༢༠༡༣ ཟླ་ ༧ ཚེས་ ༡༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༡༥ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག་ཐེ་ཝན་ནང་རྟེན་གཞི་བྱས་པའི་ (National Yang- Ming University) ཡང་མིན་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་ལུ་ཤི་ཡན་གྱིས་འགོ་འཁྲིད་པའི་ཚོགས་ཆུང་ཞིག་ནས་བོད་ཀྱི་གསོལ་གྲོན་ཁང་དུ་བོད་མིའི་སློབ་གྲྭ་ཁག་གི་སྨན་ཞབས་པ་ཁྱོན་མི་གྲངས་ ༡༨ ཙམ་ལ་སྤྱི་ཚོགས་འཕྲོད་བསྟེན་གྱི་ཟབ་སྦྱོང་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཚོད་ཆུ་ཚོད་ ༩ པའི་ཐོག་ཟབ་སྦྱོང་བ་དང་ཟབ་འཁྲིད་པ་རྣམས་ལྷན་འཛོམས་ཀྱི་དབུས་སུ་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་ཟབ་སྦྱོང་དབུ་འབྱེད་ཀྱི་གསུང་བཤད་གནང་དོན། དེ་རིང་ང་ཚོ་འདི་གར་ཟབ་སྦྱོང་ཚོགས་དགོས་པའི་རྒྱུ་མཚན་གཙོ་བོ་སྤྱི་ཚོགས་ཀྱི་འཕྲོད་བསྟེན་ཧ་ཅང་གལ་ཆེན་པོ་ཆགས་ཀྱི་ཡོད། སྤྱིར་བཏང་རྒྱ་གར་ནང་སྤྱི་ཚོགས་ཀྱི་འཕྲོད་བསྟེན་ལ་དོ་སྣང་སླེབ་རྒྱུ་དེ་གསར་པ་ལྟ་བུ་ཆགས་ཡོད། བར་ལམ་ནས་རྒྱ་གར་ནང་སྤྱི་ཚོགས་ཀྱི་འཕྲོད་བསྟེན་ལ་དོ་སྣང་བྱེད་ཤུགས་ཆེ་རུ་འགྲོ་གི་ཡོད། སྤྱི་ཚོགས་ཀྱི་འཕྲོད་བསྟེན་གང་འདྲ་ཞིག་ལ་བརྗོད་ཀྱི་ཡོད་དམ་ཞེ་ན། སྤྱི་ཚོགས་ནང་ནད་གཞི་སྔོན་འགོག་སོགས་ཀྱི་ལས་འགུལ་མང་དག་ཅིག་སྤེལ་དགོས་ཀྱི་ཡོད། དེ་ནི་སྤྱི་ཚོགས་ཀྱི་འཕྲོད་བསྟེན་ཡག་པོ་ཞིག་ཡོང་རྒྱུའི་ལས་གཞི་གཅིག་ཆགས་ཡོད། ང་ཚོའི་སྤྱི་ཚོགས་ནང་སྤྱི་ཚོགས་ཀྱི་འཕྲོད་བསྟེན་ཞན་པོ་ཡོད། དེར་བརྟེན་འཕྲོད་བསྟེན་ལས་ཁུངས་ངོས་ནས་སྤྱི་ཚོགས་ཀྱི་འཕྲོད་བསྟེན་ལ་ཤུགས་རྒྱག་རྒྱུ་གལ་ཆེར་རྩི་བཞིན་ཡོད། སྲིད་སྐྱོང་མཆོག་དང་བཀའ་ཤག་ཐོག་ནས་ཤེས་ཡོན་གལ་ཆེར་འཛིན་བཞིན་ཡོད།
