༢༠༡༣ ཟླ་ ༧ ཚེས་ ༡༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༡༣ ཉིན་སུད་སི་སྐུ་ཚབ་དོན་ཁང་གི་གོ་སྒྲིག་ཐོག་ཡོ་ནཱ་ཁུ་རོ་ཡི་ཚོགས་ཁང་དུ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་སུད་སིར་གནས་འཁོད་བོད་རིགས་མི་མང་རྣམས་ལ་གསུང་བཤད་གནང་ཡོད།
དེ་ཉིན་སྐུ་མགྲོན་གཙོ་བོ་བོད་མི་མང་སྤྱི་འཐུས་སྤེན་པ་ཚེ་རིང་མཆོག་དང་། ཕྱོགས་ཞུགས་ཡུ་རོབ་སྤྱི་འཐུས་དང་སྤྱི་ཟུར་རྣམ་པ། ཡུ་རོབ་དམིགས་བསལ་སྐུ་ཚབ་སྐལ་བཟང་རྒྱལ་མཚན་ལགས། སྐུ་ཚབ་དོན་གཅོད་ཚེ་བརྟན་བསམ་གྲུབ་ལགས། སུད་སི་བོད་རིགས་མི་མང་གི་ཚོགས་གཙོ་དང་ཚོགས་གཞོན་གྱིས་གཙོས་རྒྱུན་ལས་རྣམ་པ། བོད་རིགས་ཚོགས་པ་ཁག་གི་སྐུ་ཚབ་མི་མང་བཅས་ལྷན་འཛོམས་ཐོག་སུད་སི་བོད་རིགས་མི་མང་ཟློས་གར་ཚོགས་པ་ནས་བོད་རྒྱལ་ཁབ་ཆེན་མོའི་རྒྱལ་གླུ་ཕུལ་གྲུབ་མཚམས་བོད་ནང་གི་རྒྱལ་གཅེས་པ་ཕོ་མོ་འདས་གསོན་ཡོངས་ཀྱི་ཆེད་མྱ་ངན་ངག་བཅད་སྐར་གཅིག་ཞུས།
དེ་ནས་བོད་མི་མང་སྤྱི་འཐུས་ཚོགས་གཙོ་མཆོག་གིས་གསུང་བཤད་གནང་དོན། ང་ཚོས་བོད་ནང་ཁྱོན་ཡོངས་ནས་བཤད་པ་ཡིན་ན་ཛ་དྲག་གནས་ཚུལ་ཆགས་ཡོད། མི་རིགས་ངོ་བོ་རྩ་བརླག་འགྲོ་རྒྱུའི་ཉེན་ཁ་དང་བོད་ཆགས་འཇིག་གི་གནས་སྟངས་ཆགས་ཡོད། ང་ཚོར་རྒྱུན་དུ་ནས་༸གོང་ས་མཆོག་གིས་བཀའ་སློབ་ཕེབས་པ་ལྟར། མི་ཚེ་འདིའི་རིང་ཤ་ཁྲག་རུས་གསུམ་བོད་མི་ཞིག་གི་སྐྱེ་བ་བླངས་ཡོད་པར་བརྟེན། མི་རིགས་གཞན་དང་མི་འདྲ་བའི་འགན་ཞིག་འཁྱེར་དགོས་པ་རང་བཞིན་ཆགས་ཡོད། འགན་དེ་འཁྱེར་བར་གནད་དོན་ཏོག་ཙམ་མ་ཤེས་ན་འཁྱེར་རྒྱུ་དེ་ཧ་ཅང་ཁག་པོ་རེད།
སྤྱིར་བཏང་འཛམ་གླིང་ནང་རང་བཙན་ཡོད་པའི་རྒྱལ་ཁབ་ཀྱི་མི་རིགས་ཚོ་ཡིན་ནའང་། སོ་སོའི་རྒྱལ་ཁབ་ནང་དཔལ་འབྱོར་དང་སྤྱི་ཚོགས། ཆབ་སྲིད་ཀྱི་འགྱུར་འགྲོས་གང་འདྲ་ཡོང་གི་ཡོད་མེད་དོ་སྣང་ཆེན་པོ་ཡོད། འོན་ཀྱང་ང་ཚོའི་བོད་པའི་སྤྱི་ཚོགས་ནང་༸གོང་ས་མཆོག་གི་དབུ་ཁྲིད་དེ་ད་ལྟ་བར་དུ་ཕྱིན་པ་དང་སྐུ་དབང་རྩིས་སྤྲོད་མཛད་ནས་མང་གཙོའི་ལམ་ལུགས་ཚད་ལྡན་ཐོག་འགྲོ་གི་ཡོད་པ་མ་ཟད། སྔར་དང་མི་འདྲ་བའི་གནས་ཚུལ་རྒྱུས་ལོན་བྱེད་རྒྱུའི་བརྒྱུད་ལམ་གློག་འཕྲིན་དང་དྲ་རྒྱ་སོགས་ཡོད་ཀྱང་དོ་སྣང་ཆུང་དྲགས་ཏེ། བོད་པར་བོད་ནང་གི་གནས་སྟངས་གང་འདྲ་ཆགས་སྐོར་འགྲེལ་བཤད་རྒྱག་རྒྱུ་མེད་པ་དེས་མ་འོངས་པར་སེམས་ཁྲལ་ཡོང་རྒྱུ་ཞིག་དང་།
ལྷག་པར་ད་ལྟའི་འགྲོ་སྟངས་ཀྱི་གནས་ཚུལ་རྒྱུས་མ་ལོན་ན། སོ་སོའི་ལྟ་བ་ལངས་ཕྱོགས་དང་བོད་དོན་ཐོག་ལས་ཀ་བྱེད་རྒྱུ་ཧྲ་ཏག་ཏག་ཅིག་ཡོང་རྒྱུ་མེད། རླུང་པོས་གང་ཕྱོགས་སུ་འཁྱེར་བ་ལྟར་ཕྱིན་ན། ང་ཚོ་བོད་པ་ཉུང་ཉུང་དེ་རང་ཚུགས་མ་ཐུབ་པའི་སྤྱི་ཚོགས་ཤིག་ཆགས་ཉེན་ཡོད། དེ་བཞིན་བོད་ཕྱི་ནང་དང་རྒྱ་ནག་སྤྱི་ཡོངས་ནང་འགྱུར་བ་ཤུགས་ཆེན་པོ་འགྲོ་བཞིན་པ་ཚང་མས་མཁྱེན་གྱི་ཡོད། འོན་ཀྱང་ཞིབ་ཚགས་ཙམ་ཞིག་ཤེས་པ་བྱ་རྒྱུ་གལ་ཆེན་པོ་ཡིན། ཞེས་གསུང་བཤད་གནང་སྟེ་དྲི་བ་དྲིས་ལན་ལྷུག་པོ་གནང་ཡོད།།
