ཀྱིས་འཛིན་བཟུང་བྱས་ཏེ། ཕྱི་ཚེས་ ༢༠ ཉིན་རིན་པོ་ཆེའི་སྲིང་མོ་ལས་གཞན་བོད་མི་བཞི་ཉག་ཆུ་རྫོང་ཀ་ར་ཞེས་པའི་བཙོན་ཁང་དུ་བཀག་ཉར་བྱས་ཡོད་འདུག
ཐེངས་འདིའི་ཞུ་འབོད་ཀྱི་ནང་དོན་ཐད་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་སློབ་མ་ཚེ་རིང་རྡོ་རྗེ་ལགས་ཀྱིས་བརྗོད་པ་ལྟར་ན། རྒྱ་ནག་གཞུང་གིས་རིན་པོ་ཆེ་མཆོག་ལ་འཇིགས་སྐུལ་རིང་ལུགས་པའི་ནག་ཉེས་བཀལ་ཡོད་ཀྱང་། ས་གནས་མི་མང་གྲངས་ ༣༠༠༠༠ བརྒལ་བས་རིན་པོ་ཆེ་མཆོག་ལ་ནག་ཉེས་དེ་འདྲ་ཞིག་གཏན་ནས་མེད་པའི་ཁག་ཐེག་འགན་ལེན་གྱི་ལོ་མང་པོར་ཞང་དང་རྫོང་། ཁུལ་རིམ་པར་གནས་ཚུལ་རིམ་པ་ཞུས་ཀྱང་། ཡ་ལན་མེད་པའི་ཁར་མ་ཉེས་ཁག་གཡོག་གིས་བཙོན་འཇུག་བྱས་ཏེ་མི་ལོ་ ༡༡ བརྒལ་བ་འགྲོ་བཞིན་ཡོད། ལྷག་པར་དེ་སྔོན་ཁོང་གི་གཉེན་ཉེ་ཚོ་ཐེངས་འགར་ཐུག་འཕྲད་བྱེད་དུ་བཅུག་སྐབས། རིན་པོ་ཆེར་སྙིང་རླུང་གི་ན་ཚ་ཕོག་ཡོད་པ་ཤེས་རྟོགས་བྱུང་སྟབས། རྒྱ་ནག་གཞུང་གིས་ནམ་རྒྱུན་མི་མང་ལ་སྤྱི་ཚོགས་འཆམ་མཐུན་དགོས་ཞེས་གླེང་བ་ལྟར། འཆམ་མཐུན་ཡག་པོ་ཞིག་ཡོང་དགོས་ཚེ་མི་མང་གི་བརྩི་བཀུར་ཞུ་ཡུལ་ལ་མ་ཉེས་ཁག་གཡོག་
འབའ་ཞིག་བྱས་ན་འཆམ་མཐུན་ཡོང་ཐབས་མེད
རྒྱལ་ཁབ་ཅིག་ལ་མཚོན་ན་རྒྱལ་དམངས་བར་གྱི་འབྲེལ་བ་གལ་ཆེན་ཡིན་པ་བཞིན་གནད་དོན་དེའི་འབྱུང་ཁུངས་གཙོ་བོ་ཕན་ཚུན་བར་ལ་ཡིད་ཆེས་བློ་འགེལ་དང་བརྩི་བཀུར་ཡོད་མེད་ལ་རག་ལས་ཡོད་ཀྱང་། ཞང་དང་རྫོང་། ཁུལ་རིམ་པའི་ལས་བྱེད་དག་གིས་སོ་སོའི་གོ་གནས་ཆེད་གོང་རིམ་ལ་རྫུན་གཏམ་ཁོ་ན་བཤད་དེ། རྒྱལ་དམངས་བར་གྱི་འབྲེལ་ལམ་ལ་གཏོར་བརླག་དང་མི་མང་གི་སེམས་སུ་རྨ་ཁ་ཆེན་པོ་བཟོས་ཡོད་ཚུལ་བཀོད་ཡོད
ཡང་ཞུ་འབོད་ཡི་གེའི་ནང་། ད་ལྟའི་བར་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གིས་ས་གནས་སུ་ཁོར་ཡུག་སྲུང་སྐྱོབ་དང་། སློབ་གྲྭ་དང་སྨན་ཁང་གསར་རྒྱག རྐུན་ཇག་མེད་པར་བཟོས་པ། གྱོད་གཞི་འདུམ་འགྲིག་སོགས་རྒྱལ་ཁབ་ཀྱི་བདེ་འཇགས་ལ་ཕན་པའི་ཕྱག་ལས་གནང་ཡོད་པ་ལས་རྒྱལ་ཁབ་ཁ་བྲལ་གྱི་ལས་ཀ་བྱས་མེད་ཀྱང་། ས་གནས་ཀྱི་འགོ་ཁྲིད་ཚོས་ཁོང་གི་ཕྱག་ལས་མཐའ་དག་ཁྲིམས་འགལ་འབའ་ཞིག་ཏུ་ངོས་འཛིན་གྱིས་དབུས་ལ་གཞུང་ཡར་ཞུ་བྱས་པ་དེས་རྒྱལ་ཁབ་དང་མི་དམངས་བར་འགལ་བ་ཆེན་པོ་བཟོས་ཡོད་སྐོར་དང་། དེ་སྔོན་རིན་པོ་ཆེ་མཆོག་གིས་ཐོག་མཐའ་བར་གསུམ་དུ་ངའི་གནད་དོན་འདི་རིམ་པ་གོང་མ་ཀྲུང་དབྱང་བར་དུ་ཞུ་འབུལ་གསལ་བོ་ཞིག་བྱུང་ན་ཐག་གཅོད་ཡག་པོ་ཞིག་ཡོང་བའི་རེ་བ་གནང་ཡོད། ཅེས་གསུངས་བ་བཞིན་མི་མང་གི་ངོས་ནས་ཀྱང་དེ་བཞིན་དུ་རེ་བ་བྱེད་ཀྱི་ཡོད།
ད་ལྟའི་བར་མི་མང་གིས་ས་གནས་འགོ་ཁྲིད་ཚོར་ཐེངས་མང་ཞུ་འབོད་བྱས་ཀྱང་། གནས་སྐབས་རིང་མགོ་སྐོར་གཡོག་པ་ཙམ་ལས་མི་མང་གི་བདེ་སྡུག་དང་རྒྱལ་ཁབ་ལ་བསམ་བློ་གཏོང་མཁན་མེད་པའི་རྣམ་འགྱུར་མཐོང་སྟབས། ཐེངས་འདིར་ས་གནས་ཀྱི་འགོ་ཁྲིད་སོགས་ལ་གསང་བ་བྱས་ཏེ་སྐྱོད་ནས་རེ་བ་ཆེ་ཤོས་རིན་པོ་ཆེ་མཆོག་གློད་བཀྲོལ་གཏོང་རྒྱུ་དང་། དེ་ལྟར་མ་བྱུང་ཡང་སྨན་བཅོས་ཀྱི་མིང་ཐོག་ནས་གློད་བཀྲོལ་གཏོང་ཐབས་དང་བསྐྱར་དུ་ཁྲིམས་བཤེར་ཆོག་པའི་ལམ་ཁ་རག་ཐབས་ལ་རེ་བ་རྒྱག་གི་ཡོད་ཚུལ་སོགས་འཁོད་ཡོད་འདུག