ཐེངས་འདིའི་ཟབ་སྦྱོང་ནང་མཉམ་ཞུགས་བྱེད་མཁན་བརྒྱ་ཆ་དྲུག་ཅུ་ཙམ་ཞིག་སློབ་གྲྭ་ཁག་གི་སྨན་ཞབས་པ་ཆགས་ཀྱི་ཡོད། བཀའ་ཤག་གིས་ཤེས་ཡོན་གལ་ཆེར་འཛིན་བཞིན་ཡོད་པ་ལྟར། འཕྲོད་བསྟེན་ཡང་གལ་ཆེར་རྩི་བཞིན་ཡོད་པ་ང་ཚོས་ངོས་འཛིན་ཞུ་ཐུབ་ཀྱི་ཡོད། དེ་བཞིན་སློབ་ཕྲུག་ཚོའི་འཕྲོད་བསྟེན་ཡག་པོ་མེད་ན། སློབ་སྦྱོང་ལ་ཤུགས་རྒྱག་རྒྱུ་ཧ་ཅང་དཀའ་ལས་ཁག་པོ་རེད། སློབ་གྲྭའི་འཕྲོད་བསྟེན་དེ་གཙོ་བོ་སྡེ་ཚན་ཁག་བཞི་ཙམ་ལ་རག་ལས་འདུག དེ་ཡང་གཙོ་བོ་ཕ་མ་དང་། དགེ་རྒན་རྣམ་པ། དེ་ནས་བོད་མིའི་སྒྲིག་འཛུགས་འཕྲོད་བསྟེེན་ལས་ཁུངས་དང་སློབ་གྲྭ་ཁག་གི་འཕྲོད་བསྟེན་གྱི་ཚོགས་ཆུང་ཁག མཐའ་མ་སྤྱི་ཚོགས་བཅས་ལ་རག་ལུས་འདུག ཕྲུ་གུ་ཐོག་མར་སློབ་གྲྭར་འཛུལ་ཞུགས་བྱེད་སྐབས་ཕྲུ་གུའི་གཟུགས་གཞི་བདེ་ཐང་ཡིན་པའི་སྨན་པ་ཚད་ལྡན་ཞིག་གི་ལག་འཁྱེར་དགོས་ཀྱི་ཡོད། གང་ལྟར་སློབ་ཕྲུག་ཚོའི་འཕྲོད་བསྟེན་ཧ་ཅང་ཡག་པོ་དགོས་རྒྱུ་དེ་གལ་འགངས་ཆེན་པོ་རེད།
ཐེ་ཝན་ཡང་མིན་གཙུག་ལག་སློབ་གཉེར་ཁང་ནི་ཐེ་ཝན་ནང་སྤྱི་ཚོགས་འཕྲོད་བསྟེན་ཐོག་ལ་སློབ་གསོ་སྤྲོད་སྟངས་ཐད་སྙན་གྲགས་ལྡན་པ་ཞིག་ཡིན། དེ་ནས་ང་ཚོས་ཆེད་མངགས་གདན་ཞུ་བྱས་པའི་ཁོང་རྣམ་པས་དེ་རིང་ཁྱེད་རང་ཚོར་འཕྲོད་བསྟེན་སློབ་གསོའི་ལས་འགུལ་སྤེལ་ཕྱོགས་ཐོག་སློབ་འཁྲིད་གནང་གི་རེད། དེར་བརྟེན་ཁྱེད་རྣམ་པས་དོ་སྣང་ཤུགས་ཆེ་ཙམ་གནང་སྟེ་སློབ་གྲྭར་སླེབས་རྗེས་དེ་དག་ལག་བསྟར་གནང་རོགས་ཞུ་རྒྱུ་ཡིན། དེ་རིང་འདི་གར་རྒྱ་བལ་གཉིས་ནས་སྨན་ཞབས་ཁག་གཅིག་སླེབས་པ་རྣམས་ནས་ཟབ་སྦྱོང་ཉན་པ་ཙམ་མ་ཟད། དྲི་བ་གང་མང་བཏང་སྟེ་གོ་བསྡུར་སྦྱང་བཤད་ལྷུག་པོ་གནང་རོགས་ཞུ་རྒྱུ་ཡིན། ཞེས་གསུང་བཤད་དང་དེ་ནས་དབྱིན་སྐད་ཐོག་གསུང་བཤད་གནང་ཡོད། དེ་རྗེས་ལུ་ཤི་ཡན་གྱིས་ཁོང་གི་འགོ་ཁྲིད་པའི་ཚོགས་ཆུང་གི་ཚོགས་མི་རྣམ་པ་ངོ་སྤྲོད་དང་འབྲེལ་གསུང་བཤད་གནང་གྲུབ་མཚམས་བརྙན་འཕྲིན་བརྒྱུད་ཐེ་ཝན་ནང་གི་འཕྲོད་བསྟེན་སྐོར་ཚན་པ་ཞིག་བསྟན་ཡོད།
ཐེངས་འདིའི་ཟབ་སྦྱོང་དེ་བཞིན་ཕྱི་ཚེས་ ༡༥ ནས་འགོ་འཛུགས་ཀྱིས་ཉིན་གྲངས་ལྔའི་རིང་གནང་རྒྱུ་ཡིན་འདུག་པ་མ་ཟད། ཟབ་ཁྲིད་བ་རྣམས་ཐེ་ཝན་གྱི་སྨན་པ་གཅིག་གིས་གཙོས་སྨན་ཞབས་པ་དང་སློབ་ཐོན་པ་སོགས་ཡིན་འདུག
