༢༠༡༣ ཟླ་ ༧ ཚེས་ ༡༨ རེས་གཟའ་ཕུར་བུ།
༄༅། །འདི་གར་ཕྱི་ལོ་ ༢༠༡༣ ཟླ་ ༧ ཚེས་ ༡༨ ཉིན་ཁུངས་ལྡན་གནས་ཚུལ་འབྱོར་གསལ་ལྟར་ན། བོད་མགོ་ལོག་པདྨ་རྫོང་དུ་གྲྭ་བློ་བཟང་དགེ་འདུན་ལགས་ཀྱིས་རང་ལུས་མེར་སྲེག་གཏོང་སྐབས་བོད་མི་ཁག་གཅིག་རྒྱ་གཞུང་གི་འཛིན་བཟུང་བྱས་ཏེ། དུས་བཀག་བཙོན་འཇུག་གི་ཁྲིམས་ཆད་ལྗིད་པོ་བཏང་ཡོད་འདུག
དེ་ཡང་ཕྱི་ལོ་ ༢༠༡༢ ཟླ་ ༡༢ ཚེས་ ༣ ཉིན་མགོ་ལོག་པདྨ་རྫོང་པད་ནག་དགོན་ཀ་དག་སྤྲོས་བྲལ་གླིང་གི་གྲྭ་བློ་བཟང་དགེ་འདུན་ལགས་ཀྱིས་རྒྱ་གཞུང་གི་གདུག་རྩུབ་ཅན་གྱི་སྲིད་བྱུས་ལ་ཞི་རྒོལ་ཆེད་རང་ལུས་མེར་སྲེག་བཏང་རྗེས་ས་གནས་མང་ཚོགས་རྒྱུགས་ནས་ཁོང་གི་ཕུང་པོ་ཉེན་རྟོག་པ་དང་དམག་མིའི་ལག་ཏུ་ཤོར་དུ་མ་བཅུག་པར་རང་དགོན་དུ་གདན་འདྲེན་ཞུས་ཡོད་པ་དང་།
ཉེ་ཆར་གསར་དུ་ཤེས་རྟོགས་བྱུང་བར་གཞིགས་ན། ཟི་ལིང་གི་རྒྱ་གཞུང་ཁྲིམས་ཁང་ཞིག་ནས་གྲྭ་བློ་བཟང་དགེ་འདུན་ལགས་ཀྱི་རང་ལུས་མེར་སྲེག་བཏང་རྗེས་ཁོང་གི་ཕུང་པོ་ཉེན་རྟོག་པ་དང་དམག་མིའི་ལག་ཏུ་མ་ཤོར་བའི་ཆེད་ངོ་རྒོལ་སྐད་འབོད་ཀྱི་ལས་འགུལ་ནང་ཞུགས་པའི་ཉེས་མིང་འོག་མགོ་ལོག་པདྨ་རྫོང་སྡེ་ནང་ཤང་ནས་ཡིན་པ་རང་ལོ་ ༥༧ སོན་པ་རྡོབ་ཕྲུག་ལགས་སུ་རྒྱ་གཞུང་གིས་དུས་བཀག་བཙོན་འཇུག་གི་ཁྲིམས་ཆད་ལོ་ ༡༠ དང་། པདྨ་རྫོང་ནས་ཡིན་པ་རང་ལོ་ ༤༠ སོན་པ་དབུ་རྒྱན་རྡོ་རྗེ་ལགས་སུ་དུས་བཀག་བཙོན་འཇུག་གི་ཁྲིམས་ཆད་ལོ་ ༡ དང་ཟླ་དགུ པདྨ་རྫོང་རྡོ་གོང་མ་ཤང་ནས་ཡིན་པ་ཆོས་སྐྱབས་ལགས་སུ་དུས་བཀག་བཙོན་འཇུག་ཁྲིམས་ཆད་ལོ་ ༡ དང་ཟླ་དྲུག་བཅས་ཀྱི་ཁྲིམས་ཆད་བཏང་འདུག
