༢༠༡༣ ཟླ་ ༧ ཚེས་ ༢༦ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༢༥ ཉིན་སོག་ཡུལ་གྱི་རྒྱལ་ས་ཨུ་ལན་བྷ་ཊོར་འཚོགས་བཞིན་པའི་བོད་རིག་པའི་ཚོགས་ཆེན་ཐེངས་ ༡༣ པའི་ཐོག་བོད་མཐོ་སྒང་གི་གནམ་གཤིས་འགྱུར་ལྡོག་ཅེས་པའི་བརྗོད་གཞིའི་ཐོག་བགྲོ་གླེང་ལྷན་ཚོགས་ཐེངས་དང་པོ་གནང་འདུག
དེ་ཡང་བོད་ཀྱི་གནམ་གཤིས་འགྱུར་ལྡོག་ཅེས་པའི་བགྲོ་གླེང་བརྗོད་གཞིའི་ཐོག་ཚན་རིག་པ་གྲགས་ཅན་དང། གནའ་དངོས་ཤུལ་རྫས་དཔྱད་རིག་པ། གཙུག་ལག་སློབ་དཔོན། མཁས་དབང། ཉམས་ཞིབ་པ་སོགས་ཀྱིས་བོད་མཐོ་སྒང་གི་གནམ་གཤིས་འགྱུར་ལྡོག་གི་རྐྱེན་པས་དེ་སྔའི་ལོ་རྒྱུས་ནང་དང་དེང་སྐབས་བཅས་ལ་ཤུགས་རྐྱེན་ཇི་ཐེབས་སྐོར་གྱི་ཉམས་ཞིབ་བྱས་པའི་གྲུབ་དོན་སྙན་ཐོ་སྒྲོགས་སྦྱང་གནང་འདུག བགྲོ་གླེང་འདིའི་ཐོག་ཉམས་ཞིབ་པ་བསྟན་པ་རྒྱལ་མཚན་ལགས་ཀྱིས་བོད་མཐོ་སྒང་གི་གནམ་གཤིས་འགྱུར་ལྡོག་གི་རྐྱེན་པས་ཨེ་ཤི་ཡའི་ཆུའི་འབྱུང་ཁུངས་ཐོག་ཤུགས་རྐྱེན་ཇི་ཐེབས་ཞེས་པའི་བརྗོད་གཞིའི་སྐོར་གསུང་བཤད་གནང་འདུག
སྐབས་དེར་ཁོང་གིས་འབྱུང་བ་དང་མི་གཉིས་ཀའི་ཐོག་ནས་བོད་མཐོ་སྒང་གི་ས་གཞི་ཉམས་རྒུད་འགྲོ་བཞིན་ཡོད་པ་དེས་བོད་ནས་བྱུང་བའི་ཨེ་ཤི་ཡའི་རྒྱུག་ཆུ་ཁག་ལ་ཤུགས་རྐྱེན་ཚབས་ཆེ་ཕོག་གི་ཡོད་པའི་གནད་དོན་སྐོར་གསུང་བཤད་གནང་ཡོད། རྒྱལ་སྤྱིའི་བོད་རིག་པའི་ཚོགས་ཆེན་ཐོག་བོད་ཀྱི་གནམ་གཤིས་འགྱུར་ལྡོག་སྐོར་གྲོས་བསྡུར་གནང་བ་དང། ཚན་རིག་པ་དང་ཉམས་ཞིབ་པ་སོགས་མཉམ་འཛོམས་ཀྱིས་དམིགས་བསལ་ཟུར་དུ་བགྲོ་གླེང་ལས་རིམ་གནང་བ་ཐེངས་དང་པོ་ཆགས་ཡོད། བགྲོ་གླེང་སྐབས་གཏམ་བཤད་གནང་མཁན་ཁོངས་སུ་ཀོ་ལོ་རཱ་ཌོ་གཙུག་ལག་སློབ་གཉེར་ཁང་གི་གཙུག་ལག་སློབ་དཔོན་ཨི་མི་ལི་ཡེ་(Emily Yeh) ལགས་དང། རྒྱ་ནག་གི་སྤྱི་ཚོགས་ཚན་རིག་ཤེས་ཡོན་བསྟི་གནས་ཁང་གི་མི་རིགས་རྩད་ཞིབ་རིག་པ་དང་མི་རྒྱུད་དཔྱད་རིག་པ་བསྟི་གནས་ཁང་གི་གཙུག་ལག་སློབ་དཔོན་ (DU Fachun) ལགས་སོགས་གཙུག་ལག་སློབ་དཔོན་དང་། མཁས་དབང། ཉམས་ཞིབ་པ་ཁག་གཅིག་གིས་བརྗོད་གཞི་དང་འབྲེལ་བའི་ཐོག་གསུང་བཤད་ཀྱང་གནང་ཡོད་པ་བཅས།།
