༢༠༡༣ ཟླ་ ༧ ཚེས་ ༣༡ རེས་གཟའ་ལྷག་་པ།
༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༣ ཟླ་ ༧ ཚེས་ ༢༩ ཉིན་གྱི་སྔ་དྲོའི་ཆུ་ཚོད་ ༡༡།༣༠ ཙམ་ལ་རྨ་ལྷོ་རྩེ་ཁོག་རྫོང་མགོན་ཤུལ་རྡོ་དཀར་མོའི་དམེ་སྐོར་ཡུལ་ཚོ་ནས་ཡིན་པའི་རྟ་མགྲིན་ཚེ་རིང་ལགས་ཟི་ལིང་གི་བཙོན་ཁང་ཞིག་ནས་ཀློད་གྲོལ་ཐོབ་སྟེ་ཕྱིར་རང་ཡུལ་དུ་ལོག་ཡོད་འདུག
རྟ་མགྲིན་ཚེ་རིང་ལགས་ནི་སྔ་ལོར་རྩེ་ཁོག་རྫོང་གི་སློབ་མ་བན་ཆེན་སྐྱིད་ལགས་ཀྱིས་རྒྱ་གཞུང་ལ་ངོ་རྒོལ་གནང་སྟེ་རང་ལུས་མེར་སྲེག་བཏང་རྗེས་གནས་ཚུལ་དེ་དང་འབྲེལ་བ་ཡོད་པའི་ཉེས་འཛུགས་ཀྱིས་འཛིན་བཟུང་བྱས་པ་ཞིག་ཡིན་ཞིང་། དེ་སྔ་ཁོང་ལ་ཁྲིམས་ཐག་བཅད་པ་སོགས་ཀྱི་གནས་ཚུལ་བྱུང་མེད་ཀྱང་། འདས་པའི་ལོ་གཅིག་རིང་བཙོན་ཁང་དུ་མནར་གཅོད་མང་པོ་བཏང་སྟེ་ད་ཆར་གཟུགས་པོའི་གནས་སྟངས་ཧ་ཅང་སྐྱོ་བོ་ཆགས་ཡོད་འདུག
ཕྱི་ལོ་ ༢༠༡༢ ཟླ་ ༡༢ ཚེས་༩ ཉིན་གྱི་དགོང་མོ་བོད་ནང་གི་ཆུ་ཚོད་༨ པ་ཡས་མས་ལ། རེབ་གོང་རྩེ་ཁོག་རྫོང་རྡོ་དཀར་མོ་ཡུལ་ཚོའི་རང་ལོ་ ༡༦ ཡིན་པའི་རྫོང་རིགས་སློབ་འབྲིང་གཉིས་པའི་དམའ་རིམ་དང་པོའི་འཛིན་རིམ་གཉིས་པའི་སློབ་མ་བན་ཆེན་སྐྱིད་ལགས་ཀྱིས། ༸རྒྱལ་བ་རིན་པོ་ཆེ་ཁྲི་ལོར་བརྟན་པར་ཤོག བོད་མི་མང་ཁྲི་ལོ་བརྟན་པར་ཤོག ཅེས་སོགས་ཀྱི་སྐད་འབོད་གནང་བཞིན་རྒྱ་གཞུང་ལ་ངོ་རྒོལ་བྱས་ཏེ་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་ཡོད།
དེ་མ་ཐག་རྒྱ་གཞུང་གི་ཉེན་རྟོག་པ་དང་དམག་མི་འབོར་ཆེན་འབྱོར་ཏེ་བན་ཆེན་སྐྱིད་ཚང་གི་མཐའ་བསྐོར་ནས་ནང་མི་ཕྱི་ལ་མ་བཏང་བ་དང་ཕྱི་མི་ནང་ལ་ཡོང་མི་བཅུག་པར་དམ་བསྒྲགས་བྱས་ཡོད་པ་མ་ཟད། ཁོང་མོའི་ངོ་ཤེས་གྲོགས་པོ་དང་སློབ་གྲོགས་མང་པོ་ཞིག་ཀྱང་འཛིན་བཟུང་གིས་འདྲི་རྩད་བྱས་ཡོད།
